Contact Form

Name

Email *

Message *

Iklan

Mizoram Lockdown Extended Till April 30

ToMZ
13 Apr 2020, Monday, April 13, 2020 IST
MIZORAMAH APRIL THLA TAWP THLENG LOCKDOWN KALPUI CHHUNZAWM ZEL A NI DAWN

No.306/2020-2021


Chief Minister Pu Zoramthanga chuan Mizorama inkharkhipna kalpui mek chu April thla tawp thleng kalpui chhunzawm zel a nih tur thu a sawi. He thu hi vawiina Chief Minister kaihhruainaa Mizoram Legislative Assembly Speaker Pu Lalrinliana Sailo, Home Minister Pu Lalchamliana, Health Minister Dr. R. Lalthangliana, Supply Minister Pu K. Lalrinliana leh I&PR Minister Pu Lalruatkima te bakah MHKC, NGOs, Village Council zawng zawng te leh Local Council intelkhawm te leh political party hrang hrang aiawhte Assembly Annexe Conference Hall-a inrawnkhawmna an neihah a sawi a ni.


Chief Minister chuan International leh inter-state border ven hna a aia khirh leh zualin kalpui a nih tur thu a sawi a. Hetih rual hian mipui tan harsatna lutuk a thlen loh nan State Level Task Force in District level, Village/Local Level Task Force te leh mi pawimawh dangte nen inrawn chung zelin remruatna a siam ang.

India hmarchhak state hrang hranga Mizoram mi leh sa tangkhang mekte chu Mizorama hruai haw dan tur sawrkarin a ngaihtuah dawn a. Thlawhna leh train service-te a chawlh thuap avangin India ram hmun hla zawka tangkhangte erawh hruai haw theih an ni rih dawn lo va, ram chhung hmun hrang hranga Mizoram House-a innghatte chu an ei man leh riah mante thin an ni dawn lo a ni.

Vawiin meeting-ah hian Home Minister Pu Lalchamliana chuan ramri danpin hna an thawh dan te, ngawrh lehzuala hmalak an tum dan a sawi a. Supply Minister Pu K.Lalrinliana pawhin inkharkhipna kalpui a nih chhunga ei leh bar kan tlakchham loh nan te, mi harsa ten ei leh bar a thlawna an dawn theih dan tur ruahmanna kal mek leh hmachhawp te a tarlang a. I&PR leh Rural Development changtu Minister Pu Lalruatkima chuan ni 100 inhlawhna a taka thawh theih ni rihlo mahse mipuiin hun engemawchen atana ni 100 inhlawhna sum lak lawk dan tur ruahmanna an siam te leh I&PR kaltlanga COVID-19 chungchanga thu thar leh sawrkar hmalaknate englai pawha puanzar a nih dan a sawi bawk.

Meeting a tel dangte hian hmalakna tura an ngaihdan leh rawtnate sawiin, inkharkhipna la chhunzawm zel chu tha an ti tlang hle a, chutihrualin nitina inhlawhfa thin te leh rethei tak tak, nitina eichawp thawkchhuak thinte harsatna hriatpuiin a tihziaawm dan tur sawrkarin ngaihtuah se an ti a. Rampawna tangkhang mekte tanpui dan pawh sawrkarin ngaihtuah se tiin meeting-ah hian an sawi a ni. Tukin khan Council of Ministers chuan CM Cabinet Meeting room-ah lockdown kalpui mek leh a nghawngte thlirin an lo thukhawm tawh a. Minister rual kalkhawmte pawh hian Mizoram mipuite himna turin lockdown ti tawp rih lova kalpui chhunzawm tha an ti tlang a. Khirh leh zual zawka ramri venhim te, tangkhangte chungchang thu te, inkharkhip vanga harsatna tawk mi retheite dinhmun pawh meeting-ah hian sawi lan a ni.

Vawiin Assembly Annexe Conference Hall-a meeting neih ah hian MLA Dr. ZR Thiamsanga, COVID-19 Medical Operational Team Chairman leh Chief Secretary Pu Lalnunmawia Chuaungo, Additional Chief Secretary Pu J.C Ramthanga bakah sawrkar officer pawimawh engemawzah an tel a ni. ~DIPR
Visitor's Voice

Click to Comment

No comments:

Mizo Nula Khal

+