Kum 2017 khan Mizoram Rimawi Khawvelah hnuhma thar diai kan hmelhriat thut a! Tsunami tuifawnin Thailand vaukama chawlh hmangtute, inrinlawk hman ngaihna awm miah lova a chingphar ang maiin Zoram ţhalaite chu he rimawi hian ki dang dangin a fan chhuak zung zung mai a ni!
Chuti taka huhâng ngah zaithiam chu tudang ni lovin Vaivakawn tleirawl Kimkima an tih mai hi a ni. A music video chhuah hnulawk aţangin Zoram khawvel hmun hrang hranga tleirawl, driver, muţia, dawr nghaktu, college naupang leh University zirlai bakah chhûngte’n nupui nei tawh tura an tür kum tin tlangval phanchang tawhte thlengin, ‘Ka bialnu ni rawh’ an ti ta dual dual a.
Veng khat huam chhûnga an duh lo chunga ringtu hmasa nihna an pêk nula hmai chuar ţan mekte lah chuan, 'I hmelţha ka ti’ an tih mawlh mawlh laiin veng laili leh veng hmawr lamah ve thung chuan, 'I sang sang sang sang i sâng em mai’ tia lo thle ngawih ngawih tawk lah bo bik hek suh! Veng kilkhata vanglai hmang liam ţan titih tawhte lahin, ‘Ka zei zei zei, ka zei an ti ţhin’ tia inhnem tawk bo hek suh!
A hla thu a hoh tehreng nen a thlûk zawkah zûn a kai chiai a. Mizo hla kan lo ngaihthlak tawhte ang lo takin Kimkima hla thlûk chu a dangdai tlat a ni. Hlarua (hla thu) pawha a hla rem lovin Prose (thu ziak pangngai) hmangin a hla thu a chhep zui lehnghal a! Mi tam tak tâna ho riaua a lanna taka chu a ngaihnobeina, a ngaihzawnawmna leh lung tikuaituah a chang ta tlat si a ni!
A hla thlûk nena inrem êm êm turin hla a phuah thiam tlat a; leili hian vawi khat lam rikah a ngaina nghal a, thinlungin vawi khat ngaihthlaknaah saphai nghalchang zem ang maiin min man nghet nghal hmiah mai a ni. Chu mai piahlamah Kimkima inchei dan (fashion) leh hmel mawlh mai chu! Vai nula chhe lo tak tak rualin Miss Contest an hmachhawn laia an zinga anmahni anna pakhatmah nei lo, Korean nula a rawn tel ve hlawl ang mai hian Kimkima chuan mit khawhmuh a rubo zo a ni ber!
A hla pakhatna kan saktui mek lai rengin a hla hmasa ber aia lungkuai leh romantic lutuk tak maiin, ‘Sarah, i zûnzâm a ni’ tiin Zoram mipuite min han awih chhunzawm zet chu! Kawi tinah hian Sarah-i aia nula to leh hming lam hlawh he Zoram khawvelah hian tu nula mah an awm thei tawh lo! Tun ţum zet chu naupang lehzual, kum 12-10 chin pawh kil khatah an lo Sarah ve hlat hlat zel nia maw le!
He Sarah hla thlûk mil zet maia ţingţang thai ri, fan del del chunga fiak fâk, lungkuai vawng vawngtu vang ringawt pawhin he hla hi hriatchian hma hauhin a ngainatawm nghal nia! Mizo zaithiamte zinga hmangaihna ngen vawng vawngtu Lalţanpuia Tochhawng hmang ngeiin, ‘Fâm Ţanpuia’n chhaktiang kawl êngah khian, hmangaihna zûnzâm a awm lo’m ni’ a han ti kuai raih mai chu (h)!
Mihring thinlung chhûngril bera Siamtu’n a dah, hmangaihna inţham er er awm ţhin, hmangaih tawng kher lo emaw hmangaihna avanga hliama awm tawh emaw hmangaihna kutsuihtute thlengin, mihringa phûrna thuk ber a zuk kai harh ta a ni! A hla thlûk ringawt pawh tawrh tham a tlin tawh tehlul nen a hla thu lungkuai lutuk tak mai chuan mi tin min vel ta a nih hi!
Kimkima hian ama hla thlûk dangdai tak chu a âw thâm tliang mawi tak hmangin a rawn tum rem no lehzel a. A naupanna âw leh a hla thu thianghlim tak maite chu ruahsur leh ruahsur bana chhimbal ang maia inchawih mawiin kan duh lo chung min vel a, nawmna thlarau min chantir ta a nih hi! Sarah-i hmu châkin hmun tina mite chuan zawn ka nei ta ruai vek mai a ni!
Chutah, Sarah aia hla thlûk nêm leh lungkuai zawk phuah ngaihna a awm tawh lovanga kan tih rauh rauh laiin, 'I zûngngaih lunglên vang hian maw’ an ti leh ta hnap mai a! A hla thu a hoh zawh poh leh a nalh ting emaw tih mai tur a ni tlat zel hi Kimkima danglamna bik chu a lo ni.
Kimkima hian a naupana phu lovin hla thu mawi tak taka rem chhuah a nei a. He khawvelah hian hmangaihna a awm ngei zia sawi nân - A awm ngei e mual tin kil tin thlengin, a han ti zaih maite hi a nalh dangdai ta tlat a. Mipate hnehtu hmeichhia, a eng lai ber nge min hnehtu tih sawi har tak maite lah chu - A ţhat mawinain min hnem êm a, tiin a rawn fun kim thiam ngang mai a nih hi!
Inngaihzawnna nunah chuan thinlung natna hi khel lova awm ziah a nih laiin Kimkima hian - Thinlai a nâ ka nautê, tiin a nat dan turzia a tarlan rual chiahin suangtuah pangchanna lo lang hnem châkawmzia hi i man thiam em? Bialnu bialpate chunga lungawi lohna lo thlen chhan hrang hrang a awm ţhin ang bawkin Kimkima hian - Val dang vanga luaithli nûl hi, tiin ngaihnobei zetin a han titau thiam lehzel a!
A dinhmun dik tak a nula hnenah hrilh chiam duh mah se, huapzo hrilhfiahna tawi mawi zet siin -Ka nâ duh tawh lo ka nau tê, tia a han phuah thiam ta maite hi! Tukhaw kha hriat hauh lo Adel-i chuan amah la phuah leh style ruahţham loh ngatin khawvel mipuite min awi tawh a. Idol leh Icon star ţhenkhat, an han lar chho dawn ek eka mi hla hlui sak lâr tawhsa tlema her danglama an han sa ve chawm ang mite tân chuan hlawhtlin a har tluk zetin Kimkimate anga mite ngaihven hlawh nih phak hi chu a har kumkhua ngei ang le.
Post a Comment