International News and Politics thlir ho ang aw....


Headlines: 
  1. Kim Jong Un indo turin a inbuatsaih
  2. Covid19 kai tam ber record
  3. Xi Jingping sawiseltu Professor ban
  4. Israel Prime Minister dinhmun derthawng

Kim Jong Un A Rawn Inlar Leh Ta

Tunhma deuh khan Kim Jong Un chu "THI" angin a thang huai tawh a. A hnu reilote ah TV ah a rawn inlan leh tak avangin a lo la dam reng thu ka hmuh a. A hmel en hrim hrim hian a chaw ei a tui hmel hle a, hrisel lohna leh  bawrhsawmna neuh neuh in a tlakbuak chho ve ta niin a lang. Mak deuh mai chu, khawvelin hri hlauhawm tak a buaipui mup mup laiin North Korea chu "Covid19 Free" an inti ve tlat mai a. Tak tak ni ang maw! 

Lehlama chuan North Korea hi covid19 lakah a zalen tak tak theih tho bawk a. Achhanchu, dictator power hmangin an ramri zawng zawng an khar chîp hmak chuan rampawn atangin keini Mizoram angin an lalut ve dawn lo, tih a chiang reng a. Awih loh ngawt chi a ni bik lo. North Korea ram dinhmun chinchang hre deuh te chuan, North Korea hian healthcare lam a ngaipawimawh ngai lova, chuvangin an dinhmun hi a hniam hle. Covid19 hri a leng vaih chuan North Korea hi chhe let der theih a nih thu, ram dang mithiam te chuan an sawi. 

June ni 16 khan North Korea chuan an ram chhunga Korean Liaison Office chu a bomb chhe hmiah mai. He Office hi Korea ram pahnih te tana tangkai tak, US dollar 15 million zet sum chevel awmna a nih a, North Korea hian eng vanga bomb ta mai nge a ni, tih chiang taka sawi lan a ni lem lo nain, South Korean president Moon Jae sawrkar dodalna pakhat nia ngaih a ni. South Korea chuan tawngkam in chhanglet ve nghalin, Kim Jong Un hi a che leh chuan an beilet tur thu an chhuah ve nghal a. He chanchin buatsaih lai thleng hi chuan ram pahnih te karah hian thuthar langsar a awm lo. 
Khawvel Chanchinthar



Hetih lai hian, Kim Jong Un chu indo turin a inbuatsaih map map nia ngaih a ni. Pyongyang Korean Central News Agency (KCNA) chuan an hotupa Kima hoin Central Military Commission meeting pawimawh tak an neih thu, July ni 19 khan a tarlang a. 

He meeting-ah hian Korean Peninsula boruak chungchang leh, indo a lo awm palh a ram hruaitute himna chungchang te leh an sipaite thawmchakna tur hmalakna hrang hrang an sawiho a ni. 

"War Deterrent" chungchang meeting-ah an thurel tam zawk hi puanchhuah a ni lo a. Ramdang miithiamte chuan nuclear ralthuam chungchanga hmalakna thar leh, indo huna ralthuam hman dan tur chungchang te chipchiar takin an sawiho niin an ngai a. A ruk takin Pu Kima hi indo turin a inbuatsaih niin a lang. 

A thenawmpa China lah chuan Pakistan, Nepal leh Sri Lanka te a fuihpawr reng bawk a. North Korea pawh a bang bik hmel lo. South China Sea lama buaina chu mi tin ngaihven a ni mek a. China hian fing takin media te attention la peng turin Korean Peninsula lamah boruak a siam thuai mai thei bawk. 

Kan hriat angin India leh China ramri buaina chu thawm a zawi tawh a. Indo tak tak tur anga India a han che meuh chuan China pawh a tawlhsawn nghal mai a. China hian indo hi a ngam tak tak lo niin a hriat. A chhanchu, kil tin atangin beihna a tawk dawn a. Eng anga ram economy tha leh sipai chakna nei pawh ni mahse, US, India, Japan, South Korea leh an sangawizawnpui ram te, a ruala han hmachhawn chu át huai chi niin an ngai lo a ni mahna. Mahse, an la tál reng tho a, ngawi an tum bik lo. 

Kim Jong Un a farnu Kim Yo-jong chu thuneihna sang tak pek a ni tawh a. Mithiamte chhut dan chuan, Kima hi a thlak thuai an ring. Kima aiin Kimi hi a rorum a, a kawlh viau niin an sawi. 

A unaunu duh angin Kima hi a che fuh lo deuh niin a lang a. US president Trump in a vauh zam deuh nge ni, Nuclear ralthuam siam lamah an riva hriat tur a tlem sawt hle a. Hei hi Kimi hian a duh lo a. US in a ngaihdan a thlak lo chuan inbiakna a awm tawh lo tur thu a lo sawi tawh a. Kimi duh dana North Korea ram a inher a nih chuan ralthuam siam lamah a hma aia nasa zawkin an kal thuai ang. 

Ni khat chhunga covid19 hri kai tam ber tum july ni 19

WHO chuan July ni 19 khan darkar 24 chhung lekin Covid19 kai thar mi nuai 2 leh sing 6 zet (260000) an awm thu a tarlang. Hei hi ni khat chhunga hri kai thar tam ber tum record a ni. US, Brazil, India leh South Africa ah kai thar an tam ber a. Darkar 24 chhung bawk khan mi 7360 in Covid19 an thihpui bawk. 

United State ah chuan tunlai hian  Florida in a tuar ber a. An ICU zawng zawng a khat vek tawh a. Hmalak ngaihna vak an hre tawh lo a ni ber. Mask vuah chungchangah politics a inbeihna a thleng mek a. President Trump chuan sawrkarin mask vuah turin thupek a chhuah dawn lo, mimal zalenna a ni, a ti mauh mai a. A tifuh hmel lem lo. 

Chinese President sawisel vangin professor ban

China University tha Tsinghua University a law Professor Xu Zhangrun chu Communist sawrkar leh party hruaitute sawisel vangin ban a ni. Professor Xu hian Chinese president Xi Jingping duhsak taka President term limit hlihsak a ni chu a duh loh thu a sawichhuak fo a. July 2018 atang khan thuziak tam tak a lo tichhuak tawh a ni.  July thla tir khan Chengdu police te chuan professor Xu hi an lo man tawh a. A nupui hnenah prostitution chungchanga man niin an hrilh. Mahse, tumahin an awi lem lo a,  tihian a hna atanga ban a ni zui ta a ni. 

Iseael PM Benjamin Netanyahu thubuai ngaihtuah

Covid19 hrileng karah Jerusalem Court chuan Prime Minister Benjamin Netanyahu corruption thubuai a rel  leh ta. May 2020 khan he thubuai hi ngaihtuah tan a ni. Corruption thubuai vang hian bang turin mi tam takin an nawrh mek a. July ni 18 khan Prime Minister Benjamin duh lohna kawngzawh neih a ni tawh bawk.  Israel PM hian a term a hmang tluan a rinawm loh hle. Hetih lai hian covid19 hri kai ni tin mi 2000 vel an awm ve bawk. 

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]

Post a comment

Powered by Blogger.