White House bulah inkahna thleng, US President Donald Trump vengtute an che rang hle
White House Inkahna: Ram a ralmuan reng chuan Sipai tha hriat hleihtheih a ni lova, Indo a awm chauin Sipai tha leh huaisen kan hre thin. Chutiang bawkin, khawvel ram hrang hrang venhimna lama an that zia han sawi tur chuan, harsatna leh buaina an hmachhawn dan hriat a ngai a. Ram hruaitute himna chungchangah pawh, tu ram hi nge security nei tha ber, ti zawhna chu, an hun tawn azira sawi thei chauh a ni thin.
South Korea hotupa Pu Kim Jong Un a bodyguard te hi a lan danah chuan an that hmel fu mai a. Mahse, harsatna an la tawng lova, an that zia belhchian theih a la ni lem lo.
Tun tuma White House bula inkahna thlengah hian US President thah tuma inkahna ni lo mahse, programme pawimawh, press meet a neih lai taka thleng a ni avangin, a hunlai na na na kha chuan, eng thil nge? Tu te thil tih nge? Tunge kah an tum? ti hriat a ni lova, an ven ber United States president Donald Trump himna kha Secret Service te ngaipawimawh ber a ni.
Heng thil te hian, US Secret Service te that zia a hril a. Rikrum thilah pawh an che buai ve ngai meuh lova, an tan chuan fiahna a ni zel mai a. Training ngawr ngawr chu nei tha viau mahse, inthah tuma inbeihna a ni lova, a tak taka inbeihna nen chuan a boruak a dang hle dawn tih a hriat mai. August ni 10 a White House bula inkahna hian US Secret Service that zia min hrilh nawn leh kan ti thei ang chu.
 |
| US President Vengtute Chanchin - White House Inkahna |
Thil thlen dan kimchang: Pa pakhat Myron Basil Berryman, kum 51, Forestville a mi chu Secret Service Officer pakhat bulah US sana a tlai dar 6 vel khan kalin, hriamhrei le silai a ken thu sawiin a páwr hle a, buaina siamin, White House bulhnaia awm zawng zawng ka that dawn, tiin a au chiam a. Secret Service officer, uniform ha pahnih ten inbengdai tura an hrilh hnu pawhin a zawm duh lova. Silai a hman mai an hlauh avangin secret service officer hian a kap hmasa ta a ni.
He thil thlenna hmun hi Whit House atanga hla lo te a ni a. President vengtu te an che nghal vat a. Buaina liantham a nih lo thu an hriat hnuah press meet an chhunzawm leh ta kha a ni a.
Metropolitan Police Department chuan buaina siamtu Berryman hi hliam na tak tuarin hospital ah a awm mek thu a puang a. Thil awm dan an chhuichiang mek avangin report kimchang a la pe thei rih lo a ni.
US Secret Service: US Secret Service ah hian division hrang hrang an awm ve a. A ruka enthlatu pawl te, inchung chhawng atanga Sniper hmanga lo viltute, President bula awm pawl te, a an tam mai.
Tun tuma buaina hmachhawntu hi Uniformed Division an ni a. An hotupa ber Tom Sullivan chuan Berryman in uniform ha officer a hmachhawn dan hi report a pe a. He thil thlen lai hian Berryman hian silai a ken leh ken lo an la confirm thei lova. Silai pawh chu an hmu chuang lo bawk.
US Secret Service hi Khawvel milian milal te vengtu zinga tha ber kan ti mai thin a. A dik ngei ang. US Department of Homeland Security hnuaia awm niin, US ramchhung himna tura mawhphurtu ber, a tih thei hial awm e. An headquarters hi Washington DC niin, United States mai ni lovin, US pawnah pawh office an nei nual a, a vaiin Office hmunpui 150 an nei.
An hna ber hi Protection & Investigation, venhimna leh hnuchhuina a ni deuh ber a. Venhimna lama an hnapui ber te chu:
1. US President venhimna hna
2. US vice President venhim
3. US President leh vice President te chhungkua venhim
4. US president chawl tawh te leh an chhungkua te venhim
5. US a zin ramdang milian venhimna pek
6. US presidential leh vice presidential candidate leh an chhungte venhim
Heng a chunga kan sawi te bakah hian, US sawrkarin hun pawimawh anga a ngaih te vil turin a hmang thin bawk.
Hnuchhuina lamah ve thung chuan, US pawisa khawih chingpen chungchangah te, Cyber Security leh forensic thilah te hnuchhui hna an thawk thin. Secret Agent te hlawh hi a namai lo khawp mai a. Police and Detective page in a tarlan danin kum khatah US Dollar 63,380 vel an hlawh tlangpui a ni. @TimesofMizoram
Post a Comment