BED NO-3 Damna SEKSI

Kum tam tak a liam ta, ka la hre reng mai. Pick up Motor-ah chuan kan lawn sung sung a, mihring sawm hnih chuang kan inbeng a, kan khat ṭeh ṭawh hle mai. Kan kal tawh dawn emaw kan tih lai chuan Driver-in meihawl bag 10 zet a rawn theh chho leh a, ṭhut a phal der si lo, kan tawt lu deuh chu a ni.

Aizawl kal tur tih takah theih tawpa nalhin, mi aia nalh daihin ka inchei a, a polite tawkin ka nui deuh var var reng bawk a; mahse, hetia meihawl bag nen kan nih tak nuaiah chuan a polite theih tak tak tawh loh. Kan mang nghal niau nuau mai, a theih dan dana inthiatin kan tlan liam ve ta a ni. Kan nu'n Aizawla chhungkhatte sem tur bekang ro, baibing rep, rawtuai rep, etc. min ah-tirte chu kawng chhiat luatah kan chil sawm zo vek a ni. Fur khaw chhiat laia zin ngang kan ni a, kawng chhia nen, nal nen, tuihawk tling leh chirhdum nen, kan kal sawt lo hle mai. Driver tum lohna lamah te hian a tawlh tleng ang zul zul a, a den ṭhin teh e. Kawng ṭha laiah chuan kan zai ve ṭhat ṭhat ṭhin, Aizawl kal tur kan ni a, kan hlim a ni ve mai a ni. Kei phei chu zaithiam thlah ziding tih takah hla chang ka sawi kawng tluan nghe nghe. Mahse, kan zai rei hman ngai lo, Driver-in, "Chhuk ula, in vaiin nawr rawh u" a ti fo mai a, kan one two three kawng tluan a ni deuh mai. A tira kan nalh ve nen kan tal berh ta viau a ni, ka pheikhawk khing lehlam phei chu chirhdumah a pil bo daih nghe nghe.

Kan tlan leh a, kan zai leh dawn chiah, kawng nalah kan han inpaih vir zawk mai a, Jerusalem lam kan hawi ṭhawt mai mawle, hlauhawm thei vin ven tak chu a ni. Motor chhe em lo na na na chu kan tlan zel a, rei lo teah chirhdum hmun kan lut leh ta, kan chhuk a, kan nawr leh ṭang ṭang a, a tawpah kan nawr chhuak thut, driver-in a control hman si lo, Pu Tlana Lovah a tlan phei, an Mai dahkhawm a chil darh, an Thlam a su awn leh buih a, a ding thei hram a ni. Chutah Lo neitupa thinrim Lo lu aṭangin a rawn tlan thla, chempui a rawn vilik, a rawn meng sen thir rut mai. Min din tlartir a, a mal malin min han check thlap a nih kha! Kei pek chuan ka hlauh luatah ka kuhva neih zawng zawng ka lo pe a, kawng tluanin ka nghei phah a ni. Mahse, thisen chhuak em lovin kan inṭhaṭhen theih phah thung.

Tluanga taka kalin kan insawh ri chawrh chawrh reng a, kan indelh velna lamah Chapal hruite pawh a chat nuai hlawm a. vawikhat phei chu vawn tur ka dap a, Pi Lawmi pawnfen ka'n pawt thla thut mai a, zia lo pek puak teh e. Ni Lianbuangi tlu tur pawn ka serh leh sang a rawn man thut mai a, lehlamah motor a thle leh thut sia, an pawt mar leh zawt a nih kha, a na duh reuh khawp mai. Kawng a hnim sia, kan su phei sun sun zel a, Nl. Hlunpuii powder hnawih phei chu hmunphiah bukin a hlap reh vek mawle. Driver lah 'khalh fimkhur deuh rawh' tih ngam pawh a ni lo, a hah thinrim hmaisen mit sen ha sen, a meng sala tun reng mai a, intualvuak a peih sa ut reng a ni. Tuman biak pawh kan be ngam lo, a be ngam awm chhun a lainate pawn zawi tein 'kuhva kan lo siam leh ang che aw' an ti ngam ṭawk a ni. Kan tlan zel a, Mi dum kham kan thleng ta, tumah kan ṭawng ngam ta lo, a hlauawm a ni. Hmanah Bike nena ka tlak tawhna kha a ni, tuarchhel na na na chu ka thi lo deuh niin a lang. Mahse, kan pelh veleh khawhar hla min han sak khum kherah.

