AIZAWL TOTAL LOCKDOWN & QUARANTINE


Aizawl City Hospital chuan Covid19 hri laka fimkhur thu-ah an Hospital tlawh rih lo turin mipui an hriattir.

Thuchhuah siamin Aizawl City Hospital chuan, nimin tlai khan an Hospital-a thawkte leh Hospital danga thawkte’n Futsal an khel hova. An inkhelhnaa kal ve, hmun danga mi pakhat chuan Covid19 hri a kai tih zanah hriatchhuah a ni a; an Hospital-a thawkte nen inkhelho an nih avangin fimkhur thu hlaah an naute zawng zawng chu khunghran nghal an ni, an ti a. Hetiang hi an dinhmun a nih avangin pawn lam mite chu an Hospital tlawh rih lo turin an ngen a.

Hospital pahniha thawkte’n Futsal an khelhna hmun Durtlang Leitan LLTF pawhin vawiin vek khan thuchhuah siamin, an veng chhungah Covid19 inkaidarh theihna a awm avangin fimkhur thilah vawiin chhun dar 12:30 aá¹­anga thu leh awm hma chu an veng chhungah inkharkhip tur a ni a; tumah khawlai leh pawna chhuak rih lo turin an inhriattir a. Damdawi dawr tiam lovin Dawr zawng zawng khar vek tura an inhriattir bakah Veng chhungah infiamna lam chi reng reng an khap bawk.

Mission Vengthlang LLTF pawhin tukin dar 5 atanga chhun dar 12 thlenga City Hospital leh Grace Hospital-a inentir an veng chhung mite chu fimkhur thilah pawn chhuak lo turin an hriattir ve bawk.

Zuangtui LLTF pawhin an veng chhung mi zingah Covid-19 hri kai an awm tak avangin mipui te fimkhur turin an ngen a. Contact tracing neih mek a nih avangin thu leh awm hma chu an Veng chhungah Total Lockdown puangin sumdawnna hmun, eichawp dawr, dawrtê, bungraw zawrhna, workshop thlengin dawr zawng zawng khar vek tuin an inhriattir a ni. @AIRNews



Local Transmission vawi hnihnaah doctor a +ve Mi 100 vel chhui chhuak, veng thenkhat inkharkhip


Aizawl, July 22: Covid-19 hrileng laka inven nan Mizorama lutte chu quarantine facility-ah dah thin an ni a, natna lakah an him em tih enna senso leh an ei leh in man, an awm mante chu anmahni’n tum lovin sorkarin a tumsak thin. Quarantine facility-a awm man sorkarin a tumsak thin hi tihtawp a ni dawn a, a awmate’n an intum a ngai dawn.

He natna vei hriatchhuah thar doctor leh amah nena tun hnaia inhnaiha awm te leh an inkhelhpuite thawhna damdawi in chu Thawhlehni khan an inkharkhip nghal a, a chenna veng leh an inkhelhna vengte an inkharkhip bawk. He thil hi veng pahnih leh damdawi in pakhatin Thawhlehni khan social media lamah an puang a ni.

Positive hriat thar doctor hi Covid-19 natna veite enkawlna Falkawn damdawi ina thawk a ni a, July ni 20 zanah a result hi hriat a ni. Covid-19 chungchanga thupuangtu Dr Pachuau Lalmalsawma chuan ‘local transmission’ a nih thu leh Mizoramah a vawi hnihna a nih thu a sawi.

Thu dawn danin, July ni 20 tlaiah khan City Hospital leh Grace Hospital-a thawkte ‘n Durtlang Leitan-ah futsal an khel a, hetah hian positive hriat thar doctor hi a lo thawh tawhna Grace Hospital lamah hian a tel ve. A hnuah a positive tih hriatchhuah a ni a, Mizoram chhunga he hri kai (local transmission) hriatchhuah pahnihna a ni. A hmain tangkhang hruai hawte phurtu bus enkawltu chu hriatchhuah a lo ni tawh.

“Ni 20.7.20 (Monday) tlaiah khan kan staff-te leh hospital danga an staff-te’n futsal an lo khel hova. Zanah rawn hawin, an haw hnuah an inkhelhna a kal ve, hmun dang a mi pakhat chu positive a ni tih hriatchhuah a ni a,” tiin City Hospital chuan Thawhlehni khan thuchhuah an siam a, “Kan naute nen inkhelho an nih avangin fimkhur thu hlaah kan naute zawng pawh quarantine nghal an ni,” an ti. “Hetiang hi kan dinhmun a nih avangin pawn lam mite, kan hospital rawn tlawh rih lo turin kan inngen e,” an ti bawk.

City Hospital team-a tel mi 16-te chu quarantine tihtir nghal an ni a, Thawhlehni-a damdawi in thleng hmasa an staff 26-te pawh khung hran nghal an ni. Futsal khelhnaah hian damdawi in awmna veng Mission Veng mi pahnih an tel a, an chhungte nen Mission Veng LLTF chuan home quarantine an tihtir nghal. He damdawi ina inentir an veng mi chhungkaw pathumte pawh ina tawm rih tura tih an ni.



hrileng boruak
REPRESENTATIONAL ONLY

An inkhelhna veng, a chenna veng, City Hospital awmna veng leh a veng thenawmte’n fimkhur turin mipui an ngen.

