KHAWNGE A RALTHUAM CHU?: Ralthuam tha, hmeh kheta khawvel hmel sawi danglam thei, khawvel pum deuhthaw Nuclear bomb pakhat lek hmanga bomb darh thei, duhna hmun taka kap chat chat thei ralthuam tam tak nei mah sela, kah fuh theih loh hripui leng vel chu, khawvel hian a dang thiam thlawt lo zawng a nih hi.
SIPAI RUAL LO CHHUAK RU: Sipai ṭha leh rothap tak tak, indo thiamna tinreng trained chhuak, mi chak leh rorum tak tak, khawvel hian a ngah lutuk, mahse chung mi hlauhawm pui puite chuan, an do thiam loh zawng takin, he hripui hian a rawn rum thaih ta daih a. Sipai chak pawh an tlawm zo ta.
KHAWNGE I THIAMNA CHU?: Thiamna a san tawh tehreng nen, scientist thluak tha pui pui leh medical doctor turu tak tak, mihring taksa bung tinreng zawm khawm thiama mawi, mihring nunna thar pawh din thei hiala insawina khawvelah hian, chung mi thiam sang tam tak awmna karah chuan, he hri tereuhte thah theihna siam turin, an finna chuan a daikhalh hman tlat lo, mi fing rual tlawmna khawvel a la ni zel mai.
I HAUSA A NI LAWM NI?: Khawvel hausakna turu lutuk, ropui leh nuam nia kan suangtuah aia ropui zawk din theitu khawvel hian, a in chhawng sang din ropui tak tak pawh hawng dar ngam lo leh, a khawl ropui tak tak, thil chitinreng a siamna, vir mup mup maite pawh a chawl thuap ta mai si a. A theihna hmanga dan theh ni se, ni ruk chhung leka hospital khum sang chuang awm theihna din theitu khawvel hian, a dang bet nghal hmak ang chu, mahse a daikhalh hman si lo a nih hi.
IN ṬANG HO THEI NANGE? Ram hrang leh ram hrang, ropui nih duh vanga inel reng renga buaite hi, an theihna theuh sawm khawmin, hmun khatah an chakna vawm khawm se la, a hrang a hraia mahni seh mual mual a do ai chuan a zia deuh mahna, mahse mihring inchenpawlhna chu a hlauhawm lai ber a ni leh tlat si a, loh theih lohvin mahni ram ramah kan tawmim far mai a. Hlawkna ngaihtuah thei hauh lo leh, mahni himna bak ngaihtuah thei lovin, he khawvel hi a dang bet tlat mai a ni.
TRAMP-A MEUH PAWH: A ke rahna apiang nghinga ngai, America President meuh pawh, a ram chhungah hripuiin a luhchilh meuh chuan, chu hripui damdawi chu a that leh that loh pawh a chian tak tak hmain, India damdawi lei theih loh hlauvin, kan pu Modi a vau khur khur mai a, khawvel mi ropuite pawh an tlawm zo ta.
HLUTNA A BO: He hripui hrang vel karah hian, Rangkachak leh lunghlu mawina leh hlutna a chuai a, zai rimawi pawh aw rawl chhuahtir thei lo leh, hmel thate mawina partir thei lovin, infiam mite khel mual gate zawng zawng kalhin a awm a. Rorelna inpui pawh, ram ropuina kawng ngaihtuah thei lo lekin a ching buai a, himna leh kaa ei tur a awm theih nan ngawr ngawr bak ngaihtuah thei lovin, a khung khawm ta hlawm a nih hi. Khawvel hi a va tlawm chiang em!
CHUTICHUAN: Khawvel hian hei hi a hre tawh ngei ang, a ropuina leh theihna sang taka a din lai hian, Pathian meuh pawh a theihnghilh chang a awm thin. Khawvel hian thil nasa tak ti thei mah se, a theih baka thil ti thei, siamtu Pathian chu a awm ngei a ni tih hi a hre tawh ang.
CHUVANGIN: Siamtu Pathian hi hlat thei a ni lo tih leh, a rorelna hnuaia awm mai niin, a duh chuan a rem khawm a, a duh leh a pawt darh thei a ni tih hi, he tlawmna khawvel thim atang hian lo hre mawlh rawh se.
~Lalrinliana Colney
Post a Comment