CM VISITS THENZAWL GOLF COURSE
Sorkar laipui sum, Cheng Vaibelchhe 99 leh Nuai 90 senga siam Thenzawl Golf Course chu nimin khan Chief Minister Pu Zoramthanga’n tlawhin hnathawh dan a enfiah.
Chief Minister chuan heti ang thil tha tak leh changkang tak siam a ni chu lawmawm a tih thu sawiin, a tul dan ang zela kalpui zui a ni ang, a ti. Golf Course hi Mizoram sorkar kuta hlan turin inbiakna a kal mek a. Golf Course hi peih fel vek ni tawh mah se hemiin a ken tel ‘NH-54 site’ leh ‘Reiek site’ te erawh la zawh fel loh a ni a, kalpui zel dan tur chu Mizoram sorkar kuta awm a ni tawh a ni.
Chief Minister hian nimin vek khan nakuma K|P inkhawmpui lian neihna tur Serchhip P&E Veng-a Leisekawt Mual a tlawh bawk a. Organising Committee te rawtna angin, mualko chhuah lam, BDO chenna tlâng chu râwt hniam a remchan theih leh theih loh a en a, he tlâng bâwk hi sum awm ang angin rawt hniama, tum khata thawh zawh vek theih a nih loh pawhin a tahtawla râwt hniam hna thawh zui zel ni se, a ti a. New Serchhipa Helipad chuan-hnuaia mikhual thlenna tur Circuit House dah a rem leh rem loh a en bawk a. A hmun chu zim deuhin lang mah se a siam rem dan awma a hriat thu sawiin, building awmdan tur ruangam a duhdan amah zuitu engineer-te a hrilh nghal a. Englai pawha hman ni lem lo, Helipad hmun chu lirthei hunna atan a rin nghal theih dawna a hriat thu leh a panna kawng pawh rawtna awm angin tihzauh tel a tul thu a sawi.
Chief Minister hi PWD Bangla-a a chawlhnaah Serchhip Sub Hqrs YMA hruaitute’n an President hovin an kawm a. Zote leh Kanghmun South ten Serchhip Dist.-a awm an duhna, Sub Hqrs YMA Conference-in hmalakpui tura a tih chungchang leh tun hnaia Serchhip Dist hospital-a thawk Doctor sawn chhuah tura tih te an aiawh awm hma chu sawn chhuak lo tura dilna ziakin an thlen a. Pu Zoramthanga chuan heng thil te hi an lo enzui tur thu a sawi a ni.
WORLD ENVIRONMENT DAY
Nimin khan Mizoram-ah World Environment Day hman a ni a; Sorkar Office bakah LC leh VC kaihhruaina hnuaiah khawtlang leh zirna in zawng zawng te’n khawtlang thian faiin ‘No Plastic Day’ an hmang.
Aizawl-ah chuan Chief Secretary Pu Lalnunmawia Chuaungo hovin Secretariat-a officer leh staff-te’n World Environment Day pualin thu an tiam rual a. Assembly Secretariat-a thawkte pawhin Commissioner & Secretary, Pu SR Zokhuma hovin Assembly House kawtah thutiam an chham rual ve bawk a, office building tifaiin plastic atanga siam bawlhhlawh chhar faiin hun an hmang zui a ni.
Aizawl khawchhung-ah chuan AMC-in August ni 7 atanga Solid Waste Management Rules, 2016 tihlawhtling tura hmalak a tumna atana lo inhmakhualawk nan veng hrang hrang-ah Local Council huaihawtin khawtlang leh zirlaite’n ‘No Plastic Day’ an hmang a, khawpui bawlhhlawh sawngbawlna chungchanga sorkar hmalaknaa mipui mawhphurhnate leh tih tur hrang hrangte inhrilhfiah a nih hnuah bawlhhlawh leh plastic atanga siam-te chhar khawmin an thianfai a ni.
District hrang hrang-ah pawh World Envirnment Day pual hian ‘No Plastic Day’ hi hman a ni a. Sorkar pisa leh zirna in zawng zawng ten anmahni hmunhmaa plastic bawlhhlawh te chhar khawmin kawngpui dung te an thianfai a. Plastic bawlhhlawh chhar khawm runpuiah hian plastic lam chi thil te chu tihtlema hman nawn te leh a tul anga siam nawn tura dahkhawm inzirtirna neih nghal a ni.