“Leitan Veng chhungah Covid-19 mipuiah inkaidarh theihna a awm avangin fimkhur thilah vawiin Ni 21.7.2020 Dar 12:30 pm atang hian thu leh awm hma chu Leitan veng chhungah lockdown neih tur a ni a. Tumah khawlai/pawn chhuak rih lo turin kan inhriattir a ni,” tiin futsal an khelhna Leitan LLTF chuan thuchhuah an siam a, positive hriatchhuah thar chenna Zuangtui-ah pawh LLTF-in “Kan veng chhung mi, kan khua leh tui zingah Covid-19 positive an awm tak avangin mipui te fimkhur turin kan inngen a, tunah hian contact tracing neih mek a nih avangin thu leh awm hma chu Zuangtui Veng chhungah total lockdown puan a ni tih mipuite kan inhriattir a,” an ti. City Hospital awmna Mission Veng LTTF chuan, “City Hospital chungchangah veng mipui tan chi-aina tur a awm lo a, tih tur tul ang ang chu hosipital hotute leh LTF lam te’m an buaipui mek a, chutih rualin mipuite kan fimkhur a tul tak zet a,” tiin fimkhur turin mipui an chah. Durtlang LLTF pawhin July ni 20 zana an veng atanga he futsal ground-a kalte in-report tur an ti. “Covid-19 hri leng mek chungchangah tukin zing dar 5 atanga chhun dar 12 thlenga City Hospital leh Grace Hospital-a veng chhung mi inentir emaw dam lo tlawha kalte chu fimkhur thilah thuleh awm hma chuan pawn chhuak rih lo turin kan inhriattir e,” Mission Vengthlang LLTF pawhin an ti.

Contact tracing tih nghal a ni a, police hotute chuan a pawimawh zual chu an hriatchhuah tawh thu leh mi 101 an chhuichhuah tawh thu The Aizawl Post an hrilh.

Mi 101-te hi positive hriat thar nena tun hnaia inhnaiha awm an nih thu police lam chuan an sawi a, inkhelhnaa tel te. a chhungte leh amah nena inhnaih zual an nih thu leh sample endik nghal tur a nih thu, an lo positive a nih chuan mi dang an chhui belh tur thu te an sawi.

Health department lam atanga thu dawn danin Falkawn damdawi ina doctor-te leh nurse-te chu an sample laa endik thin an ni a, tun hi positive an awm vawi khatna a ni. @TheAizawlPost

COVID-19 Positive thar 20 hmuhbelh a ni


Nimin July ni 21, 2020 khan ZMC laboratory-ah swab sample 279 test niin heng zinga 261 a negative a, positive thar 18 hmuhbelh a ni. Hetih rual hian Lunglei TrueNat lab-ah Sample 27 test niin COVID-19 positive 2 hmuhchhuah a ni thung.

ZMC laboratory-a COVID-19 positive thar hmuhbelh te hi mipa vek kum 23-59 inkar niin, Aizawl district ami vek an ni. An zinga 16 hi Assam Rifles sipai, Zokhawsanga quarantine lai mek an ni a. Assam atanga lo kal 13, Delhi atanga lo kal 2 leh Mizoram mi leh sa 1 an ni. Anni bakah hian NDRF, Lungverh ami 1 leh hnam dang civil mi 1 an awm bawk a, anni pahnih hi Assam atanga lo kal, COVID-19 symptoms neilo ve ve an ni. Assam Rifles positive zingah hian mizo 1 a awm a, a bak zawng hi hnam dang vek an ni.

Lunglei TrueNAT Laboratory-a test atanga Positive tharte hi BSF sipai ve ve, kum 57 leh kum 53, Uttar Ptadesh leh Uttarakhand atanga lo haw an ni a, an lo haw tirh July ni 1, 2020 atanga quarantine te an ni.

Lunglei TrueNAT Laboratory-a sample 27 test zingah hian repeat test 10 awmin, 5 an la positive a. Sample test te hi CCC, SIRD Pukpui leh JNV Pukpui Facility Quarantine Centre a mite, BSF vek an ni.

ZMC Laboratory-a District hrang hrang sample test zat (21st July, 2020)

tunlai hrileng


Aizawl - 233 (Mipa - 200, Hmeichhia - 33)
Serchhip - 11 (Mipa - 9, Hmeichhia - 2)
Hnahthial - 35 (Mipa - 22, Hmeichhia - 13)

TOTAL - 279 (Mipa - 231, Hmeichhia - 48)

Mizoram COVID-19 dinhmun (21st July, 2020 @ 11:00 PM)
Active Cases - 149
Cured/Dischared - 168
Total Cases - 317

Mizorama COVID 19 positive case hmuhchhuah tawh zawng zawng zat
Total cases - 317
Paramilitary Forces (BSF/AR/NDRF) - 118 (37.22%)
Civilians - 199 (62.77%)

Mizorama COVID-19 vei mek zat
Total Active cases - 149
Paramilitary Forces (BSF/AR/NDRF) - 118 (79.19%)
Civilians - 31 (20.80%)

COVID-19 recovery rate in Mizoram - 53%

-DIPR

Post a Comment

Powered by Blogger.