PATHIAN RAWN CHUNGA VOTE THLAK TURIN ZORAM MIPUITE KA CHAH DUH A NI - Lal Thanzara
Aizawl North-III biala INC Candidate Pu Lal Thanzara chuan Ni 24.Nov.2018 a, Aizawl West-1 huamchhung, Ramrikawn-a Public Meeting neihah thusawiin, "kan hmalawka MLA thlanna kan neih turah Pathian rawn chunga vote thlak turin Zoram mipuite ka chah duh a, tun kan inthlan tur boruak thlir chung leh kan sakhaw lungphum sawinghin tumtute an lolan atang hian Synod in inthlan thupui leh thuchah atana 'Ram chu Lalpa ta a ni' tih an thlang chu chunglam hriattirna an dawn anih ngei ka ring" a ti.
Pu Lal Thanzara chuan, tun kan ram inthlan tur pawimawh zia sawiin kan ram leh hnam kan Sakhaw lungphum sawinghin tumtute an lo lang a, chung mite thil tum ber chu India ram hi Hindu rama siam leh hnam tenau culture leh sakhua nuaibo sak hi a ni a ti a. Kan ramah hian BJP mal chu an sorkar kher lovang, nimahsela BJP control theih leh thurualpui theih an sorkar hi kan hnam leh sakhua atana la pawi lutuk tur anih vangin kan hlau tur a ni, a ti bawk.
A sawi zelna ah Pu Lal Thanzara chuan, tun inthlan lo awm turah hian Congress leh MNF hi inbei ber kan ni a. MNF te hi tute nge an nih a, engtiangtaka BJP nen hian inzawm rukna nei nghet tlat nge an nih hi ngun taka kan chhut a ngai a ni. MNF te hi BJP nen hian inthlanah thawkho lo anga lan phet tum mahse, NDA leh NEDA ah an thawkho kal renga, henga an thawhho na hi an titawp ngamlo a, chuvangin MNF te hi BJP note, RSS, VHP, Bajrang Dal te nen hian thuhmun an ni a, Kan ram leh hnam, kan sakhaw tana an hlauhawm zia hi a inang reng a ni, a ti.
NEDA leh MKHC hi patla khata khai chi an nilo a, engtizawng maha khaikhin tum chi lah a ni heklo. Chutiang bawkin Bible Society leh NEDA hi khaikhin chi a ni chuanglo. MNF te hian hetiang zawnga insawifihlim an tum nasat zawh poh leh an mahni mawng an inhlim sang mai mai a ni tih i hria ang u. MKHC leh Bible Society bul leh tawp chu Isua Krista a ni a, NEDA bul leh tawp chu BJP a ni, thildang a awmlo. Chuvangin, kan sakhaw lungphum hi engtizawng maha a nghin lohna turin BJP thawhpui theih tur leh control theih tur chu tumah vote tlinglo turin Mizo mipui zawng zawng ka chahin ka ngen duh che u a ni, Pu Lal Thanzara chuan a ti bawk. ~ Lal Chhuana Renthlei
Post a Comment