CHAMPHAI DISHA: Vawiin khan Champhai District chhunga Central sawrkar sum hmanga hmasawnna hnathawh programme 28-te enzuitu Committee; District Development Co-ordination & Monitoring Committee DISHA chu an Chairman Pu CL Ruala, Lok Sabha MP hovin an thukhawm. Meeting-ah hian Co-Chairman Pu Ronald Sapa Tlau, Rajya Sabha M.P, MLA Pu Ramthanmawia leh Champhai DC Dr Naveen Aggarwal, te pawh an tel a ni.
Pu CL Ruala chuan Lok Sabha term a lo tawp dawn tawh avangin a tan chuan DISHA Chairman anga hun a hman hnuhnung ber anih tawh dawn thu sawiin, tunhma kum 10 kalta chhunga District Official-te tawiawmna leh thlawpnaah lawmthu a sawi a. Chairman thar an lo awm hunah pawh lungrual taka ram leh hnam tana thawk tlang zel turin a chah a. Sawrkar hnathawkte chu Sawrkar inthlak chang awm mahse an danglam ve loh avangin an kutah District mai bakah Mizoram hmasawnna a innghah tlat thu leh rinawmna, taihmakna leh huaisenna thinlungpu chunga hnathawk thin turin a fuih bawk a ni.
Co-Chairman Pu Ronald Sapa Tlau pawhin thusawiin, Chairman kalchhuak mai tur hnuaiah District hrang hranga sawrkar laipui kaltlanga hnathawhte chak taka enzui thin anih thu a sawi a. Ram leh hnam tana theihtawp lo chhuah thin tawhtu Pu CL Ruala chu a kalzelna turah duhsakna a hlan nghal a ni.
Meeting tarlan dan chuan Rural Development hmalakna MGNREGA hnuaiah kum 2018-2019 chhungin Job Card holders 28865 hnenah ni 82 inhlawhna siam sak a ni a, hemi hun chhung hian cheng nuai 6139.41 hmangin hna 719 kalpui a ni. April 2017 atanga kalpui tan Pradhan Mantri Awaas Yojana-Gramin, PMAY-G hnuaiah beneficiary mi 146 te hnenah insak tanpuina pek niin, In 127 sak zawh tawh a ni a. District chhungah Integrated Watershed Management Project (IWMP) pasarih kalpui mek a ni a.
MGNREGA hnuaiah hian Champhai leh a chhehvelah DRDA Champhai, Institute of Bioresource Technology, Himachal Pradesh leh Horticulture Dept-te nena thawkhoin Apple Plantation Programme kum 2015 tang khan neih a ni a, Apple rah hmasa te chu Palampur-ah enchhin tura thawn tawh niin, a that thu tarlan ani bawk.
Heng bakah hian CSS hnuaia hnathawh hrang hrangte sawiho a zirchianna neih a ni a. ~ AIR Aizawl
Post a Comment