Mizoram Electorol Roll 2019 Tlangzarh - TIMES OF MIZORAM

22 Feb 2019

Mizoram Electorol Roll 2019 Tlangzarh

Mizoram Electorol Roll 2019 TlangzarhChief Electoral Officer Ashish Kundra chuan vawiin khan Final Electoral Roll tlangzarhin, Mizoram pumah Vote nei mi nuai 7 sing 8 & 4405 an awm a, Vote nei thar mi 14,032 thun thar an ni. 

Kumin January ni 1 behchhana final special summary of roll tlangzarh takah hian vote nei thei Mipa 381991 an awma, Hmeichhia vote nei 402408 an awm meka, mipa leh hmeichhia vote nei inthlauhna hi 20417 a ni. 

CEO Ashish Kundra chuan inthlanna hmun polling station 11 siamthar anih thu pawh sawiin Kolasib ah pakhat, Aizawl ah 3, Lunglei ah 3, leh Lawngtlai ah 4 siam belh anih thu a sawi a. Tunah hian kum18 tlingthar atangin vote neitura thunthar chu za-a 97 an awm bawk tih a sawi a ni.

CEO chuan Election Commission chuan thil thar a hmachhawp zingah Universal helpline siam a nih thu a sawi a, District tinah phone number 1950 ah inthlan leh a kaihhnawih chungchanga hriatduh leh hriatchian ngai te zawh theih tura chhawpchhuah a nih thu leh Voters Helpline pawh siam a nih thu a sawi a, phone atanga thil tul tih fel na tur siam a nih thu a sawi bawk. February Ni 25 atang hian Deputy Commssioner te kohkhawm tur a ni a, hetah hian inthlan lo awm tura inpuahchah dan tur sawiho leh rel a ni ang. Ni 26 atanga ni 28 hian Deputy Commissoners tan Training koh a ni bawk a, heng bakah hian EVM hman chungchanga hriat ngai leh tul te inhriattirna neih a ni bawk ang. 

EVM chungchang ah hian CEO chuan an experience atangin hmun kilkhawr zawka khawl chhiat theihna hmun bikah khawl dang chhawp a nih tur thu a sawi bawk a, khawl chhiat tawh thu ah, sector officer ten hmun hla leh hmun dang atanga khawl lak luh a ti awlsam dawn zawka hriat anih vang a nih thu a sawi a. Inthlan lo awm taa khawl chhia te pawh company ah thawn a nih tawh thu leh enfiah a nih tawh thu a sawi a, kar leh velah chuan khawl te hi lo thleng thei tura an beisei thu a sawi bawk.

Pu Ashish Kundra chuan Bru changchangah Lok Sabha inthlan tur chungchangah ECI atangin hriattirna la dawng lo mahse Bru te'n Mizoram chhung ngeiah vote an thlak leh a rin thu a sawi a, Bru-te atangin vote thar nei an awm leh awm loh chungchangah CEO chuan form thehluh thar chu a awm ngei thu leh tun dinhmunah enfiah leh enfel mek an nih avangin a thar an awm leh awm loh thu a sawi thei lo a ni.

Electoral Roll Thar berah hian Aizawl District-ah chuan vote nei thei zat hi 5307 in an punbelh a, a punbelhna hi zaa 1.83 a ni. 

Election Commission of India-in ruahmanna a siam angin, Final Electoral Rolls, 2019 hi Recognized National Party leh State Political Party te hnenah a thlawnin a copy pek an ni. Aizawl District huam chhunga Assembly Constituency 14-ah Polling Station 331 a awm a, chawh rualin Polling Station pakhat zelah Elector 890 awm ang an ni. Electoral Roll-a lut tharte chu a thlawnin EPIC pek vek an ni dawn a ni. 
Assembly Constituency pasarih awmna Lunglei District ah chuan voter nuai 1 & 6,627 an awm a, mipa – 53010, hmeichhia – 53617 an ni. Vote nei thei zat hi 1552-in an pung a, a punna hi zaa 1.48 a ni.

Champhai District-ah chuan Assembly Constituency 5-ah Vote nei Mipa 42690 leh Hmeichhia 43688 an awm a. Vote nei zawng zawng hi mi sing 8 & 6378 niin, Mipa aiin Hmeichhe voter 998 in an tam zawk a ni. District chhungah Polling Station 137 awmin, Polling Station 1 ah voter 630 awm zel ang a ni a. Kum 18-19 inkar vote nei mi 5711 an awm bawk a ni. 

Serchhip District ah chuan voter sing 5 & 153 awmin an zinga 24,679 chu mipa an ni a, hmeichhia hi 25474 an ni bawk.Serchhip Assembly bial pathumah mipa aiin hmeichhe voter an tam zawk vek a. District pumpuiah Service Voter 343 an awm a, an zinga 341 hi mipa niin hmeichhia 2 an awm bawk.

Kolasib dist pum a vote neih zat chu sing 5 & 8549 an ni a, Service Voter 385 te hi Epic Card hi Voter zawng zawng ah pek vek an ni. Kolasib District ah hian Constituency 3 awm in Polling Station 81 a awm a. Voter zat hi 998 in an pung a, a punna hi zaa 1.73 a ni.

Mamit district chhungah chuan vote nei thar mi 1698 awm in, tunah Mamit district chhungah vote nei mi sing 6 sang 6 & 456 an awm mek a ni.

Vawiin a Mamit district Electoral roll 2019 tlangzarh atanga alan danin kumin kumtir January ni 1 a kum 18 tling chin te nen vote nei thar mi 1698 an awm a, amaherawchu roll a awm tawh paih leh mi 727 an awm bawk avangin roll punna hi mi 971 a ni a, hei hi za a 1.48 a pung ang a ni.

Lawngtlai District-ah chuan a pumpuiin vote nei mipa 40986 leh hmeichhia 41293, an vaiin mi sing 8 & 2279 an awm a; electoral roll thar berah hian vote nei thei 2054 in an pung a, a punna hi zaa 2.6 a ni.

Lawngtlai District final roll-a hming chuang zawng zawng hian Elector's Photo Identity Card (EPIC) an nei vek a ni. 

Siaha District pumpuiah vote nei thei sing 39522 an awm mek a, chu ta voter 20289 chu hmeichhia niin, mipa voter zat chu19233 a ni. Siaha district pumpuiah vote nei thei 1062 in an pung a ni. ~ AIR Aizawl

No comments:

Post a Comment