Contact Form

Name

Email *

Message *

Iklan

Mizo Story Ngaihnawm - KAN HOSTEL

ToMZ
23 Apr 2020, Thursday, April 23, 2020 IST
Maggie, Magie” tia min ko tu thawm bengcheng zet avang chuan ka inbengkang a, light chu ka on a. Ka roommate Dingi pawh chu a rawn harh ve nghal a; kawngka chu ka va hawng a, khur zawih zawihin Nisha-i kan room dawt chiah ami chu a lo ding a, a mitmeng chu hlauhna hlirin a khat a, a thlan a tla hluam bawk a!

“Lo lut rawh, eng nge thleng a?!” ka ti a, ka kai lut nghal a.

“A lo thleng, a lo thleng ta” ati ringawt a! engmah sawi tawh lovin a hmai a hup a, a tap ta tlawk tlawk a! makti zetin Dingi nen chuan kan inmelh tawn sek a, room atang chuan ka chhuak a, Nisha te room-ah chuan ka va lut a, a roommate Shonali chu kil khatah hian a en ngai enin a lo thu a, min hmuh veleh min rawn pan a, min rawn kuah thlawp a, Nisha ang bawk khan a tap ve ta hawm hawm a! engmah thil awmzia ka hre lo, ka bo tulh tulh mai.

Delhi University –ah M.Sc (Zoology) zirin Hostel-ah ka awm a, ka roommate Dingi erawh chuan History ala thung a; kan hostel hi kan University atanga ke a minute 20 kal vel a ni a, kan ep chiahah Boy’s Hostel a awm bawk a, kan hostel atanga hla lote-ah Manipur hotel a awm a, chutah chuan a chang changing chaw kan va ei thin, mizo chawhmeh an siam tui thin khawp mai. Kan hostel hi building lian ve tak a ni a, chhawng hnih a ni a, chawng khatna chu Dining Hall ani a, a chungah kan awm a; kan vaiin mi 60 vel kan ni a, lut leh chhuak hi an awm zut avangin a zat chiah hriat a har deuh! North East kan tam ber a, Mizo chu 12 lai kan awm ve a, a bak chu Naga leh Khasi, etc. anni tlangpui, Bengali pawh tlem an awm ve bawk. A thianghlim a, tui a tam bawk a; room a zau tho bawk nen, duhthu chu a sam ve thawkhat reng.

Double room anih vangin, ka roommate Dingi hian kan luh hma atangin min sawm tawh a, keipawn ihe lovin ka lo yes a. Dingi hi Tlabung Khua a ni a, kei erawh Ramhlun Aizawl khua ka ni thung. Mizo kan tam lutuk loh avangin a awm chhunte chu kan inpawh tlang a, kan tangrual ve riau bawk; kan room dawt chiahah vai pahnih hi an awm a, anni te nen pawh hian kan inkawm thei viau! Hmeichhe chi hrang hrang awmkhawm kan nih vangin neuh neuh chu a awmlo thei bik lova; kawhmawl bawl deuh leh inlahrang deuh chu group khat an awm ve a, Assamese ho anni. A lang apau chuan an fel viau! Mahse, kawm dawn tak tak chuan an intihrang leh tlat zel a, kawm luih talh kan tum lem bik lo.

Nisha leh Shonali awmdan mak tak avang chuan nuamlo ka ti ru hle; Dingi hi dawihzep ve deuh mai a ni a, ani phei chuan a hlau ru hle tih ka hria, kan Warden hian Dining Hall bulah room a nei a, a fel viau na a zanlaia zuk kaihthawh chu ka duh chiah lova, kan vai pahnih lah chuan engmah sawi an tum tawh bawk silo; khum kan dawhzawm a, kan riak ho ta ringawt a!

Zinglam dar 3 vel bawrah chuan ka bula mu Nisha chu a rawn rakchhuak thawt mai a! kan harh chiang hlawm kher mai. Thla 5 lai he hostel-ah hian kan awm tawh a; hetiang thilmak hi kan la tawng ngailo. A ruala mi pahnih tichiaitu thil chu engtak ni ang maw?

“Nisha, eng nge i hmuh?” ka ti ringawt a. Nisha hian English a thiam lutuk lova, Shonali lam chu va enin Hindi in a tawng ta zuah zuah a, Hindi hi a mik amak ka hre lo chu ani chiah bik lova, mahse, ka thiam lem lo. Dingi nen chuan kan hawi a ho mai a!

“Mumang tha lo deuh a nei a, a mumangah chuan…” a ti a, a ngawi ta daih a.

“Shonali, sawi chiang teh u, in awmdan hi kan hrethiam ve silo a, a nuam vak lo a nia” tlema chang deuh hian ka ti a, a ninawm tawh tlat! Chinchang hre miah lova an bula lo awm ve reng chu..

“Naktukah ka sawi ang” a ti mai a. Zawh luih talh kha a nuam bik silo, ngaihthalo zetin kan mu leh ta a.

Kan class-ah hian kawmngeih fal tak mipa ka nei a, a hming chu Santosh a ni, Assamese ani a, Hindu sakhaw zawmtu a ni. Class kan tan phat atangin, kan in kawmngeih ve tawp! Mizo an awm ve loh vang leh North East mite chu inla engemaw deuh deuh annih vangin ka hnual deuh a, mahse, hepa hi ka bulah lo thuin, min rawn be nghal bawrh bawrh a; keilah tawngduh ve barh barh tak ka nia, kan nuidun nghal hawk hawk thei mai. Ani pawh kan hostel ep a Boy’s Hostel-ah khan a awm ve a, zingah gate bulah min lo nghak a, a thianpa leh Dingi an kal dun a, keini kan kal dun bawk a, tlaiah kan bang rual leh bawk a, ka mizopuite mit alo kham ang em aw tih chu ka ngaihtuah ve fo mai; mahse, thian kan ni a, engmah a awm lo.

“Nizan chu maw Shonali leh Nisha te awmdan a mak lutuk a” tiin thil thleng chu ka hrilh malh malh a, mak a tih ve hmel hle. Mahse, tumah hrilh lo turin ka ti a, a bu nghat a.

Sir Hitlera (A sual lutuk a, Hitler kan ti tawp) period kan kal lai chuan kan room-ah chuan Nisha-i alo lut hlawl mai, ani hi chuan Geography ala a, ka lo mengphawk hru a. Hlauh hmel zet hian min rawn melh a, Sir chuan a lo melh khui khui a, chupawh chu ngaihsak hmel apu chuang lo.

“Mag, kan hawn a ngai, Shonali a buai” a rawn ti teh ngawt a! ka tho vat a, Sir chu thil awmzia a rukin ka hrilh a, alo remti ve mial a, Santosh chuan min rawn zui ve nghal bawk a, kan pathum chuan hmanhmawh zetin hostel lam kan pan ta a, Shonali hi kan University-ah a kal ve lova, vawiinah chuan class a kal lo hrim hrim bawk.

An room-ah chuan anlo khat hmur a, ka han sawi belh leh hram duh chu, ka mizia avang hian hnam dang ho hian min nel hma ve em em a, in fak na lam nilose ka rilru hi a zau ve thawkhat a, tupawhnise min kawm duh phawt chu ka hnar ngailo; ka besawm peih viau zel a, kan Hostel-ah pawh hian hotu enin min en ve a, kan Warden pawn thurawn a rawn la ve fo thin. Tumah huat lem ka nei lo a, mahse, min hlat tum te erawh ka be luam ngai bik lo. Room chhungah chuan ka va lut a, ka thil hmuh chuan min barakhaih chiang kher mai.

Khum nghengin chhuat-ah alo thu tung a, a sam chuan a hmai a hliah chhup a, a mit meng chu hmu thei chiah lo mah ila a hmalama bang chu a melh tlawk tlawk tih alang reng mai. A kurta hak chu a ban veilam a bul a, dinglam a tlawn a, a ke chu a thi phung mai! A ke tin chu pali lai mai hi a tla a, a nat hmel kher mai. Vai ho dawihzep zia chu in hriat ka ring a, a tu amah chuan an lo hnaih ngam der lova; an lo thlir ve ringawt mai a ni.

