Mizorama Zirna In Pa ti ila thu awmze neilo kan sawi em lovang chu... Zofate zinga Civil mi chawimawina sang Padma Shree Kum 1983-a dawng hmasa ber tu. Pa namai lo tâk! Lehkhathiam chungchuâng subject zawng zawng a hnehsawh vek emaw tih mai tur... Zirtirtu hna atanga Officer lian thlenga a thiamna leh a Thu leh Hla rotlingte Zoram tana thawhtu.
A. Sawihlira hi kum 1931 khan Thinglian khuaa Peter Dardawna leh Elizabeth Suakchhungi te inkarah khawvel eng a lo hmu a. School a kal lai pawha naupang thiamthei leh thil chik chiang ngat ngat thin, dilchhut leh mi danglam bik pakhat ani a. Kum 1942 -ah Primary chu exam-in Mizoramah pakhatna dinhmun a hauh a. Kum 1948-ah Middle zo lehin, Mizoram pumah pakhatna dinhmun a hauh leh a!
St. Anthony's School, Shillong atangin kum - 1956 khan Matric tha takin a passed a. Heng subject Mathematics, Science, Commecial Geography leh Lushai te hi a thiam in a hre hneh hle a, letter mark a hmu vek nghe nghe a ni. Guwahati University ah Pali-na a tling phak a, Khasi leh Jantia huam chhungah ti tha ber niin Victoria Memorial Medal a dawng nghe nghe bawk. Kum 1961 ah St. Anthony's College, Shillong atangin BSc a zo va. Kum - 1971 ah Guwahati University atangin B.Tech zo lehin, University pumah pathum-na dinhmun a hauh pha hial bawk.
Hemi hnu hian chhungkaw harsatna avangin Zirtirtu hna Zoram hmun hrang hrangah thawkin a awm kual a. Mi subject har tih leh nin em em Mathematics leh Science chu a thiamin a tuina ber ani a. Zirtir a thiamin a tui bawk a, hrilhfiah leh sawifiah a thiam thin hle. Kum - 1973 ah Science Consultant hna a zawm a, Mizorama Science leh Mathematics hmasawna atan mi pawimawh a tling chho a.
Kum 1977-ah Science Promotion Officer a hlan kai a ni a. Kum 1989 khan SCERT Joint Director a ni. A pension hnuin kum 1995-1997 thleng Mizoram Board of School Education President hna a chelh. Kum 1993-1997 chhung khan Science , Mathematics zirlai bu leh Guide book - 41 lai a ziak a... Kum - 1983 chho vela Mizoram mipui tam zawkin Radio kan lo hlimpui tawk em em lai khan, India Sawrkar chuan Computer lam zir turin London-ah a lo vei liam tawh bawk. Zofate zinga Computer lam hre hmasa leh lo chûl nêl hmasa tu a ni.
Hei bakah hian Thu leh Hla lamah pawh a duailo hle a, a thuziak zirlai te tan mai pawh nilo, mi tin tan thu ngaihnawm leh bengvarthlak, Zopa hriatthiam theih tura Science lam lekhabu rotling 'Finna Kailawn' leh 'Science Thu Ngaihnawm' a ziak bawk. Hla pawh 14 lai a phuah nia sawi a ni nghe nghe a. Heng a Lehkhabu ziah leh a kutchhuakte avang hian India President Pasarih-na Giani Zail Singh khan Zofate zinga a hmasa ber atan Padma Shree Award chu kum - 1983 khan a lo hlan a...
Mizo Academy of Letters chuan kum - 1991 khan Award an lo hlan tawh bawk. Mathematics, Science & Technology lama Zofate ti hmasawntu langsar ber pakhat tih theih hial, he pa ropui leh chhuanawm hian Zofate tan lekhabu Rotling 40 chuang lai leh a kutchhuak hlu tak tak dang min hnutchhiah turin kum 2000, January Ni - 8 khan chatuan ram min pan san a ni.
A kutchhuak thenkhat :-
- Science leh Pathian Thu,
- Finna Kailawn,
- Science Thu Ngaihnawm, ladt
Reference :-
- Hlakungpui Mual Luahtute - B. Lalthangliana
Post a Comment