Krismas InbuatsaihnaKristiante hunpui Christmas lawm tura inbuatsaihna chuan a vawrtawp a thleng chho a, vawiin khan Krismas hmaa inrinni hnuhnung ber chu mahni mahmawh hrang hrang lam khawmna atan hman a ni a,  Aizawl khawpuiah chuan, bazar-ah pawh mipui an tam hle a, hetihlai hian Bara Bazar Israel Point hardware dawr pakhatah kangmei a chhuak a, mi pakhat a hliam a, mihring tawrhna nasa lutuk a thleng lo a, kangmei pawh hi tih mih nghal a ni.

Hmun hrang hrang atanga kan corr. te atanga thudawn danin kumin hian kumdang aiin Bazar a lun har deuh a, tunkar chho atang erawh chuan Thingtlang atanga Bazar turten Aizawl an pan khawm tan a ni.

Lawngtlai a kan corr chuan, Lawngtlai khawpui chhung bazar te a lun hle tih tih sawi a, an District ah hian, khua 158 vel awmin, district chhung khaw thenkhat chuan Siaha lamah chakkhai an lam a, a tam zawk chuan Lawngtlai ah Krismas mamawhte an lamkhawm a ni Lawngtlaiah chuan Kumin Christmas lawm tur hian Kohhran hrang hrangte pawhin ruahmanna an siam fel tawh a, Biakin te a theih ang anga cheiin, ruai atana ran talhturte pawh an ngaihtuah fel deuh vek tawh, Lawngtlai District chhunga khaw thenkhat ah chuan Krismas leh Kumthar lawmna mimal ina nghah an la uar hle a, Kohhran engemawzat chuan Sadar lak a Christmas leh Kumthar thleng tu tifel in, chutianga kalpui thinte chu sawi tur an la awm nual ani.

Mamit ah chuan mipui ten him leh hlim taka an bazar theih nan Mamit SP pu Shashank Jaiswal chuan Mamit bazarveng leh a panna kawngte chu No Vehicle Zone ah a puang.

Mamit SP chuan Mizoram Vehicle Act of 1988, section 115 in thuneihna a pek ang in Mamit Bazarveng leh a panna kawng, High schoolveng Traffic point atranga Bazarveng thleng leh Charkawn atranga Bazarveng thlengin ni 22 leh ni 24 ah te zing dar 6:00 a.m. atranga dar 10:00 a.m inkar chu lirthei eng chi mah kal phal lohna "No Vehicle Zone" ah a puang.

Nimin khan Mamit Venghlun Branch YMA te chuan an branch huamchhung a kum upa, damlo leh mi chanchaite hnenah Krismas thilpek an hlan.

Mamit Venghlun Branch YMA chuan Krismas pualin Charity buaipuitu bik committee an din a, an ni hian sum an thawhchhuah bakah tanpuina bawm an hung bawk a, chumi a tlingkhawm atrang chuan an vengchhunga kum upa lam/kum 80 chin chunglam mi 18 hnenah puanbah lum an pe a. An veng chhunga mi chanhaite leh damlo mi 20 te hnenah Krismas thilpek atan pawisa fai an hlan bawk a ni. - (CORR & PTCs) 

Post a comment

Powered by Blogger.