“Shonali, i tha em? Eng nge thleng?” tiin a sam chu ka va huichhoh sak a, kareiii!! A mit chu a lo var vek a nih chu! Keipawh hnunglamah ka tawlhkir dawrh a! mahse, a maimichhing ta a, ka va kuah a, zo leh zo lovin khumah chuan ka muttir a, Nisha chuan minlo pui ve vat a, Santosh kha alo luh ve theih loh vangin chanchin inhrilh leh turin an hostel min pansan a. Mahse, va biak ka tum hrih hran lo.

“Engtika thleng nge a?” tiin ka zawt hlawm a.

“Nisha note hawh turin ka kal a, shonali hi alo awm a, thil alo chhu mawlh mawlh a; Nisha note ka enkual lai chuan, a rak thut a, a eu ngawng ngawng a, khumah a tlu a, rizai hi a pawm bet tlat a, mak ka ti lutuk chu ka hamhaih vek, atir chuan a fiamthu maw ka ti hial a lawm! Chuan, na tih hmel zet hian a rawn tap ta vak vak a, tihngaihna ka hre silo a, ka thiante hi ka au ta ringawt mai a ni” an thiannu ve tho Rani chuan ati a. Amah pawh chuan hlau hmel a pu a. Nizan lam thil thleng ka lo hriat tawh avangin mak ka ti lutuk lem lo. Shonali chu a mu khawng reng a, warden alo lut a, mak atih hmel ve khawp mai. Thil awmzia chu ka lo sawi a, damdawiin pan phawt kan ti thlu ta a, Nisha leh kei chuan kan va hruai ta a.

“Mag, ka rilru hi i tibuai reuh ee” Santosh-a ni. Mipa ngo lutuk lo, sam kir chiat mai, sang ve tawk tak, sa pawh tha ve lam a ni a, a mitmeng chu a fin hmel hle, chu chu ka ngainatna chhan tak pawh a ni, vai changkang pawl tak a ni. Bialnu a nei thin a, Angeli-i a nia, kan senior a ni. A hmeltha kher mai, mahse, a roommate nen video tenawm tak an nei ta hlauh mai a! Lesbian ani tih a hriat rualin Santosh chuan a bansan ta nghal a ni. Keimah hi inbunruah nan min hman thin avangin keipawn tihhlim ka tum nasa ve thin.

“Ti nge a?”

“Ih..ka ngai che”

Ka lo nui mai a, mipa thian hi ka ngah thin khawp a! bialpa erawh pahnih chu ka nei ve tawh, Mahse, ka zei vak lo nge minlo kawp zel a! rilru na deuhin kan inthen leh thin. Ngaihzawng lamah hian ka lerh lova, awm ve tawp ang chi hi ka ni ber; thiante ngaihzawng chungchangah erawh ka pui ve fo! |hian tam tak ka nei a, ka duhtawk ve viau tho mai.

Zankhat chu Club-ah kan kal ve a, Shonali pawh ni thum hnuah tha takin alo chhuak ve mai a; ani pawh kan hruai ve a. Santosh bakah mipa pali an tel ve a, mizo mipa hi Santosh te Hostel-ah an awm ve lova.. Ka thiante nen chuan beer kan in ve a. Lam hi nuam ka tia, lam turin Santosh nen chuan kan inkai lut ve a, nuamti taka ka lam lai chuan hnunglam atangin min rawn dap a! ka lehhawi vat a, lubuk deuh, sual hmel fahran, hmelchhe lutuklo hian rui mitmeng deuh hian minlo en a, ala nui sawng zui, ka ner khum a, ka lam leh mai a, a vawihnih nan min rawn nek pahin ka hnute a rawn dek zauh a! ka insum thei ta lo; a kawrah ka pawt a, ka beng ta a.

Thawm bengchheng tak a vangin eng nge a sawi ka hre lo, a bibo nghal daih a. Santosh chuan zui atum a, mahse, ka dang thei hram a, a thinrim hmel kher mai. Lam pawh ka tui ta lova, reivaklo hnuah kan haw ta a. Kalkawngah chuan Santosh chuan, “ Khapa kha a hmel ka la chhinchhiah alawm! Ka la hnek khawp ang” tiin ka thiante hriat ve loh turin a inhrosa a, “Ho lutuk, tiang kha chu a thleng ve tur a lawm, mi pangngai a nih loh vang a nih kha” ka lo ti a.

“Thil ho mai mai a nilo a sin, khatianga an zuam ngawt che kha ka phallo” a ti thawp sat a, ka va melh a, min lo melh ve chiah a! eng emaw ti deuh hian ka awm in ka hria.

Ka inbual lai chuan te tuarh tuarh thawm chu ka hria a, ka hmulthi a tho suau mai. Hlauhna namen lo hian min tuam nghal a; Nisha aw a ang ka ti hle. Hmanhmawh zetin ka intleuh zawk zawk a, ka petek chhuak nghal a. Ka rin ang ngeiin Nisha alo ni a. Ka inthlak vat vat a, ka va buaipui a, Shonali lah chu za em em hian a nui uar uar a, Nisha chuan Shonali melh chungin rapthlak tih hmel zet hian alo rak ruai ruai a! min hmuh rual chuan, “Amah a nilo, Shonali a nilo” a ti tuau a. Mangang takin shonali chu ka va en a, ni e, Shonali hmel pawh a ang lo, a mit chu a sen rum a! a sam thur bum chu a phelh hiang; a mit hnuailam chu a duk phei ruih bawk a..a rapawm lek lek a ni. Warden a awm loh vangin ka mangang kher mai. Mizo thenkhat lo lute chu ka lo bekbawr a, “ Hawh u, tawngtai mai ang u” ka ti ta ngawt a.

A vawikhat nan mi lu chunga kut nghatin ka tawngtai ve ta anih chuu!! Zahthlak ah pawh a ngaih theih tawh loh. |hian dangte pawh chu an tawngtai ve nghal a, kan tawngtai lai tak chuan Shonali chu a awmtha viau. Nisha chu an rooma a riah ngam ngang loh vangin kan bulah a lo riak a, mahse, Shonali han hnutchhiah ngawt chu zialo ka ti si..ani lah muhil tui tak ang mai a ni sia. Kan zawn phei a, khum kan dawh zawm leh a, kan mu ho leh ta a.

“Nisha, engkim sawi vek tawh rawh le, anih loh chuan ka buaipui duh tawh miah lovang che u; hman zana thil thleng atang khan sawi tan la” ka ti ta a. Hman zana thil thlen hnu khan ka zawh fo pawn, “Engmah a ni lo; ka mangchhia vang a lawm” tiin a pha char char a, Shonali lah tikhan damdawiinah a awm zui ta bawk si. Engemaw chu a awm chiang a ni.

“Umm, nia kan sawi tawh ange. Hman zanah khan, shonali nen movie kan en dun a, chutia kan en mawlh mawlh lai chuan, current a rawn thim thut a, midang room kha a eng vek sia, mak kan ti lutuk a, mahse, rei vak loah a rawn awm veleh mai a; ka pum a nawm loh vangin inthiar turin toilet-ah ka lut a, ka inthiar lai chuan, shonali leh tu emawni inbe thawm ka hria a! mahse, Shonali biak chu mipa aw ni tlat hian ka hria a, a thum bul bul mai si. Ka inthiar zo a, an la tawng reng avangin ka chhuak duh lova, ka ngaithla ta ringawt a..Mipa aw chuan, “i ti ngei tur a ni; i nunna hi ka duh chuan ka la thei; ka sawi apiang ti ang che” a ti a! Shonali chuan tap deuh pur hian, “khawngaihin hetiang hi chu min tihtir suh” a ti lawm lawm a. Mipa tawng chu a reh ta a, ka va chhuah chuan, Shonali chu amah chauhin alo awm a, bang lam hi a lo hawi a. Ka ko a, alo hawi chuan a mitmeng chu a dava vek! Ka sawi thiam lo; min hmu awm hmel pawh hi a pu lo, mahse, nui chung hian, “ A lo thleng, a lo thleng ta” a ti ringawt a!

