Kan MSR Chief Admin Pu Vana'n "LPS Special Report" - a Tuidam khaw bula Ruhro an hmuh dan chanchin a hmuna report a siam chu YouTube-ah uluk takin ka lo thlir ve a, beng a verhin hmuh nawm ka ti kher mai! Chutih rualin vawiin lamah Ruhro awmna bul velah Bengbeh leh Thival leh thil dang an hmuh belh nual tih, social media atangin ka lo hre leh a, ngaihtuah a ti thui vawng vawng.
Tuidam khaw bula Ruhro
Heng Ruhro te hi zir chian ngei chi a ni a. Mizo History ah Bung thar keu phah dawrh theihna a ni thei ang. Ruhro thenkhat, Malpui ruh atanga alan danin 6ft vel a sang niin alang a, Luruh thenkhat lah chu a te chhe lo hle bawk si. Tuibur lu te hmuh tel a nih avangin, hman lai kan Mizo Pipute khan Tuibur zuk an uar em em a, heng Ruhro hi Zofate ruhro ngei niin alang.

MZU kan neih ve chinah, kan Mizoram sorkar pawhin hman tangkai zirin, kan State Economics thil atan te leh Mizo History zir thukna leh zir zauna atan Mizoram University (MZU) te hi kan chhawr tangkai thiam a pawimawh hle a ni.

Tuidam khaw bula RuhroTuidam bula Ruhro te pawh hi MZU lama History Dept ten Project-ah neiin, research and analysis tih nan hmang sela, thil engemaw hun kal tawha Mizo History hriat tawh siloh hmuh chhuah nan, a hman theih ngei a beisei awm a ni. Ruhro te hi Carbon Dating hmangin a kum upat zawng te a hriattheih anga, Forensic Experts te atangin eng tiat nge an nih a, an thih dan, etc te pawh hriat theih a ni ang.

MZU kher lo, Mizoram sorkara Arts & Culture Dept - Tribal Research Center lam pawhin, he thil hi uluk takin chhui zuiin, ngaihtuah zui sela, Thuneituten an bawh zui a tul hle a ni. Archaeologists lam te pawhin, uluk takin zir chiang sela, hemi atan kan Mizoram sorkarin mithiam (experts) leh hmanrua a neih loh pawhin, India ram chhunga University khawi emaw, Union Ministry lam te pawh dawr pawp vat sela, a tha awm e.

Cambodia rama kum 1975-1979 inkara Pol Pot's Khmer Rouge communist sipaiten anmahni mi ngei, Khmer hnam mi nuai 3 chuang thihna tura ro an rel laia an mi thahna hmun "Killing Field" (Bang Chueng Ek) hmuna Luruh Ruhro 8,000 chuang te an laih chhuah khan, Yale University (USA) a Forensic Experts ten Project-ah neiin, a hmunah an zir chiang a, Yale University chuan Project Fund te siamin uluk takin Ruhro/ Luruh (skull) te chu a zirchiang a, silaia kahhlum an nih dan te, vuak hlum an nih dan te leh Ruhro atangin kum engzata upa nge an nih te an chhut chhuak vek a ni.

"Killing Field" an tih hmuna ruang phumnaah chuan lu bung ruhro 500 chuang te, luruh ringawt engemaw zat a huhova phum a ni tih an hmuchhuak a. Luruh rote chu uluk taka silfaiin, tawih theihlohna/a mawi lohna turin damdawi hmangin an siam hnuah, darthlalang phui tak chhungah, pawn lam atanga hmuh theih turin vawn that vek an ni a. Chung Lu ruhro leh Ruhro te chu Killing Field hmuna concrete building a sak Inah dahin leh Toul Sleng Museum, Phnom Penh khawpuiah an dah vek a. Kumtin maiin khawvel hmun hrang hranga khualzin (tourist) maktaduai 4-5 inkarin an tlawh a, an en luih luih mai thin a ni. Nitin maiin khualzin sang chuangin an tlawh hut hut reng a. A hmuna tlawha luhna man (Entry Fee) chu USD 7 (Rs 500 vel?) man a ni a, chung Lu ruhro leh hmun sawifiahna chu tawng hrang hrang 10 chuangin ziakin, sawifiahna lehkha phek (leaflet) an siam bawk a. Chung thilte chu Sorkar tan pawh, khualzin te atanga sum lakluhna hmanraw tangkai tak a ni.

Chuvangin Tuidam khaw bula Ruhro tam tham takte pawh, kan MZU a mithiam te leh kan Sorkar thuneituten zir chiangin, uluk takin vawn that nisela, hun lo kal zelah Mizoram tlawhtu foreigners tan te leh, keini Zofate tan ngei pawh thil hmuhnawm leh tangkai tak a ni ngei ang. Museum lamah uluk taka vawn that zui chi pawh a ni.

MZU emaw, Mizoram sorkar pawhin ram dang (foreign) a mithiamte pawh thawhpuiah sawmin, heng Ruhro te hi han zir chiang sela, ava tha dawn em! 
@CT Lalrinawma Aug. 18, 2020
Tuidam khaw bula Ruhro

Post a comment

Powered by Blogger.