HMING DANG ZAWNG ZAWNG AIIN A MAWI BER (KHB-164)

- Marama Pc

Suakliana hi kum 1901 khan Hrangkunga Sailo leh Lalziki te fa upa ber ni turin Maite-ah a piang a. Mipa 6 leh hmeichhia 1 an ni. A naupan laiin Chhipphirah an pem a, naupangte a nih laiin Baptist Pastor Ropianga kutah Baptistma a chang a. Kum 1925-ah Suakzawni nen inneiin, Kanghmun Melvengah an pem a. Khaw sawmah an pem kual a, kohhran hote leh thenrual ten an thlakhleh vang a ni. A hla phuahna hmun pawh hi khaw hrang hrang niin hla 300 chuang phuahin chhal niin, hriatchian theih erawh 128 a ni a, a thlan lungah chuan hla 150 phuaha ziah a ni thung.

SUAKLIANA CHANCHIN
Naupang tak chunga Chhipphira an awm lai hian a mit vei lam hi hmawlhin a hawlh a, chuta tang chuan khaw hmu fiah thei lovin a paw ta a. Chuta an awm lai chuan mitna hri leng avangin a mit ding lam pawh chu a na leh ta vak mai a. Chuta tang chuan hlo thlo thei lovin a mit khing hnih chuan a paw a. Chhun engah erawh chuan tiang hawl chungin amahin a kal thei thung a.

Lungrang khuaa an awm hnu kum 1932 vel khan Serkawn damdawi inah mit zai var thiam daktawr Chandrakuna panin. a naupan laia hmawlhte hawlhna chu a zaisak a, a fiah loh avangin a zai nawn a. Ni li hnua an han phelh chuan a khaw hmuh chu a lo fiah lo zual hle a, a mit naute paw chu a paw lehzual ta vek mai a ni. ( Thenkhatin an duhkhawp loh deuh avangin kan ziak nawn leh a ni. Heng ka ziah zawng zawngah hian a phuahtu chanchin kimchang aiin a phuah chhan lai hi ka zawn kual thin chu a ni.)

He hla hi kum 1931-34 inkar velah a phuah niin an sawi a. Suakliana hi a naupan tet atangin ramhuaiin tihhlum tumin an bei thin tih kan sawi tawh a. A hlau thei em em a, a mumangah te thil mum an umtir a, a man theih loh chuan a thih tur thu te hrilhin an vau hin a. Luikawrah ramhuai ten an keuh a, A lua nembetin an vau thin a. Mahse Kristiana a inpek atangin chung chu a reh ta a ni tih pawh kan sawi tawh kha. A pa ngeiin a mil lova, a zuruiin insualah te a cho a, a nupui a maksak a. Harsatna hrang hrang a pal tlang thin thu pawh kan sawi tawh a. Mit fiah lo, mitdelna hial tawkin, rawngbawlnaa a zinchhuahna leh pem reng renga khawsa a nih avangin a hringnun hi a hahthlak hle a. Mahse Rinnain vanram nawmzia a thlir reng a, lungduh zawng zawng kim a duh a ni. Khawvel sual thim leh harsatna hian a Lalpa hmel hi a hliah fo a, Thlarauvin a hruai loh chuan a sawi nin theih loh vanram kalna kawng a bo fo a, lungngaihna tur hlir a ni si a.

Chhimlam fanga rawngbawlna a neih laiin, theiriat khuaah a cham a. Leikapuia a awm laiin naupang pipu uai, kum 5 mi vel hian he hla hi mumal vak lo vin a lo chham/sak chu Suakliana bengah hian a cham ta reng a. Hla tha takah a lo chhuah theih phah ta a ni. Suakliana hian he hla hi ka phuah a ti ngai lo a, hmeichhe naupang kà hmanga Pathian pek a nih thu a sawi thin. (Mitdel mitvar Suakliana- Zofa H. Chhangte)

Tumkhat chu D.L moody leh a thianpa hi Dublin khawpuia intihhlimna hmunah an kal ve a. A thianpa chuan, " rimawi chi hrang hrang ri chu mawi i ti ve em?," tiin a zawt a ni awm e. Moody-a chuan," Khawvel aw mawi zawng zawngah hian rimawi tinreng zingah, mihring chhandamtu i hming hi, thawm mawi ber a ni fo,' tih hla hian a chhang a ni an ti.

Hlim, lungngaih leh thihna kotlangah pawh ngaihnawm reng chu Isua chanchin hi a ni reng ang, sual zing atanga min tlantu awmchhun a ni miau a.

Hming dang zawng zawng aiin,
A mawi ber, Lal Isu-a
Sual zing ata min tlan
En rawh, van lalthutthlengah
Ro a rel mek e.

Rinin han thlir ila,
Lawmna par leh a hmangaihna zam velah,
Aw, lungduh zawng tual leng ang maw?

Aw, ka thlarau vakvai,
I Lal i hmu lo vem ni?
En rawh, Zion fate,
Chatuan ram ropui panin,
An la kal mek e.

Sual thim hian ram ropui
Leh ka Lalpa hmel a hliah,
Pialral kalna ka bo,
Thlarau, min hruai rawh, lungngaih
Na a fawn vel e.

Post a comment

Powered by Blogger.