Tichuan thi lo aruang, thifahnukchatin Tlungvel chu kan thleng phei a, hotel kawtah kan ding a, sa rim a rawn nam nghal huk a, rilṭam a ti zual teh e. Pawisa nei deuhho chu an zuang thla phak phak a, chawei turin an lut nghal duah duah a, keini ṭhiandun Rinenga nen chuan pawisa te kan ngah ve lem lo bawk a, mi hnuvaiah, mi chhuk lohna lamah kan ṭum thla per chuai a, kan inbeng fai thawk thawk a, chhangthawp tlawn khat ve ve kan lei a, motor phenah thingpui tel lovin kan han helnuai reuh a nih kha, kan lem mel tawn tawn mai mawle.

Arei areiah chuan inti chaw ei bikho pawh an lo chhuak ve ta, an hmui mawmte chu an han hru fai ṭha duh lo vel a, an irh uk uk a, kuhva hring an ei a, Farstar min han pak khum ngeiah. Tih tak emah chuan kei pawn zo zial polythene khat dawn ka pai ve tho, min hnuaichhiah bik tur an ni lo. Mahse, ka pumpuiin sa a ngen ru deuh tlat, ka wallet-in a support der si lo.

Chuan kan tlan ṭan leh ta, sa ei leh ei lo te chu kan inṭhut pawlh leh ta nuai a, kei pek chu ka sa chak vang pawh ni hauh lovin, ka Aizawl kal tur phur lutuk, Rawtuai bai chhuang lum ṭha hman lova ka ei vang kha a niang chu, ka pum a rawn na ṭan a, kan kal thui tulh tulh a, a na tulh tulh a, ka thisuk lek lek a ni. Pachanga pumpa ka'n rum hem hem mai a nih kha, zia lo mang'e. Tichuan na tuar lungngai, mangang leh sehsama ka boral hma chiah chuan Aizawl kan thleng ta hram a ni.

Ka tan kum vanduai a ni hrim hrim, Damdawi In hi ka lut ngun malh malh khawp mai. Aizawl lama ka chhungte pawn min ning ru khawp ang. 'Naktukah Aizawl ka rawn kal dawn' tia ka phone lawkte hian Hospital lamah min lo chang leh ngawt ṭhin, tlaivar pawh huamin an lo ṭhu ṭhup zel. Min chan fuh chang lah a tam. A chang erawh chuan Bazarah Zikhlum te ka lo zuar daih ṭhin bawk. Mahse, a tawpah chuan sa ei khat tih takah ei luat tuar lovin Damdawi Inah bawk min luhpui leh nge nge ṭhin. Tun ṭumah pawh hian chhungten sa min lo hmehpui leh ngei ang a, a nih loh pawn Dal tak tawk chu kan chawm ngei ang. Chu chu kawng tluana ka hisap chu a ni. Aizawl kal leh ei tui, ka thau haw mum kang ṭhin reng a ni.

Tum loh deuhvin chhungte Ina chaw ei lo leh bazara nepnawi lei hman hauh lovin Civil Hospital sick room, Bed No. 3-naah bawk chuan mi dum kang hlum ang maiin ka mu dum leh ta ran a. Nurse leh Doctor-te pawn min lo hmelhriat tawh khawp mai, 'i room hi i va rawn luahlum khat tawh ve,' te an lo ti mai mai a. Nuih pawh ka nui ṭha peih lo, ka na riau, ka chau, ka nghilh dup, ka chalchang, thi leh dam karah ka leng, ka sahawk a ni ber mai. Ka chhungte pawh an rawn thleng khawm ṭuk ṭuk a, ka meng peih lo nain an ṭawng erawh ka hre thei nual. Pa Chhawntea'n "Tun țum chu a dam chhuak tawh lo vang, In lam lo zuk singsa r'u," a tih te, Țanpuiin, "Nia, thi tho tho tur vety lamah kan lo enkawl mai mai lo a ni, senso a tlem zawk tur," a tih te, U Kimi'n, "A dam leh mai thei asin. Vawk sa chhum hnim tir ila," a tihte chu ka mang hriat riai ruai a, min tithlabar khawp hlawm mai. Ka nau Hnemi pawn ka ruang khuhna tur puan a rawn ak lawk puar luah bawk.