“Eng maw lo thleng?” ka tih chuan,

“Nisha, tuma bulah sawi suh ang che aw; Thuruk ka hrilh ang che, ih maw..kan room ah hian ramhuai a cheng ve a ni” a ti ta mai a! a fiamthu anih ringin ka melh reng a, mahse, a thutak kher mai. Ka hlau ta viau lehnghal a! chuan, rapthlak deuh hian a meng thut a, ka hlau lutuk kha ka lo tlan phei tawp maia ni. Chuan, tihngaihna ka hriat loh vangin “A thleng ta” ka rawn ti ve ringawt a nih kha..chuan zanah khan Shonali khan sawi lo turin mitmeiin min khap nasa lutuk a, ka thianthaber a ni a, ka sawi chuan nuamlo a tih phah ka hlau a. Chuan mak deuh chu ka zan mu khan mumang nge a tak tak pawh ka hre lo, eng emaw hian min zem chiai chiai a, Shonali leh mipakhat hian min buan a!

Mipa chuan ka nghawngah hian alo rek bet tlat a! mahse, Shonali khan, “thlah rawh, ka thiannu a nih hi” a lo tia, min thlah hma khan ka mangang lutuk kha ka lo auchhuak ta mai a ni. Khatia ka auchhuah a Shonali ka va en khan awmze nei deuh hian min lo mitmei a, ka mumang kha a hre vek a nih ka ring ta hial a ni. Diktak chuan amah hi ka tih tawh, ka hlau ru ngawih ngawih! Room danga insawn ka duh “Nisha chuan English chhumbung deuh deuh in a ti a. A thaw hawk a, ka khawngaih angreng hle. Shonali chu tuitakin a muhil bawrh bawrh ni mai hian a lang a; Dingi pawh chuan a hlau tih ka hre mai, keipawh hi engteh ual chu ka ni bik lo.

Shonali bulah ka mu a, mutthilh chu a har ve viau ! hostel kan luhtirh laite kha ka ngaihtuah kir a. Dingi nen Mizoram house atangin kan inthiar chhuak a, Hostel kan thlen chuan tlai dar 6 a pel tawh a, kan room turah kan han lut a, kan inrem vel lai chuan Shonali hi alo lut a, a vun chu a ngo in a no hle a, salwar eng hi a ha a, a sam chu a phiar a, keiaiin a sang hret maithei, a hnar ngul chu vai tih takah a sangin a zum tha hle, a mitmeng pawh vai tih a hriat. A lo nui sang a, a hmeltha ka lo ti hle anih kha. Chutihlai chuan Nisha hi alo la lut ve lo a, amahin shonali chu a awm a ni. Zanah pawh chuan min rawn pui a, English a thiam hle a, bakah a changkang ru riau! Middle class vel a ni tih alang reng. An chhungkaw chanchin te a sawi luam a, apa hi Bussinessman anih thu leh anu chuan Restaurant a siam thu te, anau hmeichhia pahnih an boral tawh thu leh amah leh a u chiah mipa an nih tawh thu te a sawi luam a.

Ka khum lu lam bangah chuan Isua lem hi mawi deuhin ka frame a, ka tar a, chu chu a hmuh veleh “In Pathian hi a hmeltha ngawt mai” a ti a! a nui ver ver a, Isua hmel tak tak anih leh nih loh phei chu kan hre bik law…Room inhnaih te kan nih vangin kan in kawmngeih chho nghal mai a, Nisha a rawn luh hnu ah pawh kan la inlenpawh chamchi tho a, hnam hrang kan nihna chu kan ngaipawimawh tehchiam lo a ni. Khatihlai khan Shonali hi danglamna nei awmin ka hmu lova; mi fel leh kawm nuam tak, thil phal tak, hmangaihna la thutak ve tak niin ka hria, a bialpa nen hian an inhau reng thin a, thikthu avangin. Mahse, an inthen ngai chuang lo; a bialpa thlalak te hi a mutpui thin a, distance relationship anih vangin, phone an hmang tangkaiin, an inbe rei thei khawp mai.

“Hmm..Hmmmm” ka bula mu Shonali rum tiah tiah chu ka en vat a, a mit vun chunglam chu a phu der der a, ka sir lehlama mu Nisha lah chuan minlo sik ngar ngar a, ka harh lo emaw ati ani ngei ang, a na phian lehnghal a.

“Shonali, Shonali”

“Hmm…min thlah rawh, kal bo rawh” Hindi hian a ti a; a kut chu a humruh tlat a! a hmai chu a thle tawn sek bawk a, tihngaihna ka hre bik silo, hlau chung chungin a samah chuan ka kek tho ta lawp mai a! a harh chiang ngang mai; min rawn en hu a..tui ka in tir a, a thaw hrawp hrawp a.

“Shonali, eng in nge tibuai thin che?”

“Amah khan”

“Tu amah maw?”

“Ramhuai”

“Eng a?!” makti zetin kan inmelh kual a, lungngaih hmel tak hian a kun reng a.

“Enteh Shonali, Ramhuai an awm hleinem, kan Pathian in Ramhuaite chu a thunun tlat a lawm”

“Ni e, Shonali, kristian-ah lo inlet ve daih rawh” Dingi chuan a lo ti hmanhmawh a, a hlau hmel chu a thup thei bik der lo.

“Chutiangin sakhua na lama kaihluh chi a nilo; Ramhuai hi an awm a lawm, chiang takin ka hria a ni” a ti ta tlat a! zep loh chuan keipawn a awm chu ka ring tho mai; mahse, kan hostel-ah kher a rawn chet hi chu ka ring phak lo.

“Engtia tih chi nge ?”

“Ka hre lo, a thil min tihtir tum hi ka tih mai a ngai ang”

“Eng nge chu chu?”

“In la hre mai ang” a mu a, rizai chuan a in lukhup ta daih a! Dingi hnenah chuan, “Pastor Sanga kha pun mai chi a niin ka hria” ka ti a.

“Intatlut lo law law zawk ang, buaipui tawh lo mai rawh”

“Mahse, min rawn tibuai zel tho si se”

A ngawi ta reng a.

“Santosh, Hindu sakhua-hian ramhuai hnawhbo nan eng nge intih ve thin?” ka ti thawr a. Maktih hmel deuhin, “Puja te an nei a, Baba puithiam ten bawlhlo hmangin an sawngbawl a, ramhuai chuan an hlau khawp mai” a ti a, ka nuih a za ru hle. Thil awmzia chu ka hrilh a, Mandir–a hruai turin thu min rawn a, Shonali bul hnaiah a tamlo thei ang ber awm turin min ti bawk a, keipawn lo sawi puang lo turin ka ngen bawk a. Gate kan thlen hmain min kailet thut a, kawngpui lehlamah min kai phei dawr dawr a, Chinese Restauranat-ah chuan min luhpui ta ngawt a! a chetdan chu mak ka tiru kher mai.

“Tiang khan mizo boys an awm ve thin em?” a ti a, a nui sang a.

“Ti ve tho thin e” ka ti mai a.

“Mag, thil hriatchhuah ka neih zawk vang a nia, zanin hi thla bial zan a nia; chuvang chuan Shonali hnaiah awm lo la ka tia, hotel ka book sak ang che aw” a ti ta daih a! ti nge vai ho hian puithuna hi an atchilh viau le..ka nui ringawt a.

“Chuvang chuan maw min kaih let leh? Ka va awih chiah lo ee, chhuanlam tur dang i hre lo mi?”

“Tak tak alawm, i chungah hian thiltha lo tak a thleng dawn in ka hria”

“Han sawi chiang deuh teh”

“Tuma bulah sawi miah suh aw, ka putea fanu hi ramhuaiin a tibuai thin a; chuan, amah buaipuitu ber a nau hmeichhia hi a hnuah chuan a that hmiah asin! Midang chu tumah a tina lo; chutiang chu i chungah a thleng ve ang tih ka hlau ani, Shonali hian a rawn pur zel bawk si che a” a thutak hmel kher mai, min ngaihtuahna avang chuan ka lawm khawp mai. Mahse, kei chuan pathiante Pathian ka nei alawm, ka ti rilru a.

