MIZO ACCORD: Home minister Pu Lalchamliana chuan kum 1986 June ni 30 a India sorkar leh MNF inremna thuthlunga la tihpuitlin loh awm chhun chu Mizoram tana High Court hrang neih chiah a ni a ti.
Tun assembly inkhawm kal meka Zirtawpni a Pu V.L. Zaithanzama ZPM zawhna ziaka chhangin Pu Lalchamliana chuan Mizo Inremna an tih tak mai a para 12-na pathumna a “Mizoramin ama pualin a duh chuan High Court a nei thei ang” tih chu la tihpuitlin loh awm chhun a ni a ti a. Tipuitling tura hmalak chin zawhna chhangin tunah hian Gauhati High Court Aizawl Bench a awm tawh thova, hei hian Mizoram mamawh ang chu a phuhru rih thova, sum sen belh turah harsatna a awm bawk avangin High Court hrang nei tur hian hmalak a la ni lo a ni a ti a. Tun maiah chuan Hnam pasalthate leh martar chhungte tan special scheme siam tumna a la awm hman rih lo niin a sawi bawk.
Home Minister chuan India leh MNF inremna avanga ramhnuai atanga lokir zat chu 581 a nih thu Assembly a hrilh a. MNF lokirte leh an chhungte mi 667 chu sorkar hna pek an ni tawh a. Group B-ah mi 29, Group C-ah mi 312 leh Group D-ah mi 326 te hna pek an ni tawh a ti a. Sorkar hriat danah chuan hna pek vek an ni tawh a, pek loh an awm tawh lo a ni.
MIZORAM ASSEMBLY BUSINESS: Nimin leh vawiin an chawlh hnu-ah naktuk zing dar 10 leh a chanve atangin Assembly inkhawm chhunzawm leh a ni ang a, zawhna leh chhanna hun hman bakah minister pathum department enkawlna tur sum ruahman sawi hova pawm hman tum a ni ang.
Naktuka minister pathumte department enkawlna tur sum ruahman an sawiho turte hi – Pu Lalchamliana hna chanpual cheng vaibelchhe 24, nuai 69 leh sing 2 leh sang li hmanna tur ruahmanna Taxation, cheng vaibelchhe 798, nuai 9, sing hnih leh sang 7 hmanna tur Home leh cheng vaibelchhe 27, nuai 44, sing 7 leh sang 7 hmanna tur Disaster Management and Rehabilitation, a vaiin cheng vaibelchhe 850, nuai 23, sing hnih leh sang riat hman ralna tur ruahmanna a ni a. Pu Lalchhandama Ralte enkawl – cheng vaibelchhe 16, nuai 98, sing 5 leh sang nga hmanna tur Printing and Stationery, cheng vaibelchhe 1,328, nuai 42 leh sang 2 hmanna tur School Education leh cheng vaibelchhe 47, nuai 59, sing khat leh sang li hmanna tur Labour, Employment, Skill Development and Entrepreneurship, a vaiin cheng vaibelchhe 1,392, nuai 99, sing 7 elh sangkhat ruahmanna te a ni a. Pu T.J. Lalnuntluanga departmennt – cheng vaibelchhe 27, nuai 89, sing 2 leh sang 7 hmanna tur Law and Judicial, cheng vaibelchhe khat, nuai 5 sing 9 leh sang khat hmanna tur Parliamentary Affairs, cheng vaibelchhe 160, nuai 7, sing 2 leh sang riat hmanna tur Environment, Forests and Climate Change leh cheng vaibelchhe 50, nuai 31 leh sang 8 hmaan tur Transport, a vaiin cheng vaibelchhe 239, nuai 33, sing 5 leh sang li te a ni.
EXCISE: Excise and Narcotics Minister Dr. K. Beichhua chuan zu khap burna dan hman a nih hnu a sorkarin zu a dona tur atan hnathawk lak belh a, hmun thenkhata Outpost hawn leh district thar 3 a thawktu dah tum a ni a ti.
Nimin piaha Congress member Pu K.T. Rokhaw zawhna ziaka chhangin Dr. K. Beichhua chuan zu dona atan hian sorkar chuan Excise and Narcotics department a hnathawkte thuam that leh lak belh a tum thu a sawi a. Tun hnai maiah hian post hrang hrang ami tur 33 hnawhkhah phalna sorkarin a pe tawh niin a sawi a. Rangvamual a Excise and Narcotics checkpost hawn thar chu remchan zawkna avangin mimal in an luah lai atangin |huampui a Truck Terminal, AMC building-ah an insawn niin a sawi a. Zokhawthar leh Bairabi-ah check-post thar hawn tum a nih bakah thawktu indaih dan a zirin Lawngtlai district-ah leh district thar pathum – Khawzawl, Saitual leh Hnahthialah te pawh thawktu dah tum a ni a ti a ni.
FOREST: Mizoramah ramngaw kilometre 18,186 bial a zau a awm a, chu chu Mizoram pum zau zawng atanga chhutin za zela 85.27 a ni. ZPM member Pu Vanlalhlana zawhna ziaka assembly-a chhangin Environment, Forests and Climate Change Minister Pu T.J. Lalnuntluanga chuan ramngaw in Mizoram a khuh zat hi Forest Survey of India-in India state of Forest Report 2017 a a lan dan a ni a ti a. Forest Survey of India-in a report, kum hnih dan zela a tihchhuah thin atanga a lan dan chuan ramngaw hi a kiam zel a ni a ti bawk.
MPSC: Chief Minister Pu Zoramthanga chuan Mizoram Public Service Commission (MPSC) chu tun maiah tihlen tumna a awm loh thu Assembly a hrilh.
MNF member Pu Lalrintluanga Sailo zawhna chhangin Pu Zoramthanga chuan June ni 1-ah khan MPSC-ah hian hnathawk 64 an awm a, tih len tumna mai a awm rih lo a ti a. MPSC-ah hian member pahnih an awm tih a sawi bawk.
~AIR
~AIR
Post a Comment