He hla hi Suakliana (1901-1979) phuah a ni. Kanghmun khuaa an awm lai, 1928-1931 inkar vela a phuah a ni.
SUAKLIANA CHANCHIN

Suakliana hi 1901 kumah Maite khuaah a piang a. Naupangte a nih laiin a mit vei lam hmawlhin a dàwt a, khua hmu tha hlei thei lo der mai a. 1930 kumah a mit tha lam zawk pawh chu a chhe ve leh ta zel a, mitdel a lo ni ta a ni.A mit a lo chhiat tak vekah chuan Thlarau pawlna a dawn nasat phah hlauh thung a, hla tha tak tak a phuah phah ta zawk a ni.

Lianpui khua atanga Vanzau khuaa khawm an ni a, hrehawm a ti em em thin. 24 Sep. 1968 khan khaw khawm hla, ' kan huntawng zingah khaw khawm a pawi ber mai,' tih hla hi a phuah phah ta nghe nghe a ni.

A naupan lai atangin Ramhuaiin an tibuai nasa thin a, tihhlum tum ten an bei buai thin a ni. Kristiana a inpek hnuah chung amah tibuai thintu chu a reh ta hmiah a ni.

1928 kumah kohhran Biak in hawngin Suakzawni nen an innei a, an inneih hnu lawkah kanghmunah an pem a, chumi hnu atang chuan rawngbawlin hmun hrang hrangah a vak kual ta a ni. Hla 150 a phuah niin an ziak.A huntawp lam hi Lianpui khuaah a hmang a. July 3, 1979 zing lam dar 3 velah a nghahhlel khawpuia lut turin a kal ta a ni. A hlaphuah hi Kristian Hla Buah 8 lai telh a ni a, chungte chu-

1.  Aw, tunah hian chanchin mak tak chu
2.Aw chhandamtu, sual leh buaina karah
3. Hosana ti zelin aw, Halleluiah Amen
4. Aw, hmangaihna ka sawi thiam lo
5. Hming dang zawng zawng aiin
6. Jerusalem zion khawpui chu thlir teh u
7. Kan nghak reng che kan Lalber
8. Van chung sang taka Lal Isua

Heng bakah hian Kristian Hla Thar Buah hian a hla phuah 8 lai telh a ni bawk a ni.

Suakliana kristian a lo nih khan a pa Hrangkunga Sailo, kristian ni ve lo chuan kawng hrang hrangin harsatna a siamsak thin a. Favang laiin a Paten an inah Zu an inkhawm leh dawn a, an intihbuaina vela telve hlauin amahin a feh daih a. A pa nen an inkar te, a tihhrehawm dan leh sual hnathawh chimawmzia te a ngaihtuah vak vak a. Sual huatna thinlung a neih len phah ta em em mai a. Chutih lai chuan Setana chuan a rawn bei leh ta a,a mit lehlam chauh khaw hmu che che nih tawh nak laiin a khawhmuh a thim ta vek mai a. A mangang lutuk chu Pathian hnenah tanpuina dilin a tawngtai a, Pathian tanpuina a dawng nghal a, amah tibuaitu chu a kiang ta nghal a. Thlarau aw a hria a, " Nangma lam chauh i inngaihtuah a, i lungngai a nih kha, nangmah aia rethei hi khawvelah hian an tam asin," tiin aw a hria a ni.

Mak deuh maiin Kolkatta khawpuia kutdawhte chu thlarau mitin a hmuhtir a, chung mite chuan Lal Isua an lo rin ve theih nan a tawngtai vak vak a, a tap vak vak bawk a. Mihring sualna nasatzia leh chu sual avanga thil nung timrengte lungngai leh hrehawm tuara tap chuah chuahte a hre bawk a, a thinlungah hla thu leh a thluk a lo thleng a," KAN NGHAK RENG CHE KAN LALBER" tih hla hi a lo piang ta a ni.
Kan nghak reng che kan Lalber,
Khawvel hrehawm thim hnuaiah;
I buatsaih Salem khawpui, aw, ka ngai tawh mang e
Khawvel hrehawmna leh thim hnuaiah leng mah ila,
Hmangaiha min zawngtu chu ka ngaibang thei lo ve.

Van ropui, Eden th ar nuam chu,
Lungngaih awm tawh lohna hmun chu;
Aw engtik nge ka thlen ve ang,
I chatuan lalna ram, eng mawi nuam tak chu?

Lo hnai rawh, ka Chhandamtu,
Ral a lian khawvelah hian;
Thisena i tlan sate lungngaiin an tap e,
Khawvel i fan laia i thlaphanna Kalvari,
Hmelmate an lo kal e, i ram dotute chu.

Aw, khawiah nge Chhandamtu,
Zion tlang ralmuanna chu?
Sual tlenfaina hmangaih tui, kan tan i luanna chu,
Sual dan chahna kulhpui, i chatuan van khua leh tui,
Chhandam fa i zar mawia lawma an lenna chu.

Aw, khawvel hi a ral ang,
Rei lo tean a ral ang;
Chhandamtu a au vang a, lei ram kan pel tawh ang,
Krista hmangaihtuten Lal ropuina an chang ang,
Hmangaihna a fawn vel e, lawm r'u, Haleluia!

A hla phuah thar chu sain lo mawng zawla Buh karah chuan a làm ta vak vak mai a. Hla chang 3-na a dawn lai chuan van chu a lo inhawng uar mai a. Pathian éngah chuan van mipui chhiar sen loh hi, " Thianghlim, Thianghlim, Thianghlim," ti chunga thlawk kual eng zuai zuai hian a hmu a, rei lo teah van chu a lo inkhar leh ta a ni.

Vanram nawm turzia hi kan suangtuah fo mai. Sawifiah thiam an awm ka ring lo. Hla phuahtu pakhatin," nuam zawng zawng an nei reng ang," a tih hian a sawi kim ber mai. Kan rilru-in a suangtuah nawm theih ber leh a suangtuah phak baka nasa a nuam khawpui hi kan hmaah a awm a ni. He khawpui hi Hebrai Bung 11 a rinna champion te khan an lo hmu a, hla tak atangin chibai an lo buk tawh a ni. Chu hmun nuam taka kal tur chuan min lam turin Krista ngei kha ropuina famkim nen a lokal leh dawn a, chu chu kan nghak mek a ni. -Marama Pc

Post a Comment

Powered by Blogger.