Mizoram State Assembly Inthlanpui chu November Ni 28 ah neih a ni dawn a, December Ni 11 ah Vote chhiar a ni dawn tih vawiin khan Chief Election Commissioner Om Prakash Rawat chuan a puang.
Election Commission Of India (ECI) in a puan danin, Mizoram State bikah November Ni 2 hian inthlan hriattirna tihchhuah a ni anga, chuh tumte tan hming thehluh hun tawp ni chu November Ni 9-a ni anga, November Ni 12-ah hming endik a ni anga, inhnukdawk duh tan November Ni 14 thleng hun hawn a ni ang, Inthlan Ni hi November Ni 28 ah neih a ni dawn a. December Ni 11 ah Vote chhiar a ni dawn a ni.
Mizoram Chief Electoral Officer Pu SB Shashank hnen atanga thu dawn danin, Mizoram District 8 a Assembly Seat 40 ah Polling Station 1164 a awm a, Polling Station buaipui tu tur Sector 139 awmin, Polling Station zawng zawngah Electronic Voting Machine (EVM) Ballot Unit 1859 leh Control Unit 1841 hman a ni dawn a ni. Mizoram inthlanpuiah hian a vawi khatnan VVPAT 1751 hman a ni dawn bawk a, Venhimna hmalatu turin Mizoram State Police- Company 48 leh Central Armed Police Force Company 40 an awm dawn a, kuminah hian Polling Station 125-ah Webcasting hman a ni dawn bawk a ni.
Mizoram-ah September Ni 27 thleng khan Vote thlak thei tur mi nuai 7 sing 6 & 8181 an awm a, Inthlan hnuhnung ber kum 2013 khan 100-a 83 in vote an thlak a ni.
CEO Pu Shashank chuan ECI-in Vote thlak hun a puan velah atangin Model Code of Conduct chu hman tan a nih nghal thu a sawi a, Political Party zawng zawng te leh Sorkar Officer te pawh Model Code of Conduct hnuaiah hian khuahkhirh an ni a. Voter te duhthlanna ti buai thei zawnga chet lakna chi reng reng chu khap a nih thu a sawi bawk a ni.
Mizoram bakah hian India ram chhung State 4 dang - Madhya Pradesh, Rajasthan, Telangana leh Chattisgarh te an inthlang dawn a ni. ~ Press Release
Post a Comment