LATEST NEWS MIZORAM - KOLASIB DISTRICT NEWS LETTER - TIMES OF MIZORAM

Breaking

Home Top Ad

Post Top Ad

LATEST NEWS MIZORAM - KOLASIB DISTRICT NEWS LETTER

Ziaktu : TC.Lalmuankima, Senior Correspondent, RNU, Aizawl

District Newsletter puan chhuah hun a lo ni leh ta a, tukinah chuan tun thla chhunga Kolasib District-a thil thleng langsar zualte kan rawn puang chhuak dawn a ni.
Nilaini khan Kolasib DC Office leh Districl Level Home Inspection Team ten Missionaries of Charity (MC) Home, Convent Road-ami chu an enfiah.

times of mizoramEnfiahnaah hianKlasib SDC Pu Danny Lalchhuanawma chuan ram chhung hmun hrang hrangah Home kalphung dik lo a awm thin avangin Home Inspection chu neih a nih thu a sawi a. Catholic Kohhran hnuaia rawngbawlna peng pakhat MC Sister-te enkawl Missionaries of Charity Home pawh hi an kalphung leh an inenkawl dan te hre tura tlawh an nih thu Home enkawltute chu a hrilh a ni.

He Home hi MC Sister 5 leh thawktu dang 3 ten an enkawl mek a, dam lo enkawl ngai leh tanpui ngai te chauh enkawlin, mipa 4 leh hmeichhia 6, an vaiin mi 10 an enkawl mek a, heng mite hi tanpui an ngaihna apiangah a thlawn vekin tanpuina leh an mamawh ang damdawite an pe thin a ni.

‘Mother Teresa’ pawl tia hriat lar, Missionaries of Charity hian he Home hi kum 1987 March ni 17-a an din a ni a; Chhungkaw khawsak harsa, enkawlna mamawh dam lo leh tanpui ngai te enkawl bakah enkawltu nei lo naupangte pawh an enkawl thin a, amaherawhchu kum 2012 atanga ram puma Child Protection dan khauh taka kalpui a nih hnu kum 2013 atang khan he Home-ah hian puitling chauh an enkawl tawh a ni.

Thawhtanni liam ta khan Kolasib MZP Hqrs. bultumin Electoral Roll-a Bru thun tumna awm mek duh lovin lungawilohna lantir a ni a, Govt Kolasib College atanga kawng zawhin DC office tualah sit-in-demonstation neih zui a ni.

Sit-in-demonstation neihna hmunah hian MZP President Pu Zosangliana Rokhum chuan thu sawiin, hearing-a inlan duh lo Bru-te e-roll-a dah luh tumna awm chu zirlaiten an duh loh vangin an dodal tih a sawi a, a tul a nih chuan na zawka kal zel pawh an hreh lo tih a sawi.

Thusawitu dang MZP adviser Pu C. Zomuanpuia pawhin Bru-te chu anmahni duhthu ngeia Mizoram chhuahsantu an nih thu sawiin, kum 1997, October ni 21-ah Lalzawmliana, Forest department hnuaia game watcher hna thawk mek chu Damparengpuiah Bru pawl pakhat, Bru National Liberation Front (BNLF) ten an that a, hemi hnu hian anmahni duhthu ngeiin Mizoram chhuahsan turin an mite an hriattir zui a ni, a ti a. Kum 21 Mizoram an chhuahsan chhungin Mizote tan a hnawk thei ang berin an khawsa reng a, sorkar laipui lamah a chhe thei ang bera Mizo te hek chungin an lo kir lehna turah mipuiten an dodal lo tih a sawi. Amaherawhchu tum tam tak hruai kir tuma hmalak a ni chungin anmahni lamin an thulh leh thin a, ruahmanna hnuhnung ber pawh tunhnaiah a tlawlh leh niin a sawi.

