MINISTER DR R. LALTHANGLIANA HNAHTHIALAH
Vawiin khan South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chu PWD IB, Lungleng Hnahthial tualzawlah khawtlang mipui leh sawrkar Department hotuten an hmuak.
He hunah hian South Tuipui Assembly Constituency atanga thlan tlin Dr R. Lalthangliana chuan a beisei phak baka mipuiten an lo hmuak chu ropui a tih thu sawiin Pathian leh mipuite duhsakna zarah thlan tlina a awm leh Minister dinhmun pawimawh tak luah thei dinhmuna a ding chu lawmthu a sawi a. Mizoramin Chief Minister tha tak, hmathlir zau tak nei Pu Zoramthanga kan nei leh Council of Ministers lakluh ni a hun danga la tih ngai loh Halleluiah Chorus rem chunga, kohhran pastor-in tawngtaina nena hlan chunga hun hman a ni kha ropui a tih thu a sawi a.
Socio-Economic Development Policy (SEDP) tum ber chu ei leh bara intodelhna, vantlang nun tha, mipuite hlimna leh ngelnghetna siam a ni - Minister Dr. R Lalthangliana
Hnathial District ti puitling ngei turin March thlaa Budget Session hmasa berah sum ruahmanna siam a nih tur thu tarlangin Minister chuan Department hrang hrang office te ruamhan turin chak taka hmalak a nih tur thu a sawi a. Kawng hrang hranga hmasawn zel tura a vei zual te tarlangin Minister chuan inkalpawhna tha (Physical Connectivity) leh inbiakpawhna tha (Digital Connectivity)lamah te hmasawn tur tam tak kan la nei a ni, a ti a. Hemi kawnga hmasawn zel turin sawrkarin chak taka hma a lak tur thu a sawi. Ram hmasawn tur chuan Minister leh mipuite an inpawh that a tul a ni tiin Minister chuan bial leh ram hmasawnna tura rawtna an neih te sawi hrehlo tur leh thurawn te pe fo thin turin mipuite chu a sawm a. Sawrkar duan Plan leh Project reng reng tha taka zawh a nih theihna tur leh sawrkar langtlang leh dik siam anih theihna tura tan lak a ngaih pawimawh thu a sawi a.
Socio-Economic Development Policy (SEDP) chungchang pawh sawilangin Minister chuan he hmalakna in a tum ber chu ei leh bara intodelhna, vantlang nun tha, mipuite hlimna leh ngelnghetna siam a ni, a ti a. SEDP chu Policy huam zau (Comprehensive) tak niin Department zawng zawng a huam thu sawiin hePolicy kaltlang hian industrial development, sumdawnna, mihring theihna tihpun, mipui dinhmun dawm kan, hmasawnna ruhrel siam kawngah te hmalak a nih tur thu a tarlang a ni.
Minister hian Hnahthial Sub Division Hospital, Industries Department Cane & Bamboo Craft Training Center, AH& Vety Office, Department of Trade & cvommerce Market Shed leh Government Hnahthail College te tlawhin Hnahthial District ti puitling tura hmalak tul hrang hrangte official-te leh khawtlang hruaitute a sawipui a. Minister hi Pu J. Hmingthanmawia, Director Commerce & Industries, Dr H. Lalchungnunga, Director, DHS leh Dr T.Lalhmangaihi, Director, DHME leh Lunglei District officials ten tawiawmin hmachhawp hrang hrangte an thlir ho.
Vawiin vek hian Hnahthial Electric Veng Hall-ah Sawrkar thar Pathian hnena hlanna leh lawmthu sawina programme hman niin sawrkar official leh mipui thahnem tak an kalkhawm. - DIPR
Post a Comment