Serchhip-ah chuan DC Office tualah DC Pi Sangchhin Chinzah hovin ‘No Plastic Day’ hi hman a ni a. Lawngtlai-ah chuan Sub-Deputy Commissioner Pu Lalsanglura hovin hun hman a ni a; he huna telte hian ramngaw, leilung leh boruak tichereuva tibawlhhlawh lo tur leh a tihthianghlimna kawnga thawk zawk turin thu an tiam thar leh a. Plastic lam chi hmang tlem tur leh, loh theih lohva hman a nih pawha fimkhur leh uluk taka hmang tur te, bawlhhlawh paih dan leh faina chungchanga mi dangte zirtirtu nih tum turte’n an intiam a ni.
ECONOMIC CENSUS TRAINING – MAMIT & LAWNGTLAI
Ram chhunga chhungkaw tin eizawnna dinhmun chhinchhiahna chhiarpui, Economic Census vawi 7-na tura hna thawh dan tur inzirtirna nimin khan Mamit leh Lawngtlaiah inzirtir a ni.
Mamit-ah chuan District Level Coordination Committee Chairman, DC Dr. Lalrozama hoin inzirtirna hi Mamit District Research Officer Conference hall-ah neih a ni a. DC chuan Mamit District chu District hnufual a nihna atanga chhuak turin Census leh Data rintlak neih a pawimawh hle a; Census leh Data nei lo chuan hmasawnna a awm thei lo, a ti a. Data dik lo ai chuan Data awm lo pawh a tangkai zawk avangin a dik thei ang bera tih tum turin Training-naa tel Supervisor leh Enumerator-te chu a chah a ni.
Nimin Training-ah hian 7th Economic Census atana hriat tur pawimawhte mithiam thlan bik ten an zirtir a ni.
Lawngtlaiah pawh District Research Officer (DRO) Conference Hall-ah, District chhunga Economic Census kalpui dan tur inzirtirna leh sawihona hun hman a ni a.
District Coordination Committee Chairman, Lawngtlai DC aiawhin Sub-Deputy Commissioner Pi Christina Lalmuanzuali’n training hi hawngin, chhiarpui hna thawk tur supervisor leh enumerator kal khawmte fuihna thu a sawi a. Chhiarpui chu sawrkar hma lakna hrang hrang beh chhan atan hun rei tak chhung hman zui a nih ṭhin avangin, uluk leh fimkhur taka kalpuia, a dik thei ang bera chhinchhiah a pawimawh, a ti.
Common Service Centre (CSC) e-Governance District Manager Pu Paul LT Zela’n 7th Economic Census chungchanga hriat tur pawimawh hrang hrang a zirtir a. District Manager Pu K. Lalfamkima’n mobile app hmanga chhiarpui thil chhinchhiah dah luh dan a zirtir a; zawhna leh chhanna hun hman a ni bawk.
India Economic Census hi kum 1977 atanga neih tan niin, kum 1980, 1990, 1998, 2005 leh 2013 te khan neih a lo ni tawh a. Tun hi a tum 7-na tur a ni.
Tun tum economic census hi CSC e-Governance kal tlanga neih tur niin, data hi mobile app hmanga chhut luh vek tur a ni a. A hmuna kal chilh ngeia chhiarpui hi kalpui a nih theih nan in awmna hmun chhinchhiahna hman a ni dawn bawk. Lawngtlai District-a census buaipui tur hian supervisor 9 leh enumerator 50 an awm dawn a ni.
PU LALDINGLIANA SAILO IIS PASSED AWAY
Chanchin thar puanchhuah kawnga Mizote zinga sulsutu pawimawh leh thawh hlawk berte zinga mi Pu Laldingliana Sailo, IIS, kum 76 chu nimin zing khan Aizawl-a Grace Nursing Home-ah thisen cancer vangin a thi a, nimin vek khan ama chenna in Mission Vengthlangah vui a ni.
Kum 1943 July ni 15-a piang Pu Laldingliana Sailo hian a pianna, Thenzawl bul Lungrang khuaah zirna bul tanin, kum 1968-a Shillong St. Anthony’s College-a BA a zawh hnuah kum 3 chhung Nagaland-ah zirtirtu hna a thawk a. Hemi hnu hian Ministry of Information and Broadcasting hnuaiah Field Publicity Officer (FPO)-in a lut a, 1982 khan Central Information Service (CIS) chu Interview paltlangin a tling leh a. News Correspondent hna AIR Kohima, Nagaland-ah 1982 khan a zawm a. Hemi hnu hian New Delhi-ah thla 7 vel bawr All India Institute of Mass Communication, New Delhi-ah a training a, training a zawh hnuah All India Radio, Aizawl-ah kum 1983 khan News Correspondent hna a thawk tan a ni.