Kha tih lai khan Kuang hi veng neituten an rawn intum chawp mai ṭhin a nih hmel. Ka ruang lak tumin ka lo chen tawhna veng hrang hrangten thi ngei turah min ngai a, kuang an rawn keng hlawm a, ka ruang inchuh an tum a ni, rapthlak hlawmin. Bengvar hlawm teh mah se, bengvarna ṭihbaiawm tak a va ni si em! Engpawhnise, Electric Veng lamin an rawn ken kuang kha chu an siam uluk lo fahran lutuk a, a thingte kha a kawi ang ngel ngul a, inzalh ka tum lo. Bawngkawn atanga an rawn ken pawh kha thing chhia mai mai kilh khawm a ni, ka ruang dah nan ka phal lo. Hmuntha khua aṭanga an rawn ken kha chu a thing a a ṭha; mahse, a phuailuai em mai a, hremhmun lam a nger sa deuh tun bawk sia, ka ngaina lo. Hmunpui lam aṭanga an rawn ken, puan var ser sawra an khuh zan mai kha chu lawiluh a chakawm deuh, thlarau a hip a ni. Chanmari West lama Pu Nghinglova te, Chhuantea ten an rawn ken pawh kha a dangdaiin a rapawm khawp zawk mai. Thirtiang zum sei tawk hi an rawn pu a, min thil tlang a, vawk zawna min zawn an tum a niang, den fia fia tak a ni. Ronie-a lah chu inti thu ziak mi takin vuina programme ami tur ka chanchin a lo lawr khawm ang dun dun a. Lalruatkimi lahin "Khawharte pual ami hla thlan tur vel kha chu ka kutah dah rawh u," a lo ti sek bawk a, mi phum chu an tum hlawm khawp.

Tin, heti hi a ni a, Doctor-ten theihtawp chhuahin min enkawl mah se, ka lei taksa chu a ral riai riai a, ka damlai sakhmel hnuhnung hmuh tumin an rawn tlan khawm a, ka hnukchat lai thlalak tum lah bo lo. Pu Zonuna pawh a rawn lang ve nawlh mai. Ani hi hman kuma a damdawi man ka bat ral sak tak kha a ni, mi rawn nuihsawh deuh vur vur nghe nghe. Chuan le, leilung dana pialral kai hun aia hma fe, naupang tè ni chung chuan rihsang mual liam ka tum ta. Ka chhungte ṭap hawm hawmte chu ka ral hriat raih raih a, ka liam reih reih a, lei mawinate chu hnutiang ka chhawn dawn ta, ram eng mawi panin Jordan lui ka dai kai dawn chiah. Chutah theitawpa intipachangin a tawp nan 'last seeing' ka rawn nei leh a, ka rawn meng leh diar diar a, mit menga khawvel mangṭha ka tum lai tak chuan kawngkaa Nurse chhuak tur, chawn var no nalh lutuk chu ka va hmu ta a nih kha! Ka ṭhu chhuak nghal hlawl mai! A liam hma chu ka thlir zui a, tichuan thingpui te ka in a, ka dam chhuak chho leh ta a ni.

Kha Nurse kha tunge a nih tun thleng hian ka hre ta lo. Han hre hlauh ila chuan kuhva ṭhehte pawh ka duh asin mawle. Kan ṭhenawm Zotei hi a niang han ti dawn ila, khatiang khawp khan a chawn a nalh ve si lo, damna khawp a ni lo. Engpawhnise, chutia ka dam sen leh lul takah chuan ka chhungte an lawm em em mai a; mahse, Kuang siama lo buai ve em emte kha chu an lawm ve chiah lo, "Lehlawi si a" ti hmel an pu tlat, 'a thi der,' te pawh min ti mai thei, 'phum tho tho ang,' te pawh min ti mai thei bawk, tunge va hre tawh bik i. Naupangin pheikhawk min chah, an ke tehna hnang an thliahte chu pawisa nei ta hek lo, ha kher nan ka hmang ta mai mai a. @C. Biaka