DC office kawtah hian College SU Vice President Lalnghilhlova pawhin MZP hmalakna chu a tawp thlenga an thlawp tur thu a sawi a, HSA, Jt. Hqrs aiawha thu sawitu Hrangliankhuma Hmar pawhin Mizoram atanga anmahni duhthu ngeia chhuak Bru-te roll-a an luh theihna tura Tripura-a zuk kalchilh chu an duh lova, MZP te hmalak chu a tawp thlengin an thlawp dawn tih a sawi ve bawk.
Lungawilohna lantira kawng zawh leh sit-in-demonstation neihnaah hian zirlai 300 dawn lai an pungkhawm a, thutkhawm an neih zawh hian District Election Officer Dr. Arun T. IAS awm loh laia charge latu Addl DC Pu Laltanpuia Hnamte kutah resolution an thehlut nghal a ni.
Khawvel hmun dang rualin Thawhanni khan Kolasib PHE EE office tualah Global Handwashing Day pualin hun hman a ni a, he hunah hian PHE SDO Pu R. Ramdinthara chuan thu sawiin, mihringte hian ei leh in tui hnai tak tak te eiin, bar thin mah se, an eina kut a fai loh chuan kuta bawlhhlawh awm te atangin natna hlauhawm tak tak an kai thei a, chuvangin thil ei dawn apiangin fai takin kut sil ngei ngei tur a ni, a ti.

He hun hi Kolasib SBM (G), District Coordinator, Pu Malsawmtluanga’n kaihruaiin, PHE office-a thawkte’n kalkhawm zirlai leh midangte chu kut silfai dan an zirtir a ni.

State chhung hmun dangte rualin tun thla ni 10 khan Kolasib-ah Dan lova din Chakma Autonomous District Council, Dan hmanga thiah a nih theih nan chhim leh hmar atangin kawng zawh a ni a, Diakkawn Bung bulah an intawk khawm a ni.

Tun thla ni 10 vek khan Kolasib DC Conference Hall-ah inthlanpui lo awm tura atana inpuahchahna kal zelah master trainer-te tan thupui hrang hrang hmangin Training buatsaih a ni.

Training-ah hian inthlan huna Postal Ballot hmanga Vote thlak dan, Inthlan boruaka Candidate leh Party-te senso endik leh vil dan, Inthlan chuh tura Candidate ten hming an pek endik, Affidavit leh Inthlan chuh tura an Qualify leh Qualify loh te bakah Election kaihhnawiha thlalak hmanga documentation tih dan te Tuirial Constituency Returning Officer Pu Laltanpuia Hnamte in a zirtir a. Serlui Constituency RO Pu V.L. Remliana’n inthlan huna Team hrang hrangte mawhphurna bakah Security chungchang a zirtir a, Election Officer Pu Vanlalchhuanawma Chawngthu in Vote chhiar huna hma lak dan leh Vote thlak ni-a ruahmanna tul hrang hrang chungchang a zirtir a, District Informatics Officer Pu Raphael Hauzel chuan election kaihhnawiha Software hrang hrang siam te hman dan leh a tangkaina a zirtir a ni.

Kolasib Dist.-a Faina Hapta, tun thla ni 2-a hawn chu tun thla ni 9 khan Kolasib Venglai Parish Hall-ah khar a ni a, Govt Kolasib College Principal Dr C. Lalmuankima chu khuallian a ni.

Faina Hapta kharna hun hi Pi PC Zonuntluangi, DUDO, Kolasib chuan kaihruaiin, khuallian chuan faina kawnga hmalatu hrang hrang te chungah lawmthu a sawi a. Fai turin rilru put hmang leh sukthlek thlak a ngai a, a sawia sawi aiin a taka nunpui a pawimawh a ni, a ti. Khuallian chuan Mizoten zuk leh hmuam leh taksa tana tangkaina nei lo an ti tam lutuk chu an taksa faina kawnga daltu a ni a, heng atana sum leh pai tam tak khawhral thin chu a reh theih nan zuk leh hmuam leh taksa tana tangkaina nei lo hmawmsawm an tih thin te chu bansan ngam a tul a ni, a ti.

