ANTHURIUM FESTIVAL 2019 ORGANISING COMMITTEE TEN REIEK TOURIST RESORT TLAWH

Vawiin chawhnu khan Anthurium Festival Organising Committee te chuan Festival neihna tur a ruahmanna hmun Reiek Tourist resort an tlawh a, Pu Lalrintluanga Sailo, bialtu MLA leh Deputy Chief Whip ni bawk chuan Anthurium Festival hmanna tur a inpuahchahnate enpuiin hmalak chhunzawm dan tur te sawi ho nghal a ni bawk.


Pu Lalrintluanga Sailo, MLA chuan ,"Tourism Department ten Festival an buatsaih hian khualzinte hipna a nih mai piah lamah festival huaihawtna khua leh a chhehvel a chengte hian kawng tam takin an hlawkpui phah ve thin a ni," a ti a," Kut hnathawktute leh khawtual mi ten he festival hi an phaktawk ang zel a an chhawr tangkai ve theih na turin he Anthurium festival hi buatsaih i tum ang u," a ti bawk.

Pu TC Pachhunga, Vice chairman,Sports, Youth Affairs & Tourism Board chuan Anthurium Festival buatsaih a ni leh tur chu lawmawm a tih thu a sawi a, khualzinmite Reiek tourist resort awlsam zawk a an pan theih nan Lengpui Airport leh Reiek inkar inkalpawhna tha siam na turin ruahmanna a kal mek thu a sawi bawk.

Arthurium Festival hi kum 2006 atang tawh a buatsaih thin niin 2014 thleng Reiek tourist resort ah neih a ni a, kum 2015 khan Lengpui ah neih niin 2016 khan Reiek ah buatsaih leh a ni. Kum 2017 leh 2018 khan Anthurium festival hi buatsaih a ni lo va, Kum 2019 hian Ministry of Tourism atang a cheng nuai 25 hmangin he festival hi buatsaih leh tum a ni.

Anthurium Festival 2019 hi ni 4 leh ni 5 October ah hman tum a ni a, he hunah hian Zo Anthurium Grower's Society ten Anthurium chi hrang hrang lei theih turin an phochhuak dawn a, Mizo Typical Village en tur a buatsaih mek anih bakah intihlimna hrang hrang leh zai leh lam te, handloom leh handicraft te, ei siam chi hrang hrang lei theih a chhawp chhuah tum a ni bawk a ni. ~DIPR

Post a comment

Powered by Blogger.