Kan naupan laia kan hriat ngai loh thil tam takin kan nunah hmun a chang ta a. Hmana kan hriat ngai loh ten kan nunah thu an rawn nei ta viau mai. Mahse hnam naupang tih takah helam hawi hian inzirtirna kan kalpui tha lo viau a. A hre lo ber hian in thlasik mau puah pui leh phawng phawng mai teh ang.

Tunlai hian Mizo Youtuber leh thuziaktu inkarah buai a awm ta zeuh zeuh mai a. Thuziaktu ten “Youtuber ten ka thu lo leh min dil lovin ka thuziak youtube lamah an broadcast” tih hi an buaina bul a ni a. He mi chungchang thu hi in sawi zui lawk dawn teh ang.
Mizo Thuziakmi

Ka sawi fo thin a. A kohhran ang, YMA ang, NGO ang leh sawrkar ang pawhin he lam hawi hian inzirtirna, he Mizo society hian a nei tlem hle a. Youtube hmang hian pawisa a hlawh theih a ni tih tlangaupui hmasatu chu mizo fiamthu thiam TSA Khupchawng khan a tlangaupui fo thin a. Khatih lai khan ngaihven an tam vak lo. Zaithiam ten an dah thin a, chu pawh anmahniin channel nei lovin, a fing hmasa thenkhat ten an lo upload sak kha a ni fo thin a. Mizo zingah chuan Zorimawi hi Youtube Channel lian hmasa leh Subscriber pawh ngah hmasa a ni a. Tun hnuah chuan sum lak luh theihna a nih avang hian eizawn nana hmang tawp te pawh kan awm ta nuk mai.

A. YOUTUBER TAN:

1. Uar a pawi lo:

Ka sawi fo thin a, hlawhtlinna hi sawrkar hnathawk nih kher emaw, officer lian nih kher emaw, sumdawng hausa nih kher a ni lo. Youtube hmang ringawt hian mi tam tak millionaire an awm tawh a. Naupang kum 8 mi lek Ryan Kaji hian 26 million USD a nei a. Professional footballer leh sumdawng hausa kan tih a neih zat nei lo an tam hle tihna a ni. Dude Perfect inti thianho panga in fuan khawm te hian 20 Million USD zet an nei bawk. Mak ve deuh mai chu a mimal anga hausa leh youtube hmanga sum lalut hnem te hi naupang ve ve an ni a. Ryan Kaji hian toys a review thin a, amah dawta sum lalut hnem chu naupang kum ruk mi Anastasia Radzinskaya hi a ni a. Mahse Nastya ti a hriat lar a ni thung. Heng kan sawi duah nachhan chu a taima leh hlawhtlin tum tan chuan hlawhtlinna a awm a ni.


2. Mi taima tan a ni:

Uar a pawi loh thu kan sawi rual hian heng social media platform ah mi lar leh sum lalut tam ni tur chuan mi bik nih ai mah hian taimak a tul hle a. Ti ve mai mai an hlawhtling lo a. Tih tak zeta beite an hlawhtling thin.

3. Originality a pawimawh:

Mi thluak ring leh mi phuah khawm sa video siam ringawt chuan hlawhtlinna tak tak chhungkaw chawmna tham neih a harsa ang. Chuvang chuan kan mizo youtuber te ka fuih duhna chu Originality neih tum ula, in thluak kha hmang rawh u. Mi phuah khawm sa ringawt lo deuh khan a content ni thei se. Thawnthu kan chhiar thin a nih pawhin mahni irawm hi awm ve ngei se a tha.

4. Awze tawng mawlh mai hi:

Kum 2020 ah Mizoramah hian mipui nuai 13 bawr vel kan awm a. Mizoram chhunga awm lo he Duhlian tawng hmang hi he ti zat bawr vel awm turah ngai ta ila. Chung zinga a chanve chuan Youtube lo en thin ta se, a market hi a la lian lutuk lo tihna a ni. Hlawhtlin pui tham zet ni mahse, Awze tawnga ti ngam leh thiam tan chance a sang hle a ni. Hei hi kan sawi duh chhan chu khawvela youtube hmanga hausa mi pahnih Ryan leh Nastya hi saptawng hmang lo hnam atanga lo chhuak ve ve an ni a. Chuvang chuan mizo tan pawh chance a awm.

