MIZO FILM THINGTLANG TLANGVAL: Nizan khan Convention Center, Lunglei-ah mi tam takin an nghahhlelh em em, Thingtlang Tlangval film chu hlaphuahthiam Pu C Lalzarmawia'n a tlangzarh ta.
Tlangzarh inkhawm hi KC Lalthanzuali'n zei takin a kaihruai a, Pu PL Sanglura'n hunserh hmangin Director of Photography Pu C. Lalhmangaiha ( Mapuia Chongthu/Leitlang Pictures) chuan report a pe a, Film Director Pu @Malsawma Fanai (Mspace) chuan report leh lawmthusawina hun hmangin he film thawnthu (script) ziaktu Pu Malsawma Lailung chuan he filma a changtute leh a buaipuitute hnenah Memento a hlan nghal bawk a ni.
Hemi hnu hian Pu C. Lalzarmawia chuan tlangzarhna hun a hmang a, tlangzarhtu dinhmuna a ding chu ropui a tih thu leh Mizo film hrang hrang te chu ticket lei ngeiin a en thin thu a sawi a, mipuite pawh Mizo film hmasawn zel nan ticket lei ngeia en thin turin a chah a ni.
He film hi June 2018 atanga buaipui tan niin Screentest te neih a ni a, hmun hrang hrangah shooting neih niin 35% dawn hi Mizoram University-ah shoot a ni a, MZU a Mass Communication department te chungah film siamtute an lawm hle. Director Malsawma Fanai chuan "He film hi Kristian movie a siam tum a ni a, han kuai peng deuh mahse a laimu a thelh chuang lo," tia sawiin he film hmang hian Isua Krista lo langsar zual se a duh thu a sawi.
He film hi musical film tia sawi theih a ni a, tunlai college life a pholang chiang hle a, zirtir tha tak inphumruin a hmuhnawm a, he film a hla sak te pawh a mawi hlawm hle. Zanin hian Lunglei leh Aizawlah te mipui nawlpui en theiha chhuah a ni dawn a, hmun hrang hrangah a tah tawlin tihchhuah a ni zel bawk dawn a ni. - Gilbert Renthlei
Post a Comment