latest news in MizoramJuly ni 20, 2020-a sample test result chhuakah vanduaithlak takin ZMC-a doctor thawklai pakhat chu COVID-19 positive a ni tih hmuhchhuah a ni a. Hemi chungchangah hian Mizoram Sawrkar Health & Family Welfare Department hotute chuan chak takin hma an la chhunzawm nghal a ni.

Health Secretary Pu H.Lalengmawia hovin Principal Director Dr F.Lallianhlira leh Zoram Medical College hotute chuan vawiin khan ZMC-ah hemi chungchang hi meeting pawimawh tak an nei a. Meeting-ah hian sawrkarin COVID-19 kaihhnawih guidelines te siamin Ordinace pawh mumal takin a siam, tih sawi lan a ni a. Inkaihhruaina fel tak, chipchiar taka duan vek a ni. A bik takin doctor leh medical field a awm te chu heng inkaihhruaina dante zawma, mipuite tan pawh entawntlak ni tura beisei an nih laia doctor pakhat a lo fimkhur tawk lo hi Sawrkar chuan pawi a tiin a la thutak hle tih Health Secretary Pu H.Lalengmawia chuan a sawi a ni.

ZMC inrelbawlna leh inkaihhruaina dan siamte khauh taka zawm turin meeting kaltlang hian thawktute hriattir an ni a. COVID-19 positive hmuhchhuah thar doctor hian inkaihhruaina dan a bawhchhia ni a a lan avangin Sawrkar chuan show cause notice a pe a, July ni 27, 2020 ral hma ngeia insawifiah turin a hriattir a ni. COVID-19 positive doctor a awm tih hriat a nih veleh sawrkar chuan rang taka chhui zuiin contact tracing a ti nghal a. A tul anga chak taka bawhzui nghal a nih avangin mipuite tan chiaina tur a awm lo tih Health Department chuan a sawi a. Hripui laka mitinte kan him tlan theihna turin sawrkarin inkaihhruaina dan a siam te, tih tur leh tih loh tur Health Department-in mipui a kawhhmuh zawng zawngte zawm kim a, fimkhur turin mipuite a hriattir nawn leh a ni.

DIPR No.3327/2020-2020:22nd July, 2020; 5:06 PM

Post a Comment

Powered by Blogger.