Mizo Writer VanneihtluangaKan ngaihtuah dan ennawn a ngai. 

Pathian kan ring a lawm

Cancer leh HIV/AIDS-a kan mualphozia en hian, nunphung thlâk si lova Pathian thlamuanpui hi Setana bumna a ni. Hri hian Kristian veng bik sela chuan, India (Kristian 2.3%) aiin Italy (Kristian 83.3%) hi an him ang. Mizo Kristian nih vanga him bîk tura inngaih hi a dik lo. Pathian rin hi ât hùaina tur ni lovin, nunna chhanhim tura inzirtir nachang hriatna tur a ni a, insumtheihna, mahni inthunun theihna leh kan ṭhatna tura sorkar thupêk zawm theihna tur zawk a ni.

A lo thlen miau chuan tih ngaihna a awm dawn chuang hlei nem

Kan hmachhawn hi lirnghing lo thleng thut ni se, tih ngaihna a awm lo kan ti thei ang. He hri hi chu lo dang thei lo mah ila, kài theih dan kan hriat lâwk avangin, inven dan pawh kan hria. Darh lohna tura invenna ṭha ber chu inhnaih loh leh inkhàrkhip (social distancing) a ni.

Kum 60 chung lam tan chauh a hlauhawm


Mi hrisel tamna ramah a dik. Kan ramah, zûk leh hmuam, zu leh ruihhlo leh, zan men rei dawklak avanga ṭhalai hrisel lo kan tam. Mi ram anga kuma naupanna thlamuanpui ve thei kan ni lo.

A vei pakhat pawh an la hmu chhuak hlei nem

Finfiaha hmanrua kan nei famkim lo va, en kim vek turin official leh hmanrua kan indaih lo va, mi state aiin kan finfiah chhung a rei a ni zawk maithei. Khawi hmunah mah kan la hmuhchhuah loh hun lai tak hi khawi hmunah pawh kan invèn a ṭul hun lai tak a ni.

Vei an awm chuan thi an awm ang chu!

Ṭhalai hrisel takin kái se, thihpui si lovin mi tam tak a kài darh thei ang. Thi an awm loh vanga rálkhelh nachang hriat loh hi màwlna a ni zawk. Thi an awm huna phili leh vak ai chuan, thi an awm hmaa lo invèn lâwk hi hnam fing tih dan tur a ni.

Mizo tan a hlauhawm bikna tur a awm lo.

A awm! (1) Khawvelah keini aia inkhawm uar hnam an tam lo. (2) Chhiatni ṭhatnia pung khawm tam hnam kan ni. (3) Cancer/AIDS/addiction  avangin hnam bawrhsawm (..) sa kan ni. 

Hlau fál bik nih kan tum lo


Huai fálten nunphung thlâk lo tura min fuihna hi kan thihpui thei. Hlauh huna hlauh ngam hi huaisenna fing a ni. Kohhran dang an inkhawm ngam laia inkhawm ngam lo kohhran nih bik te, political party dang sawisel hlauh vanga inkhawm tihtawpna thupek chhuah ngam loh (ni ta se) te hi hripui darh vak theihna a ni. Kohhran pawl leh political party leh mi mal leh pawl hamṭhatna tur lam ngaihtuah lova a hnam puma kan ṭanrual ṭul hun chu tun hi a ni. Hmuh chawp mila rèl chawp  ngai lova puan/hman nghal theih tur thutlukna fel tak sorkar hian nei lâwk sela, zàwm turin mipui lo inpeih ang u.

Inkharkhipin miretheiin eng nge kan ei ang?

Kar 2 bak a ngai kher lo vang.
Hei hi Pathian kan rinna a lanchhuahna tur a ni. A remchan loh miau chuan, Pathian hian biak ina inkhawm aiah kan unau chhuanchhamte rawng kan bawlsak tul a tih zawk hun a thlentir thei tih i ring ngam ang u.
Hei tak hi a ni - Rinna chu.

- Vanneihtluanga

Post a comment

Powered by Blogger.