Tourism Minister Pu Robert Romawia Royte chuan Reiek Tlang leh a chhehvela Tourism Department hmalak mekte leh hmalak zelna tur hmunte nimin khan a tlawh a. Chief Secretary Pu Lalnunmawia Chuaungo leh Official dangten an tawiawm a ni.
Minister chuan Tourism Department-in "Zo khua" a Zo In a sak mekte, Zipline 2 a siam mekte leh Adventure Sports tihna tur hmunhma a siamte chu tlawhin Contractor-te chu hna tha taka thawk tur leh Zo Khua chu fur ruah tlak hma ngeia sa zo turin a ngen a.
Reiek kham leh a tlang awm dan chu khawvel hmun danga awmte hmuh chak tur chi a ni tih sawiin "Reiek Tlang chu Tourist te hipna hmunpuiah siam an tum," tih a sawi a. "Reiek kham ko sang tak atanga filawr chhuaka kea kalna siam a nih chuan khawvel huap pawha lar leh tlawhtu nghah Kuala Lumpur Tower aiin a sang dawn a ni” a ti.
Chief Secretary Pu Lalnunmawia Chuaungo pawhin Reiek khua chu mi tam takin an tlawh thin tawh thu sawiin ruahmanna mumal tak siama hmalak a tul thu a sawi.
Tourism Minister in Reiek tlang a fannaah hian Chief Secretary leh Tourism Department hotute bakah Reiek Village Council Member-ten an tawiawm a, Minister hi Reiek MUP te, Reiek Branch YMA leh Reiek MHIP ten lo lawmin kawmna hun an hmang nghal bawk a ni.
Post a Comment