He hunah hian Kolasib District chhunga Thingtlang khaw fai intihsiakna ‘Swachh Survekshan Gramin’ lawmman sem a ni a. pakhatna - N. Hlimen; pahnihna - Phainuam leh pathumna - Saiphai te an ni a, lawmman pawisa fai leh citation hlan an ni.

Kolasib khawchhunga veng fai berah Khuangpuilam thlan a ni a, pahnihna Hmar veng, pathumna College Veng. Office fai berah PHE EE office thlan a nia, phnihna KVK office, pathumna ICAR office.

Primary School fai ber chu Govt P/S-III, Thingdawl a ni a, pahnihna Govt P/S-I, Kolasib, pathumna Govt P/S-XI, Project Veng. Middle School fai berah St. Maria Gorettis School thlan a ni a, pahnihnaah Govt TS Luaia M/S,Rengtekawn, pathumna Govt. Chawngfianga M/S, Saidan. Secondary School-ah HT H/S, |umpui chu fai berah thlan a ni a, Govt Kolasib HS pahnihna, pathumna chu Govt Diakkawn H/S a ni.

Hostel & Restaurant zingah Cheerz Restaurant, Venglai chu fai berah thlan a ni a, pahnihnaah RC Restaurant, Diakkawn, pathumna chu Mizo Hotelpui, Diakkawn a ni. 
Tun thla ni 8 khan Kolasib DC Conference Hall-ah Assembly Inthlanpui lo awm tura inbuatsaihna kal zelah Model Code of Conduct leh MLA Candidate leh political party-te sum hman ral theih chin leh a kaihhnawih chungchangah training neih a ni a, he hunah hian Kolasib Dist chhunga MLA bial 3 atangin party hrang hrang aiawhte an tel.

He hunah hian Kolasib Election Officer Pu Vanlalchhuanawma chuan inthlanpui lo awm turah inthlanna felfai leh thianghlim a awm theih nan Election lama thawktute chuan theihtawp an chhuah dawn a, dan leh thupek kenkawh kawngah pawh hun dang zawng aiin hma an la nasa dawn tih a sawi a. MLA candidate ten ECI kaihhruaina angin Cheng Nuai 20 bak an hman ral a rem dawn lo, hemi kawngah hian candidate leh an agent-te bakah party hruaitute an fimkhur hle a tul dawn a ni, a ti. 
Kolasib Addl DC & Returning Officer Pu Laltanpuia Hnamte pawhin, inthlanna felfai neih theih nan ECI kaihhruaina te zawm theuh turin party tin te a sawm a. Dan chu Dan a nih angin thil fel lo leh dik loah chuan inhriatthiam mai mai theih a ni dawn lo a, Dan zawm mai chu a himin khua leh tui thate chuan hei hi an ngai pawimawh hle tur a ni, a ti.

Training-ah hian Model Code of Conduct leh MLA candidate leh political party ten an zawm tur hrang hrangte zirtirna bakah zawhna leh chhanna hun te hman a ni.
Tun thla ni 3 khan, Cheng Nuai 490 Sing 3 Sang 7 senga siam chu Kolasib bialtu MLA Pu PC Zoram Sangliana’n a hawng.

Bairabi Water Supply Scheme hi Bairabi-a mihring pun dan chhutin, kum 2042-a mihring 9000 an tlin thlenga ni tin mi pakhat tan tui litre 70 zel pe thei tura duan a ni. 
Awle, chuti zawng chu tukina Kolasib District chanchin kan rawn puan chhuah theih chu a ni e.

-/tc/- ALL INDIA RADIO NEWS AIZAWL REGIONAL NEWS UNIT

No comments:

Post a Comment

Post Bottom Ad