“Santosh, ka lawm e, min ngaihtuah a, mahse, a thleng lovang, ka tiam a che” ka ti a, ka kut a vawn na chu a thlah hmak a; mitmeng ngaihnobei vaklo hian min melh a, ka lo nuih var var a.

Gate a ka luh dawn chuan, “Mag, engpawh thleng se min lo hrilh ang che” a ti sap a. Ka bu nghat a, ka luhsan ta a. Shonali te room-ah ka dak zuai a, Nisha chu alo in khung mek a, room dangah insawn a tum tih ka hre mai; Shonali chuan ngui takin alo thlir reng a, min hmuh veleh chuan a ding a, “Han hrilh ve teh, ka hlauhawm lo tih hi” mangan hmel zet hian a ti a.

“Nisha, tun tut tut a chhuah kher a ngai em ni? shonali pawh a zia viau tawh a lawm; i khawngaih ve lo mi?” ka ti a.

Min kai chhuak a, zawite hian, “Kan hostel-ah a lar tawh lutuk, keipawh min ringhlel vek tawh, chuvang chuan ka zahawmna humhim nan ka chhuah a ngai a ni” a ti sur sur a! zahawmna chu engtin nge maw alo teh thin le.

“A buaina saw thuhran, nang a thianthaberin i chhuahsan leh si chuan, a natna saw a zual tulh tulh ang, Nisha, Hospital-ah i hruai leh mai zawk ang u” ka ti a.

Dinner ei hnuah Shonali chu Hospital-ah hruai kan tum a, naktukah a nu leh pate pawh anlo thleng dawn tih thu te kan hria a, a thlamuanthlak ta deuh e, Nisha pawh chuan insawn a tum chu a thulh leh ta phawt a. Mahse, Shonali chuan Hospitala kal chu a duh ta tlat lo mai a!

“Ka tha tawh alawm, engmah buaina ka nei tawh lo” a ti a, a tang nasa viau mai si; zanin chu enchhin phawt ila; naktuakah a chhungte an lo thleng dawn tho bawk a..tiin kan thulh leh ta a. Ka pa in min rawn bia a, thil awmzia chu ka hrilh a, tawngtai nasa tur in min fuih a, ka nuin alo hriat chuan, hmeichhia tih takah min lo hlauhthawnpui a; Mizoram House a riak mai tur ten min rawn ti a, ka pa nen an inhnial bap bap chu ka ngaithla reng a. “Bawihte, dawi thil a ni maithei a nia; fimkhur rawh, a bulhnaiah awm miah suh” a rawn ti tawk tawk a.

“Mawina, ringtu i nih kha, tanpui ngaite chu puih zel tur, hlau reng reng suh, Pathianin a awmpui tlat ang che u” ka pa chuan a ti thung a!

Kohhran Upa nge nge, pa zaidam deuh, huaisen ve tak a ni a; ka nu erawh hi chu mitthi te hi hlauh chang a nei tlat thin. Ka u hmeichhia hian ka nu a chhun a, a dawih ve khawp mai; kei erawh ka pa lamah ka kal hlauh a; hlau ve tho mahila engpawh fiah duh tlat thin mi ka ni ve a.

Ka mizo pui te room-ah movie la turin ka kal a; Shonali chanchin hlir anlo sawi a, an hlauh zia te, amah hrim hrim pawh hi a rapawm an tih zia te leh a kawchhungah ramhuai a lut nia an rin thu te an sawi bawrh bawrh a.

“Zanin ah in riak ho leh dawn a mi?” anti a. Ka lo bu nghat a, huai hi min tih hmel tawp! Lehlam takah chuan kan riah ho pawn chutianga hlauhawm em em turin a awm chuang lova, ngaih erawh a ti tha lo deuh a ni mai a. Zanin bak kan riak ho tawh chuang lovang, a chhungten an rawn lakchhuah hrih ka ring. Hospitala kan va hruai khan doctorte chuan tih vak ngaihna an hre lo, a chhan chu a pangngai leh vek bawk si a ni.

Movie chu kan en a, Nisha leh Dingi chuan checker an khel a; shonali pawh chuan a laptop rawn chawi pheiin Hindi film, Amir Khan channa a en a; amahin a nui a nui a. Zan dar 11 pelh hlekah mu turin kan in puahchah a, ka hmai ka phih lai chuan Shonali chu a rawn lut ve a, “Mag, nang chuan min hlau ve lo tiraw?” a ti a, a hmel chu a khawngaihthlak lek lek.

“I hlauhawm lo tih ka hria lawm” ka lo ti ve mai a, “Ka lawm e, nia, tumah tihnat ka duh lo” a ti sap a.

Whatsapp group pakhatah thlahrang chanchin an sawi a, hlau ru deuh in ka clear pawp a, data ka off a, ka phone chu lukham bulah ka dah a, ka saisir a, ka bulah Shonali chu a mu a, ala muhil bik lovin ka hria. A kil berah Dingi a mu a, Nisha in a dawt a, Shonali, kei a sir berah ka mu a, khum a zau vak lova, insi cheta mut a ngai a; khua a lum avangin fan kan on tlaivar mai thin. Ka khum bulah chuan tui ka inchhawp a, ka lukham sirah Bible ka dah bawk, Vawiina Santosh thusawi khan ka ngaihtuahna a luh ngut ngut a, thla lah chu a eng pum mai bawk nen..zep loh chuan ka hlau lo lem lo. Ngaih tih that nan Pathian hla ka ngaithla a, Andrew sak, “Min vengtu chu Lalpa a ni” tih hla kha ka repeat tlut tlut a.

Ka muhil tan siar siar tihah current a rawn thim ta thut a, Shonali chuan min rawn kuah chawih a! thawk pawh thaw tha ngam lo hian ka meng kur a, Dingi leh Nisha chu an muttui hmel phian..Nisha phei chu a hnar deuhin ka hria. Shonali khur ru zawih zawih chu ka hria a, min tihlau thar leh vek; Current chu a rawn eng leh pup a, ka thaw huai mai. Ka thlan tla hluam chu ka hru fai a, pyzama leh tawnzau nen ka mu a, thawmhnaw ti hrep hrup nena mut hi ka thiam lo. Ngaihngam deuhin kan muhil ve thei ta hram a.



“Dingi, minlo chhan teh uuu, khawngaih takin min thlah rawh,” tiin ka lo au tuar tuar a! min bawhbet tlat tu thil rit tak chu ka lo nam tang tang a, ka beng bulah hian a thaw ham ham a, ka nghawng vel te chu alo fawp kual a, ka dul thuar laite chu alo liak duai duai a! ka kawr chu a kuttha chak zet chuan a hlim chho a, ka hnute chu a fawp dawk dawk a! ka hlauhna leh nuam ka tihna chu a inzat thuak awm e. Dingi muhil tui lutuk hmel chu ka va hmu a, ka bula Shonali mu chu a meng kur ni hian ka hria a, Nisha erawh a inlukhuh tlat avangin ka hmu thei lo, Dingi chu ka ko vak vak a, a harh thei silo, Shonali chu sih harh tumin ka ban a, a mit lianpui chuan min lo melh kul mai a! rapthlak zet hian ka hmai zawnah chuan a nui then thu a! ka hlau lutuk chu ka rak tuar a!



Lukham sira Bible ka dah kha ka hrechhuak a, lak tumin ka kut chu lek kan k’n tum a, ka che thei der lo mai, ka thaw hlawp hlawp a, Ti nge Ding ital chu a harh theih loh le..ka rak nasat sat nen. Ka manganna chuan a vawrtawp a thleng tak meuh a ni. Ka pa thusawi, “Tawngtai nasa rawh” a tih kha ka hrechhuak a, ka thluak nu but but leh mumallo tak avang chuan tawngtai reng reng ka lo ngaihtuah thei lo a lo ni.

