Mizo Zirlai Pawl MZP chuan an vehbur khawn tlingkhawm cheng nuai 5 sing 4 & 4381 atangin Bairabi Zophaia Assam Police nena buaina a hliam tuarte leh thil bo te chhawmdawlna vawiin khan a pe a, mi 32 hnenah a sumfaiin pek chhuah a ni a, Bairabi Zophai buaina a bungraw hman Bairabi YMA Dekchi lian 4 leisak an ni a, midang ta hawh Dekchi lian 4 lei a ni bawk a. Comercial gas leh Bairabi khawtlang Mutbu 20 man hlan a ni bawk a ni.
He huna thusawitu MZP President L.Ramdinliana Renthlei chuan, MZP anga hnatlanga thawkchhuak hliamtuar te kha chu hliam tuar turah an inngai a, mahse journalist ten hliam an tuar a, vuak te an tuar ve kha an hrethiam lo leh zuala, Mizo Journalist hliam tuar te an zah hle a, MZP in a hmuh chian em em chu Mizo Journalist te chu a tul huna huaisen leh thawkrim an ni a ti a ni.
MZP chhawmdawlna pek chhuah dawng tura tih Journalist 8 te chuan sum fai la lovin, anmahni hna thawka kal an ni a, an tawrhna pawh ram leh hnam tan a ni tih sawiin, MZP lakah phut let an nei lo an ti a ni.
MZP President chuan, ramri humhalh kawngah NGO ang chuan theihtawp an chhuah thin a, thisen chhuak hial leh jail bang zut hial khawpin an theihna an hmang ve thin a, amaherawhchu a tawpna chu Sorkar thuneitute tho tho a ni leh thin a, a hlawhtlinna tak tak chu Sorkar a ni zel a ni, a ti a. Mizoram chu thenawm state te angin chimral a la ni lo a, chhan theih a la ni a, chhan tlak a la awm a Zoram chhan tur chuan ram hruaitu huaisen leh rintlak neih a ngai a ni, a ti.
MZP chuan Mizoram leh Assam ramri chinfel a nih thuai theih nan hma a la chhunzawm zel dawn a ni a ti bawk. - AIR News Aizawl
Post a Comment