ZOFEST 2018 - REIEK MIZORAMMizo Zirlai Pawl (MZP) General Headquarters-in kum 2 dana a buatsaih thin, khawvel hmun hrang hranga Zofate inkhawmpui lian Reiek Zo Inpui-ah neih a ni a, nimin a ni hnihna kha Planning Secy. Dr. Vanlalramsanga leh Central YMA President Pu Vanlalruata te’n an hmanpui.


Dr. Vanlalramsanga chuan khawvel hmun tin deuhthawa cheng Zofate’n an inunauna an chhawm nung tha hle chu thil lawmawm tak a ni a; mahni luah chin ram theuh humhalh thaa luahlum zel chu Mizo hnam humhalhna a ni, a ti a. ‘Zo’ tih chu thil duhawm, mawi, nalh leh tha sawi nana hmang uar deuh deuh tur leh thil ‘thing’ sawi nana hmang tawh lo turin kalkhawmte a chah a. Inunauna leh inlungrualna tel lo chuan ZOfate tan insuihkhawm a theih ngai dawn lova, hmasawnna hmangin insuihkhawmna kawng zawh nise, rilru dik, sakhaw dik, rinawmna leh taimakna nen insuihkhawm leh zai rel turin Zofest palai kalkhawm te a chah bawk.

Central YMA President Pu Vanlalruata pawhin khawvelah hian tam a pawimawh em em a, khawvelah hnam anga hriat hlawh tur leh dam khaw chhuak turin Zofate chu an insuihkhawma an tanrual a ngai a ni, a ti a. Zofate chu hnam ziarang leh incheina te uar sauh sauha an chenna theuhah rinawm taka awm a, puih an ngaihna apianga inpui tawn zel turin a chah a ni.

ZOFEST 2018 - REIEK MIZORAMOrganising Committee Chairman Pu B. Vanlaltana pawhin thu sawiin, Mizo bik an awm lova, Zofa chi peng hrang hrangte inzawmkhawm chu Mizo a nih avangin tumah inkiltawih tur a ni lova, an in unauna chu thisenah zawk a ni, a ti a. Mizoram chu Zofate Jerusalem a nih avangin Zofa zawng zawngte intineitu taka awm turin a sawm a ni.

Zofest thupui atan ‘Unau Kan Ni’ tih hman a ni a; Myanmar, Bangladesh, Manipur, Tripura, Arunachal Pradesh, Assam leh Mizoram chhung hmun hrang hrang atangin an palai an kalkhawm a ni. 

Source - AIR Aizawl

Post a comment

Powered by Blogger.