Michael Lalmanzuala - I dam chhan eng nge ni ?

Michael Lalmanzuala“I dam chhan eng nge ni?” bu-a chuang mi thenkhat chanchin kan rawn post thin a. A hmain kan sawi tawh nual nain he lehkhabu chanchin hi sawibelh leh deuh a tulin ka hriat. R. M. Lala lehkhabu, ‘finding a purpose in life’ bu Mizotawnga ka lehlin a ni a. Mitin tan hian Pathianin kan dam chhunga kan tih tur a ruatlawk vek a. Chutiang chu hria-a an nun kawng zawhte chu an phurin an hlawhtling nge nge tih hi he lehkhabu thupui chu a ni a. Chutiang nun nei theite chuan “mahni inenkana midangte tana inpumpek” nun an hmang tawp mai a ni.

Mother(St.) Teresa chuan zirtirtu hna chu hna zahawm leh tangkai tak a ni tih hrereng chungin Pathianin a tih tura a ruat chu mirethei leh damlote tana thawh a ni tih a hriat veleh chu lam kawng chu a zawh ta a, a bak chu khawvel history a ni ta a ni.

Albert Schwitzer chuan kum 29 mi a nihin Doctorate pathum, Philosophy, Music leh Religion-a nei tawhin a thiamna hmanga a thawhna lamah Europe rama mi lar leh ngaihsan ber pawl a ni hman a. Amah leh amah a inngaihtuah a, a thiamna te chu lar zel nan leh hausak zual nena hmang tur nge a nih, a thiamna te chu amah anga thiamna nei ve lo rethei tak takte tana hmang tangkai tur zawk? Ti-a a inzawhna chu retheite tana inhmang tur a ni tih hriattirna a hmu nghal a. A tih tur chu Congo ngaw dur puia Missionary doctor hnathawh tih a hria a. Doctorate pathum a nei tawh chungin Medical Doctor ni turin kum sarih course a bei leh a. Certificate a neih veleh ama sum hmang lehnghalin Congo-ah chuan a kal ta a, kum 40 zet hna a thawk ta a ni.
Midangte chanchin pawh kan la rawn post thin ang a. Tuna tan chuan a bu tawp lama mi ka’n thur chhuak ang e.


PATHWAYS TO A PURPOSE

Khawi hmunah pawh Pathian hian min awmtir sela, kan tih tur bik hi fel takin a lo ruat lawk thin. Mi pakhatina kan tih tur bik hi eng emaw a lo siam bik tlat thin a ni. Eng emaw changa khawilo kal nikhuaa tanpui ngai takte kan han hmuh chang te hian Pathian hian hetiang mite tanpui tura kha lai hmuna min kaltir kha emaw ni dawn le aw tia mahni leh mahni inzawh a tangkai khawp a ni. Hetianga ngaihtuahna kan hmana, tih tur tul kan tih hian kan nunphung naran ve tak maia kan ngaihte kha zahawm takah a chantir thei a ni. Chutianga kan awm chuan kan lal ber rawng kan bawl chhunzawm zat mai tihna a ni. 
- J.R. Miller, In Green Pastures

AVENUES AND IMPEDIMENTS

Thil tum hi van atanga lo tla kher tura ngaih tur a ni . Keimahniina kan zawn kan zawn rah hi a ni chawk zawk thin. Kan thlarauvin a zin kawnga ngaihtuahna zalen tak hmanga kawng hmuhtir tura Pathian a zawnna rah chhuah a ni thin a ni. Mahni leh mahni ngaiha kan rinawm chuan kan thinlung a hahdam a. Mi dang nena kan inkungkaihna kawngah mi dang rin kan hlawh phah bawk thin a ni. Duhthlanna dik huaisen taka kan neih ngam chuan changkanna lamah min vawrh sang thin a. Mahni hmasialna tel miah lova thil tih duhna kan neih hian tumruhna min neihtir a, inthlahdulna erawh chuan min tichak lo thin a ni. Kan inthlahdul phawt chuan ho te emaw pawh ti ila, kan thil tum pawimawh tak kan hlen theih loh phah hial thin a ni.


Thil tum nghet neih hian kan nunah awmze thuk zawk a neihtir a, lungawina tak kan neih phah thei a ni. Mitin nun hian danglamna a nei vek a. Chuvang chuan mitinin kan kawng zawh tur bik kha kan zawn thiam a ngai a ni. Heta tana a pawimawh ber chu mahni indahthaa mi dang ngaih pawimawh zawkna thinlung neih hi a ni. Zawhna zawh hmasak ber tur chu inhuat vang emaw, thinrim vang emaw, inelna neih avang emawin tu emaw nena innghirhona ka nei em tih a ni. MRA-a ka thian pakhat chuan, “Mi pakhat nena in innghirngho avanga an inhlatna chen chiah kha Pathian nena in inhlatna chu a ni,” tiin min hrilh. Kan thinlung kawngka hi zau taka a inhawn chuan keimahnia rinhlelhna leh hlauhna awmte hian chhuahna kawng an hmu thuai mai a. Thil tum tha neihna thlifim a rawn tleh lut ta thung thin a ni. Thil tum tha leh hlu neihna kawng tha ber chu tanpui ngaite, kan mihringpuite an ni emaw, ramsa sava an ni emaw, boruak leh ramngaw an ni emaw, an phur rit phurhpui duhna tak thinlung neih leh humhalh an tul huna huai taka tih tur tul tih ngam hi a ni. Zawhna kan inzawh fo thin tur chu: ‘A laiah hian tu nge awm? Keima nun nge ka chhehvela mite?’.

