South China Sea buaina chuan ziahawm lam a pan thei meuh lo. Mithiamte sawi dan tak chuan, tun tuma US leh China inkar thu hi a chhe hle a, Conflict is Real an ti tawp mai a. An buaina hi chinfel mai thei a nih hmel ta lo.
US hian indo lawng lian pui pui a chhawp rup tawh thu kan hre tawh a. Tunah, china chuan heng US warship kahchhiat theihna tur missile chi khat chu a tul huna hman turin order a pe tawh a. China sipaite hian an hmang hreh dawn lo, tih a chiang sia, indona a thleng thut mai thei a ni.
China sipaite hian US warship pahnih chu kah pil sakah an lo vauh tawh thin a. Tuna Balistic Missile DF-26, anti ship ballistic and cruise missile hi China sipaite chuan an chhuang viau a. US ralthuam phurtu lawng te chu awlsam takin a kahchhiat sak thei tur thu China Rear Admiral Lou Yuan chuan a sawi.
US sipaite hlauh ber chu thih a ni. Kan chhanlet hunah chuan thi an awm nual ang. US lawng lian pakhatah hian mi 5000 vel hnathawktu sipai an awm a, kan kah pil sak chuan hnathawktu mipa leh hmeichhia 5000 zet chu an thi fai vek dawn. Hei chauh a la ni lo, lawng pahnih hi kan tichhe ve ve dawn a. Mi 10000 zet an thi dawn. Chumi hunah chuan US chuan min hlau tawh ang.
China sipaite hian kan hmelmate chak lohna lai kan hre thei hle. Kan hmelmate hlauh ber pawh kan hria. Kan military power zawng zawngin hmelma te chak lohna lai kan beih hunah chuan kan hmaah chiang takin an tlawm ang, tiin Rear Admiral Yuan chuan a sawi.
China chanchinbu The Global Times hi China rilru sutthlek kan hriat theihna awmchhun a ni mai a. The Global Times in a tarlan ang ang hi China khawsak dan a tih thei awm e. East leh South China sea velah ralthuam turu tak tak China hian a lo chhawp teuh tawh thu the Global Times report kan hmu tawh a. Ralthuam tunlai ber bera te chu US chhanlet nan an hûng ve thluah tawh a. China hian a hmang ngam tak tak ang em? A inhrosa nasa mai si a, a hmang thut mai thei bawk.
August ni 13 khan US indo lawng chuan Taiwan Strait tuipui a tlawh kual a. He lai hmun hi Paracel Island, China lam chuan Xisha Island tia an koh nena kar hla lo te, China in a rama a chhal a ni. Vietnam leh Taiwan pawhin an ram angin an chhiar ve bawk a. Mahse, US chuan ram zalen a ni, tu ram pawh zalen takin an veivak thei, a tisak hmiah mai a. A duh ang angin a lawnglian, indo tura inring sa reng chu a vaivâk tir ta zak zak mai a. China chuan a la chhanglet ngam meuh lo.
China hian Asia khawmualpui hi thunun a tum bur a. A dang theitu awmchhun chu India chauh hi a ni. Chu pawh, US puihna tel loh chuan eng ual kan ni lo. South China sea buaina ah pawh hian US awm lo se chuan, China sipaite chu zalen takin an chetla der tawh ang.
China ballistic missile DF-26 hi China missile thar ber niin, Lawng lian leh lawng te hmachhawn tura tunlai thiamna thar tak tak hmanga thuam a ni. He missile hian warheads, bomb kan ti mai ang chu, chi hnih a phur thei bawk. Ballistic kan sawi hian missile thiltihtheihna chikhat sawina a ni a. Ballistic awmzia chu, missile in a kahchhuak warhead kha boruakah sang taka invawrh chho in, tichuan a target lamah chak mangkhengin chhuk zawngin a thlawk ta thin a ni.
Centre for Maritime Strategy Studies, Peking University direvt Hu Bo chuan, US in ralthuam hlauhawm tak tak a hûng chhan hi thuneihna duh vang leh, a sipai chakna tihlan a duh vang mai mai niin a lang. Mahse, he thil hi China in a en liam mai mai a rinawm lova, chhiatna nasa tak a thleng thei. Indona vanga chhiatna thleng tur hi sawi lawk theih a ni lova, indona a ni tlat a, kan rin aiin a nasa ang, a ti.
US hian China hi a hlau lo khawp a. August ni 14 khan South China Sea ah indo nungchang an zir leh tawh a. US chhuantawlawl USS Ronald Reagan chu hlauh nei lo ni awm takin South China Sea tuipuiah a virkual luah luah mai a. A awmzia ber chu, "China hian min kâp hmasa phawt se" ti a ni ber. China chu thinrim viau mah se, tih ngaihna vak a hre lo niin a lang.
USS Ronald Reagan hi US ralthuam phurtu indo lawng pakuana niin, President hlui Ronald Reagan hming chawia koh a ni. Ronald Reagan nupui Nancy Ragan in a siamna senso hi a tum ve thung a, US indo lawng zinga hman rim ber a ni bawk. He lawng hian aircraft 90 lai a phur thei bawk. USS Ronald Reagan hin kum 2030 vel thleng service thei tura ngaih a ni.
South China Sea hi China in engvanga hauh tlat nge a nih? Tih zawhna hi tawite in kan han chhang ang e. China ram import leh export zawng zawng hmun 10 a thena hmun 9 zetin he lai hmun hi a paltlang a ngai a, China tan hmun pawimawh a nih zia chu a chiang viau mai. Kum khat chhunga pawisa che vel chu US dollar trillion 3 zet a ni. Tichuan ram 5, Brunei, Malaysia, Philippines, Taiwan leh Vietnam te chuan an ram angin an sawi ve bawk a. China in a thunun vek ai chuan US thuhnuaia a awm hi ram 5 te hi chuan an phal viau a, US hi a inrawlh ta char char a. China tan chuan tawrh a har dawn hle reng a ni. @TimesofMizoram
Post a Comment