“Lalpa, min pui rawh, min pui thei tih ka hria” ka ti a, chu ramhuai (?) min delh tu chuan a thiltih lai chu a la chhunzawm zel a, ka kekawr a pawtthla tep tawh tihin, “Ramhuai bawlhhlawhpa, ISUA hmingin kalbo rawh” ka ti tuar a! a per leng lawp ni mai hian ka hria, min delhtu awm ta lo avang chuan ka thaw huai a, Chutah kan bath room a darthlalang kan dah chu a rawn tla keh chhuai a! chu thil ring tak avang chuan ka mutna atang chuan ka tho chhuak ta hlawl mai a! ka harh chiang kher mai. Chu MANGCHHIA zet chu le’h!!



Ka khur nasa lutuk tihreh nan ka ke chu khum atangin ka hlang thla a, tui chu ka in khawlh khawlh a. Chhuatah chuan ka ding reng a, ka tha khur chu a ziaawm deuh. Dingi chu ka mumang ang chiah khan a muhil tui hle mai, Nisha pawh a inlukhup a, Shonali chu a zangthal zawngin a mu a, a thaw chu a rang kher mai. Engkim chuan min tibuai takzet a ni. Ka mumang a nilo aniang tih rinna ka nei a, ka han indap vat a, hlau em em in ka ding ngil zawt mai! A chhan chu ka bra chu ka hnute chungah alo tawm chho daih a! ka hnute leh dul vel huh hliam chu ten zetin ka nuai a, ka tah hi a chhuak ut ut mai, ka luak chhuak lutuk bawk chu bathroom-ah ka va lut a, Darthlalang chu a ngaitein a lo la inkhai a, Darthlalangah chuan ka hmel chu ka va bih a, Kareii!! Keimah ka nilo emaw ka inti hial..ka hmai chu a dang var pap a! ka mitmeng chu hlauhna hlir hian a khat bawk a, commode-ah chuan ka luak ta bawrh bawrh a. Ka ngaihtuahna chu a fim hlawl lova, eng nge thleng tih pawh ka chhut thiam lo.

Room-a ka va luh leh chuan ka per dawrh thei hial! Shonali chu Dingi chungah chuan alo bawk a, rehhlum a tum ni in ka hria, chutah zet zawng ka mumang kha dawt a ni tih ka hrechhuak ta nghal a! ka aw neih zawng zawngin ka au ta tuar tuar a, Shonali chu rang takin a chhuk a, Dingi chu khuh bawrh bawrh chungin a rawn tho a, A hamhaih takzet a ni. Kan room kawngka chu rang takin ka va hawng a, kan thian te chu tho phang hmel zetin an lo tlan mek a, nuiri mak tak ka hre nghal, ka lehhawi vat a, Shonali chu khuma thingthi hian alo nui uarh uarh mai. Dingi chu a awrawl tawp in alo au ve bawk a, engkim chu a rapthlak lutuk a, awm ngaihna hlawl ka hre lo. Dingi awn riai riai chu ka va dawm a, thidang awm reng a ni e.

Bible chu ka la vat a, kan thian lo lut te chu hmui hup chungin an ding khur hlawk hlawk a! tlanchhiat inpeih at hian room chhungril pawh an rawn lut ngam lo. Bible chu khur ru der der chungin ka keu puat puat a, eng bung leh chang nge maw ka chhiar chuan ang le..hamhaihna leh hlauhna inpawlh chung chuan engmah a ngaihtuah theih loh, “Dingi hi va buaipui ruuu” tiin ka au tuar a, mizo thenkhat chuan Shonali melh hrek hrek chungin an va buaipui a, Shonali chu a nui tawh lova, chunglam athlir a, a mit chu a var vu a! a sam a thlah hnuang bawk si..warden a rawn lut a, a rak thawt mai. Ka hnungah a ding a, “Eng nge kan tih ang?” a ti a.



Hmeichhe hlang kan ni a, mipa chak leh huaisen kan mamawh a ni. Boy’s Hostel lama va zualko turin ka ti a, rual khat chu an chhuak ta a. Bible chu ka zuk bih a, kum 19 ka nihin ka piangthar a, mahse, hetiang indona hi vawikhatmah ka la hmachahwn ngailo, kan Pathian rintlak zia pholanna remchang pawh nise..hnawl ka duh, vai ho lah chu a then chuan zun te hial anlo cheh hman nia mawle!

Chhiar tur ber ka hre silo a, Shonali chu a rawn rum tan ta, a aw kha chu hriat tur a awm tawh lo, mipa aw a ni ta! Bible keng chung chuan, “Kan pa, van ami, i hming zahawm rawh se..,” ka ti a, mizo tawnga ka sawi avangin min zawm ngaihna an hre lo a, Hnam dang Christiante chuan, mizo ho chuan min rawn zawm ve ta vat a. Mahse, shonali chu a danglam chuang lo, mipa ho lah chu an lo thleng har hrep a!

“Hospitalah hruai vat ang u” Ajay-a, Boy’s Hostel prefect chuan a ti a, rap hmel zetin Shonali chu a melh run bawk a. Shonali chu va man beh an tum a, mahse, dawhkana nimbu vel nana ka hman chemte chu ala vat a, “Min rawn hnaih hlek suh u” a ti thum ta chher chher mai. An tawlh let dual a, Santosh-a ka zawng a, ka hmu miah lo! Nagamese tlangval, Christian chuan ava hnaih a, a rosary chu a hmet niap niap a.

“Tu nge i nih?” a ti a.

“Ramesh-a ka ni” a ti a.

“Engvanga he nula hi tibuai nge i nih?”

“Ka thu a awih loh vangin”

“Chu chu eng nge a awmzia?”

“Tihtur ka hrilh a tih duh loh vangin”

“Tunah hian chhuahsan nghal turin Isua Krista hmingin thu ka pe a che” a huaisen tih a tawngka chhuak atang chuan a hriat hle.

“He nu hi ka chenchilh reng lo, ka hmanrua mai a nih hi, ka in tak tak zawk chu midang anni”

“Chu pawh nise, i in tak tak leh he nu nun atangin kalbo ang che, Isua Krista in ramhuaite a hneh zo tawh, Lalpa, he ramhuai bawlhhlawh hi min hnehsak rawh” tih pahin a Rossary chuan Shonali chal chu a va nem a. Shoanali chu a rak thawt a! a thal ta huang a.

Hospital-ah enkawl turin an zawn chhuak ta a, Nisha chu ala inlukhup reng tih ka hriat chuan ngaihtha lo takin a rizai chu ka han hawng a, Lalpa leh!! A mit chu a lo meng ru a, a lo thi khawng reng tawh a nih chu!! Eng thil chiahin nge min bawhbuai ta le..Police station-ah Dingi nen kan inlan ta zak zak mai. Postmortem result-ah chuan rehhlum a ni tih a lang a, Shonali kawchhunga mi bak kha a ni thei lo. Police te pawn min chhuah zalen ve ta a, thah nachhan tur kan nei lo em a tin ni. Kan Hostel chanchin chuan mipui beng athleng lo thei lo a, chanchinbu leh Tv lamah te an chhuah ta chuai chuai mai. Kan mizo pui, Delhi a awmte chuan min ngaihtuah hlawm em em a, kan pastor phei chuan an ina awm hrih turin min ti hial a ni. Mizo welfare ten min bepawp reng bawk a, mizo nih hi a va nuam em..Mizoram lamah nise min tawngtaipuitu tamtak an awm tih kan hria a, kan thla a muang viau. Shonali pawh a chhungte anlo thleng ta bawk a, tunah chuan damdawiinah ala awm a, a taksa chu zan khat lek chhung khan alo chau hman viau mai a, thu zawh ngam pawh ala nilo. Nisha chu a chhungten a ruang an rawn hlawm a; ka khawngaih takzet! Ka ngai dawn hle bawk.

“Santosh, engvanga rawn lang ve miah lo nge maw i nih le?”