Kan nuna kan thil tum tha kan hlen theih nana min daltu lian tak pakhat chu ngaihdamna kan nei thei thin lo hi a ni. Dr. Frank N.D. Buchman chuan Pastor a nih hlima a thil tih tum pawimawh ber chu thalai ho kaihhruai hna niin a hria a. Tichuan, thalai ho hostel enkawltu-ah a tang a, eng emaw chhung chu a hlimpui viau a. A naupang enkawlte an lo thanlen zel chuan chaw an lo ei tam chho ve zel bawk a. Buhfai lei nana pawisa a dil belh chu Hostel enkawltu parukte chuan an phalsak lo va. A thinrim chuan a hna chu a bansan ta a. Rei lo teah a hriselna chu a rawn tla hniam a. Doctor pakhat chuan ram pawna zin chhuak turin thurawn a pe a. Middle East leh Mediterranean-ah te a kal a. Hlim awm ang tak chuan a lang thin na-in, a lungawilohna thinlung kha chuan a kalsan chuang si lo a ni. A zinnaa a thian pakhat a hmuh hnenah chuan, “Khang board member parukte kha ka ngaidam ngai lo ang,” tiin a hrilh a ni.

Ni khat chu England-a Lake District-a a awm laiin Keswick Biak Inah a va inkhawm ve a. Inkhawm an thahnem lo hle a. Nu pakhat hian thu a rawn sawi a. Pastor a nih ve tho avangin Lal Isua khenbeha awm thu sermon hi a lo ngaithla hnem ve hle tawh thin a. Amaherawhchu, chu thusawitu nu-ina a sawi thiam ang ema sawi thiam kha a la tawng ngai lo: “A kutphaha thirkhen chu ka hmu a, a kea thirkhen lian zawk chu ka hmu a, a hmela lungngaihna leh tuarna rapthlak tak chu ka hmu a. Ka sual avanga hliam tuar a ni tih ka hria a. Amaherawhchu, amah nena kan inkar chu a hla em em mai a. A chhan chu ka thinlunga mi dang huaa phuba lak tumna ka neih reng vang a ni,” a ti a ni.

Chu thusawi a hriat rual rual chuan board member parukte kha an thiam lo vek a nih chuan khatianga an chunga thinrimna leh phuba lak duhna a neih avang khan titu pasarihna a ni ve tih kha a inhre nghal a. Hostel-ah chuan a va kal kir a, board member parukte kha lehkha a thawn a. Chu a lehkhaah chuan an chunga thinrima phuba lak duhna hial a neih thin avanga ngaidam turin a dil a ni. A lehkha tlang kawm nan chuan Gandhi-a hla duh em em pakhat hi a hmang nghe nghe a ni:

Isua Kraws mak tak chungah khan 
Ropuina lal thi ka hmuhin 
Ka hlawkna ber ka ngainep a
Chapo uanna ka ngaitlawm a.


Amah leh amah inpuangin chu a lehkha chuan amaha nun chakna danglam tak mai a rawn pe ta a. A hnu-a thlarau lama harh hawkna a neih phah thu a sawi a ni. Thinrima phuba lak duhna a neih chu a paih bo ta a. Chumi hnu-ah chuan a thlarau, mahni hmasialna thanga awk chu a chhuak ta a ni. Buchman-a tan chuan a nuna kawngka thar rawn inhawnna a ni a. Moral Rearmament hnathawha khawvel pum huapa a inhman bul tanna a ni ta a ni. Tun hnu-ah chuan a rawngbawlna hna chu nun nguite tihharhna atan a zauh a. Chutiang tih nana a hmanraw pawimawh ber chu ringtu tute tan pawha chhia leh tha hriatna kaihhruaina hmanga tih ngei ngei tura a ngaihte an ni a. Chu’ngte chu rinawmna te, felfaina te, mahni hmasial lohna te leh hmangaihna te an ni. Heng bakah hian ama tan leh mi dang tan mahni inbihchian thinna hun neih pawimawh thu a sawi a. Ngaihdam theih lohna hian i tun hma nun salah a tantir che a. Ngaihdamna chuan nakin hnu zela thil tha tih nan kawngka zau takin a hawng thung a ni.

Post a Comment

0 Comments