Thusawi leh thil tih inpersan, MNF sorkar kan hmu leh ta! - TIMES OF MIZORAM

Breaking

Home Top Ad

Post Top Ad

Thusawi leh thil tih inpersan, MNF sorkar kan hmu leh ta!

No. ZPM Thalai HQ - 2020/PR/5
OFFICE OF THE 
ZORAM PEOPLE'S MOVEMENT PARTY 
THALAI GENERAL HEADQUARTERS
Dated: Aizawl, the 20th February, 2020

PRESS RELEASE
ZPM Thalaiin E-in-C Office sak mek an tlawh: Thusawi leh thil tih inpersan, MNF sorkar kan hmu leh ta!

Nimin ni 19, February, 2020 khan ZPM Thalai Gen. Hqrs. hruaitute chuan New Capital Complex-a Engineer-in-Chief, PHED Office tur sak mek chu a hmunah an enfiah a. E-in-C Office sak chungchangah hian Congress Ministry lai atang tawhin thil fel lo lian tak a awm tawh a, New Secretariat Complex Welfare Committee-te nen pawh buaina a lo awm tawh a ni. He E-in-C, PHED Office sak hi MNF-in Congress sorkar laiin nasa takin an lo do tawh a; MNF thalai ten a hmunah kalin hnathawkte pawh hna chhunzawm lo turin an lo hrilh tawh a, Pu Vanlalzawma, helai bialtu MLA a nih laia E-in-C Office building sak a nih dana thil fello awm leh sak chhunzawm a duh lohna thuziak te, tin, Pu Lalruatkima, MLA-in, khatih hunlaia eptu party hruaitute nena helai hmun an tlawh tuma a thusawi pawh hmuh theihin a la awm bawk a ni. 

Chu mai pawh ni lovin, tun MNF Ministry siam a nih tirhin he buaina hi Chief Minister Pu Zoramthanga ngeiin hna hmasaah neiin, January ni 10, 2019 khan a hmunah kalin, helai hmun hi Congress sorkar laiin building awm reng si a, ram ruak anga show a nih thu sawiin, an hnathawhte titawp nghal turin a lo hriattir tawh a, MNF press release-ah chhuah a ni nghe nghe (Memo. No. MNF/media/2019/02/04 Dated 10.01.2019).


Heti taka MNF hruaituten E-in-C Office tur building sak mek hmuna tlawha, he hmalakna an duh loh thu vawi tam an lo auchhuahpui tawh chu, MNF Ministry-ah ngei, Chief Minister leh Deputy Chief Minister-te remtihpuinaa sak chhunzawmna tur order February ni 7, 2020-a tihchhuah a ni leh ta mai hi ZPM Thalai Gen. Hqrs. chuan mak a ti a. 

ZPM Thalai Gen. Hqrs. chuan inthlan dawna nuai thum sem tura intiamin, sorkarna an siam hnuah hmuia khawn ang hlauha an sawizui leh duh tawh miah lo ang maiin, E-in-C, PHED Office sak meka MNF thuchhuak leh an hmalakna chu thil inpersan tak niin a hria a. MNF Party chu Zoram mipui hmaizahna avang tal pawhin an tih theih loh tur leh, an tih ngam leh si loh tur chu auchhuahpui tawh lo turin ZPM Thalai Gen. Hqrs. chuan a ngen a ni.

(R. LALRINSANGA)
Secretary
Publication Department
ZPM Thalai Gen. Hqrs.
Aizawl

No comments:

Post a Comment

Post Bottom Ad