MIZORAM MAXI CAB OWNERS' ASSOCIATION-IN SERVICE CHÂWLA SAWRKARA A THIL NGIAT CHU
All Mizoram Permit hi kum 2007 aṭang hman ṭan tawh a ni a, kum 2016 aṭang khân ROUTE WISE -a thlâksak kan ni a, hei hian Zoram mipui tam zâwkte tân harsatna min thlensak nasa êm êm a ni. A chhan chu emergency thilah ram chhûng hmun hrang hrangah tlân chhuah a lo ngai a, Special Road Permit hi ₹100/200-a lâk chhuah a ngai a, Special route permit apply tûrin Internet (network) service a ṭha reng lova, apply dân thiam kan awm mumal loh bâkah smart phone hmang pha lo mi tam tak kan awm a ni.
Tin, Ambulance hman man hi a to uchuak hle maia, Zoram mipui tam zâwk hian kan hmang (Hire) phâk lo a ni. Mipui tam zâwkin kan ban tâwk chu Maxi Cab a nih avângin, chhiat/ṭhatniah a awlsam zâwka, mipui ten an hman theih nân All Mizoram Maxi Cab Permit hi sawrkar hian min pelêt leh se kan ti takzet a ni. Tin, Mizoram permit kan hmanlai khân duh duhnaah tlânkualin a service theih lohva, route hrang hrangah welfare a din vek avângin, mahni line/route-ah bâk chuan passenger a dawh theih loh a ni.
All Mizoram Permit pêk leh pêk loh chungchângah Sawrkar tân engmah HEKNA a awm hauh lova, chuvângin, All Mizoram Permit hi miretheite kan V.I.P titu Sawrkar hian min pelêt leh ngei se, kan lungâwi lohna hi tihtâwp a ni anga, kan Sawrkar chak tak chungah hian kan lâwm êm ëm tûr hi a ni a....
All Mizoram Permit min pelêt leh tûr hian vawi tam tak Sawrkar-ah ngenna kan lo thlen tawha, vawiin thleng hian ngaihsak kan hlawh loh avângin, mopui lakah inthlahrung tak chungin Maxi Cab hmanga eizawngtute hian lungawi lohna lantîr a lo ṭûl ta hi pawi kan tihle a, mipuite hriatthiamna pawh kan ngên tak meuh meuh a ni.
Tin, fare chungchângah hian hun kha lehchen kan lo kal tawhnaah kum hnih dana thil man to chhoh dân enin State Transport Authority (STA)-in rate hi a revise ṭhîna, kum 2014-a Disiel man 1 litre ₹46 a nih lai ang rate kha revise miah lovin, kum 2018 kan thleng chhova, hemi chhûng hian MMCOA Gen. Hqrs hruaituten rate revise tûrin vawiduai lo thuneitu hnênah an thlen/ngêna, Disiel man sang mai bâkah Zoram khawkâr kawng chhe lutuk vângte, Sawrkar-in rate a enpui lem loh Motor part man te, Insuarance mante a lo punga, Life time tax lâk a nih hnû phei chuan Motor neitute senso hi a sang uchuak ta êm êm a, tûn dinhmunah Sumo Brand New man hi ₹8.2 Lakhs vêl a ni tawh a ni.

Laldinliana Sailo_
Gen. Secretary
MMCOA
Post a Comment