Mara Autonomous District Council (MADC) ah BJP - TIMES OF MIZORAM

Breaking

Home Top Ad

Post Top Ad

Mara Autonomous District Council (MADC) ah BJP

Mara Autonomous District Council (MADC) a rorellai Congress legislature party (CLP) chu an legislature party thiatin BJP legislature party nen an inchhunfin.

BJP Govt
He thu hi nimin khan MADC chief executive member (CEM) leh CLP hruaitu Pu N. Zakhai chuan ziakin MADC chairman hnenah a hriattir a. MADC a CLP-te chu Nilaini khan Siaha khawpui-ah thukhawmin he thutlukna hi an siam a, hemi tlai atang hian BJP legislature party nen an inchhunfin (merger) ta tih a hrilh. Hetiang a nih avang hian CLP hi thiah a ni a, a awm tawh lo tih chu chairman hi an hrilh nghal bawk. An thupuan-ah chuan CLP thiat a BJP legislature party zawmtu mi 15-te’n an hming an ziah hnan a, Siaha khawpui a awm velo Congress MDC mi pangate pawhin telephone hmangin CLP thutlukna hi an thlawp thu an sawi vek niin tarlan a ni bawk.

CEM Pu N. Zakhai chuan vawiin khan kan Corr C.Z. Hluna zawhna chhangin BJP legislature an zawmna chhan chu an Policy lian ber India Constitution Schedule parukna siamthat leh state sorkar kaltlang lova sorkar laipui atanga sum dawn chu central a BJP sorkar chak tak lo piangin tihhlawhhlin sak a tiam vang a ni tiin kum 20 chuang an lo buaipui tawh chu BJP sorkar ah hian an hmuh ngei an beisei awm tak avangin BJP chu an zawm ta tih a sawi a ni.

Tuna MADC sorkar (executive committee) hi kum 2017 May ni 8 a din kha a ni a. Hemi kum May ni 4-a member 25 awmna MADC inthlanah hian Congress 17 an tling a, MNF 5 tlingin MNF thawhpui Maraland Democratic Front (MDF) 2 an tling a, independent pakhat a tling bawk. Congress hian sorkarna siamin member pathum chu ruat seat-ah an dah a ni. 

MDF MDC tling pahnihte hian BJP zawmin BJP legislature party an din a ni. Hetihlai hian MADC a member 5 nei MNF Legislature party hruaitu Pu H.C. Lalmalsawma Zasai chuan vawiin khan MADC chairman hnenah lehkha thehlutin MADC (Constitution, Conduct and Business etc) Rules 2002 in a phut angin mahni party chhuahsantute hi MDC an nihna hlip (disqualify) tura ngenin sorkar thar siam tura hmala turin a ngen a ni. ~ AIR

No comments:

Post a Comment

Post Bottom Ad