United States in chak taka hma a lakna zarah Israel leh United Arab Emirates (UAE) chuan inremna thuthlung an ziak thei ta a. Asia thlang lama awm ram te tan remna leh muana hmahruaitu a ni ngei ang. 

Enge an inremna chu? August ni 13 khan White House chuan khawvel barakhaih dawrh khawpin thu ropui tak mai a puang ta thut mai a. Chu chu Israel leh UAE inremna thuthlung a ni. Tunhma in ram pahnih te hian inzawmna an la neih ngai lova. Tuna an inremna ang chuan UAE in kawng engkimah Israel ram nena inzawmna tingheh turin hma a la nghal ang a. Israel pawhin West Bank lak a tum thin chu a tawpsan ve dawn ta a ni. 

Israel hian West Bank chu sakhuana leh thlatute atanga an ram a nih thu an pawm nghet hle a. Prime Ministry Benjamin Netanyahu pawhin theihtawp chhuahin awp a lo tum fo tawh a ni. 

Ram ropui US chuan Israel hmakhua ngai chungin he lai ram buaina hi chinfel a tum fo tawh a. Tuna US President ni lai Donald Trump an Israel a duhsak zia pawh kan hre vek. Trump sawrkar chuan he lai ramri chinfel dan tur map a duang a. Hei hi Israel pawhin a pawm ve thei ta a ni. 

Tichuan, tuna UAE leh Israel inremna hi Israel tan chuan history pawimawh tak a tling ve hrim hrim a. Arab ram te hian Israel hi independent country angin an pawm duh lova. Ram pahnih chiahin Israel zalenna hi an pawm, Egypt (1979) leh Jordan (1994) in Israel hi a lo pawm tawh a. Arab ram zinga Israel ram pawmtu a pathumna turin UAE chuan inremna a zawm ve ta a ni. Tichuan, he inremna pawimawh zia chu a chiang mai awm e. US President Donald Trump hmalakna kan ti thei bawk ang. 
mizo world news
White House thuchhuak angin August thla tawp lam hian Israel leh UAE hian an inremna angin hma thar an la nghal dawn a. Ram pahnih hruaitute chuan an ram mipuite intlawh tawn thei dan tur kawng an siam dawn a, investment, tourism, direct flight, security, telecommunications, technology, energy, healthcare, culture leh environment lamah hmalak dan tur an sawiho bawk ang. Tin, tunlai hripui Covid19 damdawi siamna kawngah thawhdun dan tur an ngaihtuah bawk ang. 

He inremna thuthlung hi US President pawhin a lawm thu a sawi tawh a. Benjamin Netanyahu leh Sheikh Mohammed Bin Zayed pawhin lawm takin an puang ve bawk a ni. 

Engtin nge Palestina in a chhan leh? Palestinian president Mahmoud Abbas erawh chuan Israel leh UAE inremna chu a lawm loh hle thung a. "Inphatsanna" tiin UAE chunga a lawm loh thu a sawichhuak ve nghal. 

Palestinian ho hian Israel a duksak em avangin Trump hmalakna chu an thlâwp duh ta lova, tuna inremna thuthlung pawh hi "Inphiarrukna" angin an ngai a. Gaza Strip thununtu Hamas ho chuan UAE in hnung lamah min beih, an ti ve bawk. 

Trump tan hlawkna a awm thei em? Awm thei tehreng mai. Trump foreign policy a fuh hleihtheih loh thu kan hre nel nualin a rinawm. Korean Peninsula lamah hmalakna hlawhtling a awm meuh lo, NATO member thenkhat an lawm lo, Afghanistan Peace process a kal hlei thei bawk si lo, US-China relation a chhiat ber tum kan thleng. Heng zawng zawng kan thlir chuan President Trump foreign policy hi a fuh loh deuh a ni. November election kan thleng tep tawh a, Israel-UAE inremna hian nasa takin Trump campaign a puih dawn a ni. 

Tichuan, Joe Biden pawhin he thilah kher hi chuan Trump a fak loh thei lova, Covid19 chungchangah Trump a beih fo a, Israel-UAE inremna chungchangah kher hi chuan Trump han sel chiam na tur a hmu lo. 

India tan Israel-UAE inremna hi a pawimawh ve tho em? UAE leh Israel karah inhriatthiamna a awm thei chu India sawrkar chuan a lawmthu a puang ve nghal a. Ministry of External Affairs thupuangtu chuan, Israel leh UAE hi India nena thawhhona nei ram an ni a, inremna an nei thei ta hi, kan lawmpui hle a ni, tiin thuchhuak a siam. 

Mahse, Palestinian hian engtin tak ngai ang mawh? Kum 2017 khan Narendra Modi chuan Israel ram a tlawh a. India Prime Minister Israel ram tlawh hmasaber leh awmchhun a la ni. Israel a tlawh hma deuh hian Palestinian president Mahmoud Abbas a lo hmu tawh bawk a. India hian hmai hnih policy chu a la kalpui reng a ni. 

Vaipa principle, Israel nena inzawmna tha neih reng chungin, Palestinian tan thiltha kan duhpui, tih chu khawvel hriatah an puang a nih kha. Israel ralthuam hmang reng chung siin, Jerusalem chu Israel khawpui atan a pawm thei lova, India chuan Jerusalem hnâwlin vote a thlak nghe nghe a nih kha. 

Vawiin thlengin Israel puihna kan la mamawh reng a. A ralthuam tel loh chuan India ram hi kan him chiah lo tih kan hria. 

Tunah UAE leh Israel inremna hi India tan a tangkai hle dawn. India thiantha ve ve an nih angin, ram pahnigte inzawmna thar hian remchanna tam tak a thlen dawn a ni. India hi khawvela Muslim tamna ber dawttu a ni miau a, Musilim ram UAE tan pawh India hi hlu vet vet tak a ni.

September ni 17, 1950 khan India chuan Israel hi ram angin a pawm tawh a. Jews Immigration Office pawh Bombay ah hawn nghal a ni. Diplomatic Relations tak tak hi kum 1992 atang khan neih tan niin, vawiin thleng hian nghet takin an la inzawm thei reng a ni. Kum 1992 khan India leh Israel insumdawn tawnna kara sum che vel chu US Dollar 200 million niin, kum 2018 ah khan US Dollar 5.84 billion zet a tling tawh. India hian Tel Aviv ah embassy a hawng a, Israel hian New Delhi ah Embassy neiin, Mumbai leh Bengaluru ah consulate a nei bawk. 

India hian Russia ti lovah Israel siam ralthuam  a lalut tam ber bawk a, Israel tan sun hnar tha tak kan ni mek. Hei vang hian Israel hmelma Palestine hi India in han tan ve deuh thin mah se, Israel hian a ralthuam hralhna ber India hi a be chhe dawn lo.  @TimesofMizoram

Post a Comment

Powered by Blogger.