“Ka tihpalh takzet! Ka haw kha Angeli nen kan inbia a, a nun sima ka hnena lo let turin ka sawm leh a, mahse, min hnial fithla thak a, tuna a awmdan anga pawm mai turin min ngen zawk mah a, ka thei bik silo a, kan inhau hrep a; ka rilru na leh thinrim bawk si kha Bar-ah ka kal a, ka va in ta nghek a, ka chatthla daih a lawm! Ka harh leh te chuan kan Hostel gate bulah ka lo mu reng a, ka zah zia chu a..tu phiangsenin nge khalai hmunah khan min hnutchhiah ni..” a ti tun tun a. Ka khawngaih ve bawk sia, ka ngawihsan ta a. Tlaiah kan project avangin an hostelah chuan ka va kal a; hmeichhia chu kan lut thei vek a. Ka leng ve zeuh zeuh, kan subject a in an vang hian thil tih turte chu kan tidun mai zel a. A roommate Yadav-a hi ka nel zawng a nilo a, hang deuh, meng rum thei deuh hi a nia; a tawng ngai mang lova, ngawi rengin alo thu ve mai mai thin.

Khami zana thil thleng kha chipchiar takin ka hrilh mawlh mawlh a, Yadav-a chuan ear phone a vuah vangin a hre lo turah ka ngai a. Ka taksa a khawih dan vel ka sawi lai chuan santosh chu alo nui deuh a, a bengah ka va pawt a, “eng nge nuihzatthlak awm a? min khawngaih lo mi?” ka ti a.

“Khawngaih e, mahse, i hlau hmel tur ka mitthla a, ka nuih a za a lawm” a ti a. Ka tum hmak a.

“Mag, khatiang kha INCUBUS an tih ang chi hi a ni thei mailo maw? thlarau hur, zan mutthilh laia hmeichhia sex hmanpui thin ang kha..” a ti leh hluai a..

“Keipawn chu chu ka ring ve tho, mahse, Shonali kha a harh kur bawk sia! Shonali kawchhunga ramhuai kha anih ka ring”

“Nia, chu thlarau pawh chu Incubus a ni thei tho a lawm, ka van hnek chak ee” a ti a. Kan tihtur kan tih zawh hnu chuan, zung turin Bath room-ah a lut a, Sydney Sheldon lehkhabu a neih ho chu ka la chhiar loh ho ka enkual a; Yadav-a chuan ka hnunglam atangin ka beng bulah a rawn tawng a, a thusawi chuan min barakhaih kher mai! Ka lehkhabu ban mek chu phek khat ka keu a. Ka khup leh ta a. Santosh chu a rawn chhuak a, min thlah haw ta nghal a.

Ka khawsik chu a nasa riau mai a; ka pang a rawn sa hluah a, ka taksa pengtin hi a na ngut ngut thin a, Dingi pawn min manganpui hle. Ni 3 hnuah chuan inentir turin kan chhuak ta nge nge a, ka chhungrilah hian min tham tu eng thil emaw hi chu a awm a ni. Ka sawichhuah theih loh min mwlh tlattu chu tihkian ka duh takzet a ni. Hospital-ah chuan ni 2 lai ka awm ve a, ka thianten min rawn kan thin a, ka khua a har vak lo. Shonali’n min rawn kan erawh mak ka ti hle! A chhan chu damlo hmel a pu tawh lova, ka hmuh hmasak bera a hmel pangngai ang kha alo pu tawh a ni.

“Mag, i chungah thil ka tisual a ni, engmah kha ka hre fumfe tawh lo naa..ka tihlau che a, hrehawm takin ka siam che a, ka duh vang a ni bik miah lo tih chu i hria ang tiraw?” inthlahrun hmel em em hian a ti a.

“Khatiang thu kha sawi tawh suh, thian kan ni a, kan ni reng bawk ang, Nisha case kha engtin nge a kal zel tih ka va hre chak ve”

“Karleh thawhlehni khian kan court dawn a, ka ukil hi pa fing leh remhre tak a ni a, bakah Nisha kha ka thah a ni lo, chu chu nangpawn i ring bik lo em?”

“Nisha kha i that theilo tih ka hria, mahse, i chhunga awm thlarau sual khan a tilui che anih ka ring”

“Ka hriat chhun chu maw, mipakhat hian a lo bawhbet che a, mahse, min thununtu avangin engmah ka ti thei lo” a kun a, a mittui tla chu ka lo hmu reng a, ka khawngaih hle.

“Nisha kha chu engmah ka hre lo a ni, ka ti tak tak” a thusawi chu ka ring thlap, engmah a hriat ka ring lo.

Hospital a ka awm lai hian Santosh a rawn lang zing hle; eitur tuihnai tak tak min rawn ken thin a, a hlu ka ti khawp mai.

“Angeli nen chuan inla inbe ngai em?”

“Aih, bialpa a nei leh tawh alawm”

‘Bialnu dang nei ve tawh mai la, Karisma pawh khan a duh em che kha”

“A la hun lo” a ti mai a, vai ho tak hi chu a..

Ka chhuah zan chuan thiante an lo leng tiam tiam a, ka phone ri ral ral chu Dingi chuan min rawn pek pahin, “Ve teh tlat a! in lo inbe thin e lo?” a ti a, a nui sang a. Ka phone screen-ah chuan, “Christopher” tih alo lang kuau a! tudang ni lovin Shonali kawchhunga thlarau sual hnawtchhuaktu Nagamese kha a ni. Balcony-ah ka chhuak a, ka va be sawr sawr a.

Thil thlen atanga kar 3 a liam hnuah chuan, kan room ep chiah ami, Gita-i chu Shonali ang khan a awm ve ta! Shonali kha hostel-ah a rawn let tawh lova, an University Hostel-ah a insawn tawh a, an room chu tuman luah ngam hek lo le a ruak ta reng a, kan room pawh hi Dingi chuan chhuahsan a duh hle a, mahse, insawn buangbar vel kha ka peih lo a, thil thleng a awm leh tawh lo bawk nen, Damdawiina ka awm chhung kha chuan thiante room-ah a riak thin a.

Gita awmdan chu a thang chak leh hle ta mai a; a roommate in a chhuahsan nghal a, tichuan Gita avangin thlarau sual leh hur chu kan dahtha thei tawh dawn niin ka hria a, Gita chuan kan room a rawn luhchilh leh ta ngei a! Dingi mangang tawp khawk tawh chuan min chhuahsan ta. Mahse, alo kir leh vat chu ka beisei. Thla pawh a eng chho leh viau tawh a, Gita chu hospital-ah kan dah hrih a, keipawh ka thiante tho mahnia inluah te bulah ka riak zeuh zeuh a, thla bial zan nghah tlawk tlawk chu a ninawm zawk hial!

Thla bial hma zanah Gita chu kan lachhuak a, pangngai takin a awm a; a dam ta maw ka ti hman hial. Thla bial zan chu kan thleng ta, ka thiante chuan min ngei lek lek tawh zawk a; mahse, engmah an hriat loh vang a ni, chet kan la thei tep tawh e. Warden ka zuk hmu a, kan inbiak zawh chuan, “Fimkhur rawh aw,” tiin min ngaihtuah hmel takin min thlah a. Thli chu a thaw vuk vuk a, mahse, arsi pe tuar leh thla bial kulh chu ka en a, ka inngaihtuah thinrim a, zanina ka hlawhchham chuan ka hming hi Maggie a nilovang tiin ka insehruh a. Mipakhat ka call a, kan inbiak zawhah indona hmachhawn turin room-ah chuan ka lut ta a. Gita chu Dingi khumah a mu a, a muhil tui hle mai, keipawh mu turin ka inbuatsaih a, light ka off a, ka maimichhing ta a.

Thaw ham ham thawm chuan min tiharh a, tun tum zawng mangchhia a ni ta lo; Gita chu a nui sang a, alang hmeltha kher mai; min rawn bawh a, ka nghawng chu a fawp dan dan a, muhil ang chiahin ka awm leh tlat a! min sawngbawl dan chu Gita kha a nilo tih ka hre thei, Gita kha chu nula zakzum leh thutak deuh, tawng tlem tak a ni a, rilru thianghlim tak a ni ang tih pawh ka ring, tuna ka chunga rawn bawk erawh hi chu Gita ni lovin AMAH kha a ni! light ka on thut a, a mengphawk kher mai.

