RIANGVAITE LAL ALO PIANG TA
Phuahtu: PC Lalneihtluanga
He hla hi ni 10th November, 2016 Ningani Chhunah phuah a ni a. A tuk 11th November 2016 Zirtawp zanah Bawngkawn Bethel Pastor Bial Zaipawl ten kan zir nghal a ni. Kan zir tan zan atang hian kan tui pui nghal hle mai a, a thluk leh hla thu a inhmeh avangin sak a nuam kan ti tlang hle.
An tlawm lua e lei berampute chu,
Vangkhaw dai rehah muangten an zal e;
Lei mi zinga chhiar ve loh mi tlawmte hnenah chuan,
Angel ten an puang e, Remna Lal a piang ta tiin.
Mihring zinga Isua Pianthu hre hmasatu kha miten an hmuhsit leh endawng Berampute an ni a. Engvanga hre hmasa nge an nih tih ka ngaihtuah a. Milian leh zahawmten khawvel chhandamtu pian thu hi hre hmasa sela a inhmeh zawk angem tihte ka ngaihtuah thin. Mahse chhuan tur engmah neilo mi zawng zawng aia hnuaihnung nia inngaite tan pawha chan chin lawmawm chu anni aia hlimpui tur an awm chuanglo. Remna palai a pian thu van Zaipawl te sak ngei chu ka ngaithla ve chak hle mai !
A hming Maka, Remruattua,
Pathian chaka, Chatuanpa Remna Lal.
Hlim leh lawmin zai I vawr ang,
Riangvaite Lal a lo piang ta.
Nausen lo piang hi tunge a nih- A hming chu Maka, Remruattua, Pathian Chaka, Chatuanpa Remna Lal...a hming atang ringawt pawh hian Lei leh Van Lal a ni tih a chianga, thlamuanpui tham a va ni teh lul em!!! Chuvang chuan Hlim leh lawm Chung chunga zaiin, Kan kut leh ke, aw neih zawng zawnga fak leh chawimawi tur hi kan va ni Chiang em ! Riangvaite Lal a lo piang si a !
Vantirhkohten van Hla mawi an rawn sa,
Chungnung berah ropui rawh se an ti.
Lei chunga a lawm em em hringmite hnenah chuan,
Remthu leng rawh se tiin biahzai nem an hlan e.
Van Zaipawl ten Isua lo pian thu, tuma la sak ngailoh ruah tham loh hla an sak chu ka suangtuahnain ka ngaithla fo thin...mahse ka suangtuahna aia thiam leh ropui a la ni cheu dawn si a. Chutianga ka ngaihtuah chuan ka mur sung² thin. Misualte chhandamtu tur Van Lal Fapa meuh thlahna hla Angel rual Zaipawl zai ngei mai ngaithlatu Berampute kha ka thik hle mai. Mi chan hai leh riangvai Berampute tan chuan a va mawi leh zual dawn em !!
Beraw, Mura, Rangkachak nei lovin,
Rohlu eng dang mah pek tur nei lovin,
Berampute ang kan thinlung hlan ila.
Kan lawmna mittui nen Bethlehem lam I pan ang u.
Khawvel chhandamtu lo piang lawmna thilpek atan Rangkachak, Beraw, Mura te nei lovin, khawvel thil hlu leh man tam ka neilo. Mahse Lalpa chuan Berampute neihchhun an thinlung lawmna thilpek a lo pawm a. Berampute zinga pakhat kha ni ve ta ila ka lawmna mittui far chungin hmanhmawh takin Bethlehem lam ka pan ve ngei ang le. Chuvangin Berampute ang khan Lawmna mittui far chungin hawh u Bethlehem lam I pan ang u.
Ran In tlawma ka Lal riangvai tak saw,
A chun riang Marin duatten a chawi e,
Lunglai min run ngei e, aw Bethlehem tlangpui sawn
Tah chuan ka Lal lunghnem ran thlengah chham ang a zal e.
Van Lal Fapa meuh lo pianga, chhandam ka nihna tura khawvel eng rawn hmu si a van riang tak em! Duat taka Marin a pawm lai ka suangtuah chuan, aw ka Lalpa chu ka van lainat tak em ! A mutna atan ran chaw pekna thleng maw.... a aia mutna tha zawk a awm lawm ni ? Ka damna tura ka Lalpa kawng zawh hi a va mak tehlul em! Hmangaihna mak tak zawng a va ni Chiang em!!
Post a Comment