KHAWVELA PATHIAN BIAKIN LIAN NER WORLD RECORD THENZAWLAH SAK A NI DAWN
Khawvela Biak In lian ber tur Zofate Biak Inpui, sakna tur Thenzawl Kanan Venga Phaipui ramah vawiin khan Zoramthar huaihawtin Hnam Hnatlang neih a ni a, Biakinpui bulṭan nan ramri siamfel hna thawh ṭan a ni.
Zofate Lairelna, Zoramthar ten vawiina hnam hnatlang an kohah hian Aizawl Veng hrang hrang leh, East Lungdar, Muthi, Hlimen leh Thenzawl aṭangin mi 30 chuang an thawkchhuak a, Revenue Department a hnathawkte nen Zofate Pathian Biakinpui hmun tur ram hi an enfiah a. Hnatlanga thawkchhuak te hian ramri chhinchhiahna piller an phun nghal a ni.
Zoramthar President Rev. Dr. Zaichhawna Hlawndo chuan Thenzawla Vantawng Chanchinbu Editor, DDK Stringer ni bawk Liantluanga Renthlei zawhna chhangin, Thenzawl Kanan Venga Phaipui hmunah hian khawvela a Biak In lian ber sain, world record siam an tum tih a sawi a.
Biak In len zawng tur hi ruahmanna an la nei fel chian lova, khawvela Biakin lian ber dinglai aia lian anih tur thu sawiin, a sakna tur sum leh pai chungchangah engmah neihsa an nei lova, Pathian intumchawpna an beisei tih sawiin, Zofa zawng zawng, Zohnahthlak tu pawhin he Biakinpui sak nan hian engemaw tal an thawh ve an beisei thu a sawi a, hetianga thawhlawm lakkhawm dan tur hi ruahmanna an la siam dawn niin a sawi.
Rev. Dr. Zaichhawna Hlawndo chuan, Zofate Pathian Biakinpui hmun tur ram chu Mizopa sawidana ṭin 30 hmun vel anih thu sawiin, kumin Nov. 12 a helai hmuna Zofate Lungphun an hawn hunah Biakinpui lungphum hi phum tum anih thu leh kumthar 2021 aṭanga sak ṭan theih an inbeisei thu sawiin, a sak dan tur leh a sak zawh hun turah pawh ruahmanna an la siam tur thu leh intumchawp Pathianah an innghah thu a sawi a ni. @Renthlei Tluanga
Post a Comment