“Gita, ngawi lawk, zu tlem lem phawt ka duh; nuam taka siam tur che chuan” ka ti a, ka aw khur chu thup hram hram ka tum a, nui sen sen chungin ka chung atang chuan a chhuk a, chhuatah a ding a. Tui ka in a, zu zawng niawm takin Almirah-te chu ka hawng a, hrilhhai hmel thei ang berin, “Oh! Gita, zu ka lo nei tawh reng reng hleinem, zan ala rei lutuk lo bawk a, ka thianpa ka va lak tir lawk ang aw, Boy’s hostel a mi saw a nia” ka ti sar sar a. A tawng lova, mitmeiin min chhang a. Ka chhungril hlauhna chu a rawn hria ang tih hi ka va hlau tak em..

“Naaaah, Santosh hi a phone a off tlat! Ka van ngei tak” ka ti a, alo nui kur kur a! number pakhat ka hmet leh a; “Zu min va lak rawh, khawngaihin, gate ah ka rawn lawn liam ang” ka ti a. Lehlam ami chuan, “Ok, ka hrethiam e” alo ti var a. In dona chu hei le..

Minute thum vel ngawi renga kan thut hnu chuan, kan room kawngka chu an rawn kik ta a, Gita chu atho zawk a, makti hmel leh hrilhhai hmel a pu a; kawngka chu ka va hawng a; Yadav-a leh sanjay-a an lo ding a, lo lut turin ka ti a, an hmel a hmuh rual chuan, Gita chu a tawlh hnung a, mangan hmel zet hian a phun bul bul a, Yadav-a chuan a chip samah a va tham a; chuta Gita insiam chhe hmel chu tun thlengin ka mitthlaah ala cham thin, a mitmeng lian zet chu a var vek a, a hmui chu a tisawi bui a, a ha chu a then thu bawk a! mahse, Yadav-a chuan a hlau hlek lo mai, Sanjay-a chuan a rawn pui vat a, rak ruai ruai chungin a tawlh hun hun a, a kawr te chu a phelh a; a hnute mawi takte chu a tham nawk nawk a, ka lo en tlawk tlawk ringawt. Mipa pathum an lo luh belh a; hmeichhe ho pawh mutkawr nen thlabar zetin anlo tlan khawm hiang hiang bawk a.

Gita chu an zawn a, Boy’s hostel lam panin an kalpui ta a, ka zui ve zel a, kan warden pawh phur hmel deuhin a rawn kal ve a, Boy’s hostel chu a eng ut a; Hall-ah kan lut phei a, mipa ho chu thinrim hmel fahran hian an lo ding laih a. Gita te tuar tuar thawm chu a zawi tial tial a, a rum ta tiah tiah a, dawhkan seipuiah an mut a, a chauh hmel kher mai, a rawn meng diar diar a, “Eng nge thleng a?” hlauhthawn hmel zet hian a ti ta a. A kut ka lo vawn sak a, nelawm thei ang ber in ka lo nuih a. A bula mu ve mipakhat chu a zuk melh a, makti zet hian min rawn en a.

A bula mu chu, a rum vak vak a, a insehruh a, a ke a leng vak vak bawk a; Yadav-a khan a zuk thing nawk nawk a, a rawn mengchhuak ta hlawl mai, a mit chu a sen rum a! min rawn hmuh chuan thinrim hmel zetin a ner sawk a, ka lo nui mai a, ka va pan a, “Le, Santosh, thudik kan ngaithla duh a nia” ka ti ta sap a.

Santosh-a ka rinhlelh tanna chu Shonali buai zana a rawn lang ve miah lo kha a ni, a tuka a chhuanlam kha ka awih lo hul hual! A chhan chu zu pangngai a in ngailo tih hrechiangtu ka ni a, Angeli pawh kha ama then zawk a nia; rawn biak a tum pawn reject hmak hmak thin a ni, beer chahthlak pui tur khawp chuan a intam angai dawn lutuk a, khatianga harhvang leh phur khan a tho theilo tawp ang. Chuan an hostela ka kal khan ka rindan chu a rawn tinghet ta hmiah mai! Yadava thu min hrilh kha..

“Santosh hi mi hur tak a ni, hlau rawh” a rawn ti a nih kha!! Mahse, ka la ngaihruat thiam chuang lo; Lehkhabu ka hmuh hma kha chuan engtia tinzawn tur nge tih ka hre lo. Lehkhabu ka hmuh khan..a kawmah chuan pitar hmelchhe deuh thla alang a, ka keu a “Dawithiam” tih ringawt hi a lo chuang a! santosh-a a lo lan tak a vang khan ka khup leh ta a nih kha. Khami zan khan Yadav-a nen kan inhmu a, ani chuan thil thlen zan khan Santosh-a chu a muthilh hmak thu a sawi ngei a, zu rim a nam miah lo tih leh tumah a biak loh thu a sawi a; Bar a kalte chu khawilam, a muhil tui lutuk a, thil thlen lai pawh khan a thangharh miah loh thu leh a hnu a a rawn harh chuan thinrim hmel em em a a kut a humruh dan te..muhil tawh lova bath room-a a tawm khawvar thak thu te a sawi a.

“Ti nge mi hur i tih ngawt?” ka tih chuan, “i pic en chung hian zantin masturbate a ti thin, ka hre lo emaw a ti aniang, ka muhil tawh niin a ngai thin zawk nge, i hming te a lam thin a; zankhat phei chu “Shonali ka ni, Shonali ka ni’ a ti vak vak a, bath room-a a awm lai a nih vangin a awmdan tak chu ka va hmu theilo, ta tang khan dik lo a awm tih ka hria, i tan a hlauhawm thei dawna hriatna ka nei ta tlat a ni” tiin a sawi.

Tichuan, Christopher kha ka be ta a, Santosh-a chanchin lo chhui tur in ka ngen a, Yadav-a chuan engkimah min pui thei bawk. Angeli te hostelah kan va kal a; alo rui hle mai a!

“Mi hur ka ni lo a, lesbian ka ni hek lo; ka roommate pawh kha a ni lo, khami zan a thil thleng kha a mak em a ni; Susani kha a rui lova; min rawn kuah a, a tawng lo, rap zetin ka lo nam kiang a, mahse, a tum lui zel a, room atangin ka tlanchhuak ta tawp a. Engmah ka la sawi duh lo, Santosh chiah ka hrilh, tichuan a zan lehah khan santosh nen kan leng a, beer ka in a, ka taksa chak loh vang nge ka rui ta lutuk a, Santosh chuan Hotela riah pui min tum a, mahse, ka thianpa Sunila ka kova, ka inthlah haw tir ta a ni, Santosh khan vawi tam tak sex min hmanpui a tum thin a; ka hnial zel thin, a chhan chu ka la virgin asin.

Khami zan khan ka chatthla hmak a, engmah ka hre lo a ni, tichuan Susani khan a duhtawkin min sawngbawl ta anih kha..” a tap pur a! ka khawngaih hle.

“Khaw nge Susani kha kan hmuh theih ang?”

“Hahha, in hmu duh a maw? a bo tawh, a thi tawh! Kan video leak out zan atang khan a zak lutuk kha a khua sik ka ti tawp! Keilah ka tap reng bawk si; a tih anih loh thu leh hetiang a ti tura thununtu engemaw tak a neih thu a sawi chamchi a, ka lo awihsak duh silo, FIR ka thehluh vangin Police in an rawn la ta a, tap zawih zawih chunga a lo lehhawi tang tang kha ka mitthla-ah a cham reng thin. Chumizan chuan lock-up ah a riak a, mahse, zinga an va hmuh chuan, a Chunny–in a lo inawkhlum a ni” a tap hlawp hlawp a!

“Ti nge a va lar lo ve?”

“Police ho te chuan an thup tlat ang chu, an kut atang a thi a ni miau a! mahse, keimah vang a ni, ka thian thaber thusawi kha lo ngaihthlak sak ila chuan.. la dam awm si a”

Kan hriat duh chu kan hre kim ta. Mahse, Santosh-a chu inpuantir a ngai si a; engtin nge chet a lak leh ang tih kan thli thlai reng a, ka rin ang ngeiin Hindu kulmuk, Gita chu a rawn thlang leh ta chat a nih kha. Shonali pawh kha Hindu kulmuk leh ramhuai hlau em em a ni thin. Hetianga a rawn chet leh nachhan tur chu a thiltihah a la hlawhtling lo tlat! Bakah tupawn thlahrang thiltihah an ngai tawh miau a! a tan chuan ramhuai anga awmzui zel chu a remchang tlat a tin ni. Ka hriatthiam loh pakhat erawh chu ti nge midang hmanga min tihbuai a tum tlat le, keimahah lo lutin a che ve thei lo tihna em ni ang.

