HNAHTHIAL DISTRICT: Hnahthial District ti puitling ngei turin March thlaa Budget Session hmasa berah sum ruahmanna siam a nih tur thu Health Minister Dr R. Lalthangliana’n a sawi.

Mizoram District Thar Hnahthial

Assembly Inthlanna a South Tuipui bial atanga thlan tlin a nih hnu a Hnahthial khua a tlawhna hmasa berah Dr. R. Lalthangliana chuan district tih puitlin a nih dawn avangin Department hrang hrang office te ruahman turin chak taka hmalak a nih tur thu a sawi a. Kawng hrang hranga hmasawn zel tura a vei zual te tarlangin Minister chuan inkalpawhna tha (Physical Connectivity) leh inbiakpawhna tha (Digital Connectivity) lamah te hmasawn tur tam tak kan la nei a ni, a ti a. Hemi kawnga hmasawn zel turin sawrkarin chak taka hma a lak tur thu a sawi. Ram hmasawn tur chuan Minister leh mipuite an inpawh that a tul a ni tiin Minister chuan bial leh ram hmasawnna tura rawtna an neih te sawi hrehlo tur leh thurawn te pe fo thin turin mipuite chu a sawm a. Sawrkar duan Plan leh Project reng reng tha taka zawh a nih theihna tur leh sawrkar langtlang leh dik siam a nih theihna tura tan lak a ngaih pawimawh thu a sawi. 

HNAHTHIAL DISTRICT MARCH THLAAH SAWIHO DAWN - HEALTH MINISTER DR. R LALTHANGLIANA

Socio-Economic Development Policy (SEDP) chungchang pawh sawilangin Minister chuan he hmalakna in a tum ber chu ei leh bara intodelhna, vantlang nun tha, mipuite hlimna leh ngelnghetna siam a ni, a ti a. SEDP chu Policy huam zau (Comprehensive) tak niin Department zawng zawng a huam thu sawiin he Policy kaltlang hian thil siam chhuahlama hmasawnna, sumdawnna, mihring theihna tihpun, mipui dinhmun dawmkan, hmasawnna ruhrel siam kawngah te hmalak a nih tur thu a tarlang a ni. 

Minister hian Lunglei khawpui tlawh nghalin Lunglei Civil Hospital-a CT scan khawl, Blood Component Separator Unit leh ward hrang hrang te, Trauma Centre ruahmanna tur hmun te, Staff Quarter sakna tur hmun te leh CMO Office-te tlawh kualin Health & Family Welfare Department official-te nen hmalakna kal mek leh hmachhawp hrang hrang te an sawiho a. Health & Family Welfare Department a thawktute hnenah fuihna thu sawiin Minister chuan an hna chu rawngbawlna pawimawh tak a ni tih hre reng chunga damlo enkawl hna chu hmangaihna leh inpekna thuk tak nen kalpui thin turin a chah a. Damlo enkawl chu mihring nunna chunga rawngbawlna a nih avangin rui chunga damlo enkawl lo tur leh zuk leh hmuam leh ruih theih thil laka fihlim turin a chah a ni. - DIPR

Post a comment

Powered by Blogger.