1984 kum tawp lam thla hnih chhung General News Room, New Delhi-ah a thawh leh hnuah AIR Aizawl-ah News Editor hna a chhunzawm leh a, 1997 February thla khan Doordarshan Kendra, Durtlang-ah sawn a ni a, 2006-a a pension thlengin hetah hian News Editor hna a thawk a, AIR Aizawl News Room a enkawl tel bawk a. DDK Aizawl leh AIR Aizawl te a enkawl chung hian Field Publicity Director-ah kaisangin, sorkar atanga pension-a a chhuahna ber pawh he hna hi a ni.
Kum 2006 February ni 28-a a pension hnuah 2006 kum tawp lamah Zonet Cable TV Pvt Ltd News enkawl tanin, Chief News Editor a ni a, a thih thlengin he hna hi a thawk a ni.
Pu Laldingliana Sailo hi pa invawng fel, hriselna vawng uluk tak mi a nih avangin a damlo khât hle a. Sorkar hna a thawh lai leh a hnua Zonet News a enkawl hnuah pawh chawl ngai mang lo a ni a. Kumin kumtir lamah hritlang leh pum lam tha loin a tibuai ve zeuh zeuh a; March thla chhoah a insawisel ngun ve tak deuh avangin Synod Hospital Durtlang-ah inentirin a thisen endik a nih hnuah Doctor te thurawn angin April ni 2-ah CMC Vellore panpui a ni a, hetah hian Thisen Cancer a nei tih hriat chhuah a ni a. Vellore atang hian Aizawla inenkawl turin Thawhtanni khan Aizawl Mission Vengthlanga an chenna in thlenpui a ni. Zan khat a riah hnuah Thawhlehni khan Grace Nursing Home-ah dah luh a ni a, thisen te pek a ni a. Nimin zingkarah pawh khan amah kantute a la kawm peih a; thawklehkhatah buai thutin, zing dar 7:25 khan chatuan ram a pan ta a ni.
Pu Laldingliana Sailo hian a nupui Pi Lalhrangzuali, a fate 5 leh a tute 3 a kalsan a. An chenna ina vui a nih hnuah Aizawl Mission Vengthlang thlanmualah phum a ni.
PM MODI TO VISIT MALDIVES, SRI LANKA
Prime Minister Narendra Modi-a’n Maldives leh Sri Lanka a tlawh tur chuan India-in ram thenawm ramte ngaihpawimawh hmasak tih a kalpui pawimawhzia a tilang niin a sawi a, India tuipui dep ramte a phuarkhawm that zet tur thu a sawi.
Prime Minister Narendra Modi-a chu vawiin hian ni 2 chhung thanga thenawm ramte tlawh turin a zin dawn a. Tun hi Prime Minister atan thlan nawn a nih hnua ram danga a zin lehna hmasa ber tur a ni.
Prime Minister chuan zina a sawm avangin Republic of Maldives President Mohamed Solih chuangah lawmthu a sawi a. Hmakawsang chanchin leh hnamziain a suihzawm ram a nih avangin India chuan Maldives chu a ngaihhlut thu a sawi bawk a ni.
Narendra Modi-a chuan Sri Lanka chungchang pawh sawiin, India chu he tliarkar mipuite tana nghet taka a din thu a sawi a. Mi firfiakte dolet kawngah India chuan Sri Lanka a thlawp tlat thu a sawi bawk a ni.
Ni 2 chhung a zinna turah hian Prime Minister chuan Maldives khawpui Male a tlawh hmasa dawn a. Hmasawnna project engngemaw zat President Ibrahim Mohamed Solih nen an hawng dun dawn a ni.
INDIA, JAPAN RELATIONS GROWING IN SEVERAL AREAS
India-a Japan ram palai hna thawktu Kenji Hiramatsu chuan kawng hrang hranga India leh Japan inlaichinna chu a thang mek a ni a ti.
Nimina New Delhi-a FICCI hun buatsaihah Hiramatsu chuan kum 5 kal leh tur hi ram pahnihte tan inkungkaihna tha nei tura hun pawimawh lai tak a nih thu a sawi a. Japan chuan India-a sumdawnna huang zauhna tur remchang a dap reng thu a sawi a. Japan chuan hmasawnna ruhrela India hmasawnna chu a thlawp tlat thu a sawi bawk.
Kenji Hiramatsu chuan Indian market-a thuk zawka intah luhna tur Japan-in a dap mek thu a sawi a. Ram 2-te chuan inlaichinna bung thar kai tura tan an lak a hun thu a sawi bawk. New Delhi chuan Tokyo tana sum peipunna leh sumdawnna lama hmun zau zawk a siamsak a beisei thu a sawi a. Ram venhimna leh van boruak lama an thawhdunna an tihpun theih ve ve thu a sawi bawk.
Source: AIR Aizawl
Post a Comment