5. Copyright ngai pawimawh rawh:

Youtube hi paypal employee bang mi pathum Chad Hurley, Steve Chen, leh Jawed Karim ten kum 2005 a an siam a ni a. A kum leh 2006 kum khan Google company hian 1.65 billion USD in an lei sak a. Google ta a nih avang hian a dan leh dun ah pawh google inkaihruaina thui tak a zawm nghal a. Mahse a pawimawh lai ber chu copyright chungchanga an inkaihruaina hi a ni. Thui tak sawi tur awm mahse a pawimawh lai te hi in sawi teh ang.

- Copyright kan claim theih chin chiah video kan siam thiang. Chumi awmzia chu min thuziak emaw, mi lemziak emaw zai emaw kan hmang dawn a nih chuan kan ta original a nih loh chuan a neitu hnenah kan dil a. A theih hram chuan legal paper mumal tak sign tawn a tha.

- Mi hmanrua I lo hmang a nih chuan a copyright neituin takedown request a siam thei a. Hei hi a valid a nih chuan I video kha youtube atangin dah chhuah a ni ang. Tichuan vawikhat video in remove sakah copyright strike vawikhat I hmu ang. Copyright strike hi vawi thum I hmu nih chuan I channel kha tih chhiat (termination) a ni ang.

- Dawta puh I nih erawh chuan Counter Notification Google hnenah I thehlut ve thei thung ang.

He tah tak hian pawi em em mai chu I channel kha termination a nih tawh chuan subscriber sing chuang nei tawh tan chuan a uiawm em em mai a. Nuai chuang nei tawh leh video ngah tawh tan phei chuan tah zawih zawihna tham a ni ang. Chuvang chuan copyright ah fimkhur a ngai em em tih hi hre nawn fo ang che.

Chuvang chuan ka thurawn duh chu mi zai, music, thuziak, video lemziak etc. I hmang duh a nih chuan a neitu nen inremna nei hmasa ula. Ziak ngeiin inremna nei hmasa ang che u. Youtube lamah mi copyright lo hauh sa tawh a nih chuan share revenue in a kal mai a. Hei hi chu a pawi lo. Mahse mi chek ngel takin court ah kal pui vaih se la I che chhe hle dawn tihna a ni. Chuvang chuan mi kutkawih risk ngawt loin dil hram hram a tha. A pawisa pawh sen hreh loh a, mi tha hah man tlem pek hi hreh loh tur a ni.

B. ARTIST-TE TAN:

Mizo zingah artist-te kan hlut lo hle a. Thuziak mi, zai mi, lem ziak mite hian kan kut chhuak hi mi ten min hlut pui lo hle a ni ringawt lo a, keimahni ngei pawhin hlut nachang kan hla hre tawk lo. Mahse, keimahni ngei hian kan hlut a pawimawh hle a. A thlawn ngawt lo deuh a thil kan tih hi a hun viau tawh a ni. Zai thiam leh lem ziak thiam hian sum lakluh nan an hmang deuh a. Mahse, hla phuahtu, ziaktu, dramatist, architect, sound engineer etc. te hian kan thil siam hi sum kan hlawh pui pawhin a copyright lam hi kan hlam chhiah hle a. Tlawm te in copyright hi neih theih a ni a. A kal phung tlem in sawi teh ang:-


- Web portal http://copyright.gov.in/ tih ah khan form fill up tur a awm a. PAO hmingin DD in emaw IPO hmangin Rs. 10 chawiin dil theih a ni a.

- A documents ngai te hi tlemin phuah khawm emaw a harsat chuan dan hremi te rawn theih a ni a.

- I submit fel hnuah ni 30 I nghak ang a. Chutah chuan pawm a nih leh nih loh an rawn sawi ang. Fel tawk lo a awm chuan Discrepancy notice an rawn pe ang che a. Hei hi uluk taka chhan let tur a ni. Fel tawk lo (Discrepancy) a awm loh chuan o application an pawm hnuah acknowledgement letter an pe ang che a. Tichuan a certificate I nei thei ang.

Heng copyright hi a bik takin zai thiam leh hla phuah thiamte hian ngai pawimawh thei se a tha hle ang. Thuziak satliah ah hi chuan heng pui pui kan ti thei lo a nih pawhin hei hi thuziak mite leh artist-te hian kan tih a tha tawh viau ang:-

- Man chawia thusawi: Miin thusawiah min sawm a, mahni lawina kohhran thilte a nih loh hi chuan thusawi man hi kan inpek ngam a hun tan ta viau mai.

- I thuziak miten khawiah pawh hmang dawn se sum tlem tal phut thin rawh.

- A tul a nih chuan court pawh kal hreh loh mai hi tunlai khawvelah chuan a tha tawh zawk awm e.

~Lalmuansanga Khiangte (#MotivationalMkhiangte)

Post a comment

Powered by Blogger.