CHANCHINBU MITE HNA MINISTER IN A SAWINAWN



I&PR Minister Mizoram"Chanchinbu mite chu sawrkar khalh ngiltu, sawisel huna sawiseltu, zilh huna zilhtu an ni" - Lalruatkima, Minister, I&PR

Press/chanchinbu mite hi democracy kan tih mipuiin kan aiawha rorel tura kan mi duh kan thlannaah hian an pawimawh em em a. An tello hian democracy hi a nih tur angin a hman theih loh a, amaherawhchu chanchinbu mite hian an mawhphurhna pawimawh tak hi an hlen dawn chuan sorkar lamtang nilo, sorkar do nilo thudik mipuiten an hriatna tura thupuangtu an nih a ngai a ni. Chumi tello chuan press lam hi sorkar propaganda khawl mai a ni. Congress sorkar kan namthlûk tâk khan thil tha tam tak a ti a, thil thalo tam tak pawh a ti bawk a. A thil thalo tiha pawithui ber zinga mi chu democracy hrisel tak kan neih theihna tithuanawp zawnga NLUP pawisa cheng nuai 1 theuh journalist thlanchhuahte leh an nupui te hial pawh a pe kha a ni. Hemi chungchangah hian Sports Minister hlui Pu Zodintluanga hian mawh a phur nasa hle a. A department chan UD&PA atanga kha mipui sum kha journalist leh list lote hnena pek a ni.

TUALCHHUNG CHANCHIN - I&PR MINISTER LALRUATKIMA (News Commentary)

A awmzia chu sorkar sum khan Congress sorkar khan journalist te kha a "lei" a, thenkhat chuan sorkar khalhngilna lam reng reng an ziah kan hrelo reng a ni. Hemi chungchangah chuan kan chanchinbu darhzau ber Vanglaini enkawltu pawimawh tak tak te pawh hi an fihlim lova, an thuchhuah leh chhuah lohah te kan hmu thiam thei awm e. Saptawngin sawi ta ila, kan press mite tam zawk hi "compromised journalist" an ni a. Pu Pasiama Darngawn phei chuan sorkar watchdog ni tur kha sorkar lapdog ah an inchhuah a ti hial a ni.

Kan I&PR Minister thar thusawi hi thudik a ni a. Mahse, eng sorkar mahin hetiang hian press mite hi hnathawk turin an duhlo tih kan hriat a pawimawh awm e. Tuna a sawitu ngei pawh hian duhloh chin a nei hma ang tih a rintheih a ni. Tunge mahni diklohna hailansak duh awm le, tiraw?

Sorkar hruaitute hi mihring ve tho an ni a, chaklohna tinrengin a bawm ve te tho an ni. Chuvang chuan tihdik vekloh chang an nei tur pawh a ni a. Amaherawhchu, an tihsual hi mipuiin kan hre tur a ni ang. An tih dik kan hria ang chiahin.

Engtinnge an tihdikloh te chu kan hriat theih ang? An inpuan kan nghak dawn emni? Nghah chi a nilo tih kan hre theuh anga, mipui hriat tur thil pawimawh te hi sorkar hotuten an hupbeh thin avangin press mite an pawimawh ta reng a ni.

Huaisen takin sorkar hotute hi zawhna an zawt ngam thin tur a ni a. An chhang emaw chhanglo emaw mipui nghawng thil a nih chuan, Pu Hriata Chhangte sawi danin, an "zîmtâwt" thin tur a ni. Chu chu accountable-a Minister leh MLA te kan siamna a ni a. Journalist hote hna a ni.

Sorkar hmasaah khan a zawp hian an zawp deuh vek a, tlemazawng tha tak tak tih loh chu. Tun sorkar ah hian kan chanchinbumite hi I&PR Minister sawi ang ngeia sorkar khalhngiltu an nih theihnan tan han la sauh sauh se a tha khawp ang. A nih loh chuan "facebook journalist" hovin an hmun hi an luahlan thuai thei a ni.

Post a comment

Powered by Blogger.