“Santosh, sawi rawh le” ka ti vin thak a, ka thinrim na chu a sosang viau mai.

“Engkim kha ka tih vek a ni! a chhan chu phuba ka la a nih kha, hmeichhia hmangaih ka nei a, nasa takin ka atchilh a; ani pawn min duh a, kan hlim dun thin; mahse, vawi lehkhatah ka hlimna chu a bo ta daih a, chu ka hmangaih ber chuan mipa dang, mipa dangah pawh ka thiantha ber lakah min phatsan a, ka hmangaihber leh ka thian thaber sex hmang dun lai chu mittui tla chungin ka thlir a! ka tawp vek a, engmah pawisak ka nei tawh lo. Kan khuaah ka haw a, ka pi ka hmu a, ka pi hi kan khua Rampur chuan an hlau a, an khung hrang tlat thin, a chhan chu Dawithiam a nih vang a ni. Ramhuai te nen hian an in zawl thin a, thil tihtheihna pawh a nei thin.

Tichuan, ka pi chu nasa takin thil min tihsak turin ka ngen ta a, mahse, midang chhiatna tur in a dawi chu hman a duh ngai lo; mahse, a tupa in mittui tla chunga a ngenna chu hnial harsa a ti ta aniang, dawi chu min zirtir ta a, lehkhabu a nei a, chumi hmang chuan, thlarau a ko chhuak thei a; in awih lo mai thei, mahse, thudik a ni. Lehkhabu nen chuan Khawpuiah ka rawn chuang chhuak leh a, ka bialnu leh ka thianpa laka phuba la tur chuan ka in puahchah ta a, tihsual palh chuan thih theih anih vangin ka fimkhur khawp mai. Tichuan, Thlarau hur Incubus ko chhuak tur chuan ka chham pual tan ta a!

Ka tih dan chu ka sawi lo mai ange, thenkhat ten inlo ti ve ngawt palh ange. Ka bialnu chu zantin Incubus nen ka inkawmtir ta a! a mizia a danglam tan a, hetianga Incubus nen an in kawm lai hian keichu muhil ang derin ka let thin a, a nawmna vawrtawp kha ka lo tem ta thin a ni. Tichuan ka thianpa chuan ka bialnu awmdan mak tak avang chuan a kalsan ta mai a! ka bialnu rilru na lutuk chu a a ta hial a! Assylum-ah tunah pawh ala awm mek ang; ka thianpa chungah chuan ka thinrim em em a, tichuan, keima thlarau ngei chu ko chhuakin ka thianpa kawchhungah chuan ka lut ta a, ka sawisa a, nasa takin. A tawp ah phei chuan inawkhlum turin ka nawr lui a, a thih hma chiahin ka inpuang ta a, ngaihdam min dil a, a sawt tawh lo.

Pangngai taka nun ka hman chhoh leh theih ka ring a, mahse, a lo nilo. Ka piagsual ta zawk a, hmeichhia ka hmuh chuan pawngsual chakna in ka khat thin, Angeli kha vawi tam tak mutpui ka tum thin a, mahse, min hnar fithla thak thin. Vawikhat chu a thianpa Sunila bulah, “Santosh hi a dik lo, ka then dawn, midang ka nei dawn” tih thu hi a lo sawi a, ka thinrimna a rawn nekpawp leh ta. Incubus nen inkawmtir ka tum a, mahse, chu aia zahthlak zawk tur tawn tir ka duh vangin, a roommate leh Incubus chu ka kawm tir ta zawk a, Susani chu a danglam zel a; tichuan kha mi zan, an mualpho zan khan Angeli ka chhuahpui a, a beer in turah damdawi ka pawlh a, riahdun puiah ka sawm a, mahse, min hnar leh tak avangin, a tawp thlen ka tum ta a ni. Ka haw a, Mandir piahah inruakah khan ka lut a, keima thlarau ngei chu ko chhuak lehin susani chu ka luhchilh leh ta a, Camera ka set tir a, engmah hre lo Angeli kha Susani kut hmangin ka sawngbawl ta a nih kha.

Ka tisa chakna hi a tawp hlei thei lo a, ka rawp telh telh a, mahse, mitha leh zahawm tak hmuha min hmuh vangin theihtawpin ka insum thin. Mag, nang nen kan han inkawm atang khan ka engkim i ni a, ka ta ni la ka duh takzet a ni. Mahse, chu chu a rem dawn lo tih i tawngkam leh awmdan atangin ka hria a, ka huat vang che leh ka thinrim vanga khatianga che kha ka ni miah lo, ka it ngawih ngawih che vang zawk a ni. Incubus nena inkawmtir che pawh ka phallo a, Dingi hmang khan i taksa kha chen ka tum a, mahse, Dingi kawchhungah khan ka lut thei miah lo! Christian in nih vang a nih ka ring ve ringawt a! ih maw, Mag, min duh phawt chuan ka sakhua pawh hi ka kalsan ngam a sin.

Sholini kha ka luhchilh a, mahse, mak deuhin ka thunun hleithei tlat lova, hlauhawm deuh deuha awm tir kha ka duhdan a ni bik reng reng lo; mahse, engkim kha akhirh vel vek. Zana thil thleng kha i chunga bawk a tenawm taka sawngbawl tumtu che kha Incubus a nih kha! Khatihlai khan Sholini-ah khan ka awm a, hrehawm tiru takin ka awm a sin. Ka hlawhchham tak avang khan ka beidawng lova; vawikhat tal chu ka ta nih tir che ka duh a ni.

Gita hmangin ka vehthlem leh che a, Gita kha chu thunun a awlsam hle. A bak chu in hriat kha..”

A hmel khawngaihthlak tak avang chuan ka hnual ve sawt thei mawle! Mahse, min tih hrehawm dan zawng zawng ngaihtuah chuan engmah a nilo.

“Ti nge Nisha kha a i thah kher?”

“Chet lak ka tum apianga alo harh ziah vang a nih kha, ani pawh kha thah ka tumsa lo; mahse, a harhvang mah mah a ni”

“Tunah chuan Sholini pawh a fihlim thei tawh ang chu, a nih Rakesh–a kha eng nge a awmzia?”

“Ka hming dik tak a nih kha”

Ka thil tawn teh hrep chu awih har ka ti ngang mai.

“A pawi ber chu i thlarau kha setana hnenah i hralh tawh a ni, dawi thil hi setana nen a inzawm tlat a; nangpawh dawithiam i nih rual khan setana ta i ni nghal tihna; thlarau ko chhuak thei khawpa i thawhrimna leh i dawi hla chhampual te kha finna leh thiltihtheihna vang a nilova, setana fa i nih vang zawka nei thei i nih kha. I khawngaihthlak takzet a ni, Isua Krista hi lo hre hmasa ni la chuan, khatiang dawi mak leh rapthlak tak kha i thlang hauh lovang le..” Christopher chuan dam thlap hian a ti a.

Police ten an rawn hruai lai chuan min rawn melh tawk tawk a, “Santosh, dam takin le, mipa inthunun thei tak hi kei chuan ka ngaina a ni” ka ti a. Ka hnungchhawn ta a.

“Ka la awih thei chuang lo, khatiang dawi chak lutuk kha Thingtlang pitar khan engtin nge a hriat theih ang?” ka ti a.

“Ka pu pawh hi dawithiam ani, a theih tih ka hre tawh a lawm; in sakhua avangin i awih lo a nih kha, a theih zia chu naktuk atangin ka lo hmuh tir dawn che em ni?” Yadav-a chuan alo ti vawt raih a! ka lo mur sung sung mai.

By -  Toni Râlte
Visitor's Voice

Click to Comment

Mizo Nula Khal

+