LUNGLEI DISTRICT CONGRESS COMMITTEE INTHLAN THUCHAH - TIMES OF MIZORAM

Breaking

Home Top Ad

Post Top Ad

LUNGLEI DISTRICT CONGRESS COMMITTEE INTHLAN THUCHAH

A hmasain Lunglei District mipuite LDCC hmingin chibai kan buk a che u. Kumin Mizoram MLA General Election 2018 lo awm turah hian hengte hi LDCC chuan Lunglei mipuite kan chah a ni.

1. Vote nei tawh leh nei thar zawng zawngte chuan kan chanvo hlenchhuaka vote thlak țheuh turin kan inngen a.

2. Lunglei mai ni lovin, kan ram hmasawnna tura thawktu tur kan thlang dawn a ni a, kan ngaihtuahna ril ber hmanga țha kan tih ber țheuh vote turin kan inbeisei.

3. Lunglei District ațanga MLA kan lo neih tawh zawng zawngte'n Mizoram leh a bik takin Lunglei tan hna tam tak an lo thawk tawh a, Party bil sawi lovin lawmthu kan sawi a. Kan MLA lo neih tawhte leh kan neih mekte khaikhin chunga vote thlak turin kan inngen a ni.

4. Lal Thanhawla kaihhruai Congress Party in sorkarna kan chan chhungin Mizoram mai nilovin, a bik takin Lunglei District chhunga hmasawnna tam tak kan hmuh te hre rengin vote kan thlak țheuh dawn nia. 

5. Party dang bei a, an Candidate-te sawisel ngawr ngawr hi kan tum a ni lo. LDCC in kan duh ber leh kan tum ber chu Lunglei District hian nasa takin hma sawn ila tih hi ala ni reng a, mipuite pawhin chu chu min hriatpui chunga vote thlak turin kan inngen a ni.

6. Congress Party chuan țhalaite tan kawng nasa takin kan hawng a. Kum 2008 ațanga vawiin thlengin kan Party-a senior-te MLA seat chan tuma lo beitute ticket kan pe ngawt ngai lo. Kan ram leh hnam tana țha tur țhalai, mipuite pawhin an it leh an awh rawnte thlangin Party Official Candidate an ni țhin. Țhalaite tana nasa kawng kan hawn ziate min hriatpui chunga vote thlak turin kan inngen bawk a.

7. A tawp berah chuan Congress Party-in sorkarna kan chan chhungin tih fuh tawk loh leh tih dik loh kan neihah Lunglei District chhunga mipuite Pathian hmingin ngaihdam kan dil a. Kan Party Manifesto-te leh kan Party Official Candidate-te min zirchian sak tur leh Dt.28.11.2018 a vote kan thlak hunah, kan Party Official Candidate-te khawngaih taka min vote pui țheuh turin LDCC chuan Lunglei District mipuite kan ngen nawn leh takmeuh meuh che u a ni.

Issued by
Communication Department
Lunglei District Congress Committee

No comments:

Post a Comment

Post Bottom Ad