CHANCHINTHAR LANGSAR: Vawiin khan Horticulture Deptt Lunglei buatsaihin Centre of Excellence for Fruits(CoE) Haulawng-Saichho hmun atanga a bika Tomato chindan zirtur a thlan chhuah chhungkaw 5 te thar chhuah Tomato hralh chhuah a ni a, loneitu te hian qtl 35.5 thar chhuakin cheng nuai 2 leh sing 8 chuang hu a ni.
Lunglei DHO L. Lalhmingmawia Pachuau chuan CoE atanga Tomato thar chhuahte hi lei tih thatana chemical hmanglo Organic dik tak leh thlai natna in a bawm loh an ni tih sawiin Indo-American hybrid chi tha mi Bangalore atanga lak an ni a ti.
Heng Tomato te hi CoE hmuna loneitu thlan bik chhungkaw 5 ten thla 5 chhung Training nei a an chin a ni a, tunah hian Quintal 35.5 thar tawh niin, cheng Nuai 2, sing 8, sang 4 man hu a ni. Lungleiah Tomato rate kg ah 80 a nih laiin CoE atanga thar chhuahte hi a hmunah Kg khat cheng 60 zela pechhuakin Bazarah cheng 70 in an zuar dawn a, Tomato hralhna mante hi a enkawltu CoE a training lai ten an chang vek dawn a ni.
DHO Lalhmingmawia Pachuau chuan CoE bakah hian Maudarh a Horticulture Deptt farm-ah tunah hian Tomato bul 1650 enkawl mek a nih thu sawiin heta tanga tharchhuah a awm hunah CoE ami nen inchawm tawnin Lunglei khawpui chu Tomato a chawm theih ngei an tum tih a sawi.
Heibakah hian Serthlum pawh Lunglei Dist-ah nasataka thar chhuah a ni tih sawiin Serte, Thingfal leh Thingsaiah te pawh mimalin cheng Nuai 2/3 man an thar chhuah thu leh heng kuthnathawktu te hi Deptt. chuan a hmunah kal-chilhin anmahni kawmna te pawh an nei vek tawh tih a sawi a, thlai thar chhuahsa dahna leh venhim nan CoE-ah hian Cold storage sak mek a nih thu a sawi bawk.
Kum kalta lama loneitu ten an lo chin tawh Dragon Fruit pawh a puitling chho tan mek tih sawiin kung 1620 vel tunah hian a nung mek a ni. (Lunglei PTC)
Post a Comment