SERLUI BIAL IN HMANGAIHTU KAN NEI VE TA - TIMES OF MIZORAM

19 Feb 2019

SERLUI BIAL IN HMANGAIHTU KAN NEI VE TA

Kan bial Serlui hi Mizoram tana hmun pawimawh leh tangkai em em a ni. Ramri depa awm, Assam nena inrin mai kan ni. Hmun pawimawh leh tangkai tak nimahse ngaihsak kan hlawh tawk lo hle thin. Mahse tunah chuan hmangaihtu dik tsk, neitu rilru pu kan nei ta. Chu chu tudang nilovin kan bialtu MLA Lalrinsanga Ralte hi a ni.

Mizoram Fire and emergencyHun reitak atang khan kan bial hian Fire Dept, Motor kan mamawh hle a. Kangmei a chhuah a, harsatna kan tawh hian Lailapur atangte in Fire Motor hi kangthelh turin a lokal fo thin a. Hei hi a bialchhung mipuite mai bakah Mizoram ang pawhin a mual pho thlak hle a. State dang atanga Mizoram a kang thelh tura kang thelh lo kal thin hi ngaihtuah chian poh leh a rilru natthlak hle a. Bial chhung mipuite harsatna hriain kan bialtu MLA Pu Lalrinsanga chuan MLA a tlin tirh atangin theihtawp chhuahin hma a la nghal a. A hmalakna a zarah Fire Dept Motor, staff telin chuan vawiin khan Vairengte-ah bu an rawn khuar ta. Bial dang tan hote angin lang mahse keini tan chuan lawmna a va tling em!!

Tin, Ramri depa awm kan i tih hretu MLA kan nei hi a lawmawm hle mai. A hmalakna a zarah Phaisen ah pawh Outpost Kan nei thuai dawn a. Tunah hian hemi atan hian ruahmanna kalpui mek a ni. Phaisen hi Mizoram tan chuan hmun pawimawh tak a ni a. Helai atang hian Mizoram-a motor rukbo te tawlhruk a ni thin a. Hei bakah hian helai hmunah hian Assam Rifle nena kan inrinni lungphun a awm a. Helai lungphun hi Bairabi Zophai kan buai tum khan Assam lam hian am tichhiat ve kha a ni a. Hetiang ramri humhalhna chang hria, rukru te laka Mizo mipuite kan him theihna tura hmalatu, MLA remhria leh bial chhung mamawh te kan sawi ngai lova min tihsak zung zung tu Pu Lalrinsanga kan nei hi a lawmawm hle a. Kan thlangtling hi kan tisual lo hle mai.

Inthlan laia a campaign au hla "Kan bial, Mizoram chhuahka leh luhka ber ho tihhmasawna a awm a, bial hmasawn chak tak kan nih theihna turin, khawngaih taka in vote hlu tak min pe turin ka ngen takzet che u a ni. In tana hnathawh hi ka duhthusam ber a ni a; min thlang tling a nih phawt chuan, khawi hmunah pawh, engtik hunah pawh, in bialtu MLA, in innghah ngamna, mitin ban phak MLA nih ngei ka tum ang," tih kha tunah hian a thlawn lova, a thutiamah a hlen mek zel a. Bial chhung zirna in hrang hrangah Computer set te min pe bawk a. Serlui bialin zirna kan tlakhniam zia hria a zirna a ngai pawimawh te kan tan chuan a va hlu em. Inchirhthehna nilo se, kum 10 liamta kan bialin hmasawnna kan neih aiin tun thla 3-4 chhung vel leka hmasawnna kan neih pawh hi a tam zawk hial awm e. Hetiang mahni thutiam a dingnghet, bialtu hmangaihtu Pu Lalrinsanga Ralte kan nei thei hi a va lawmawm em.

Serlui bialin hmangaihtu diktak kan nei ve ta. ~ Chhana Vidìc Vanchhawng

No comments:

Post a Comment