October ni 13 khan Chinese President Xi Jinping chuan China sipai Peoples Liberation Army (PLA) te chu, an rilru, taksa leh chakna zawng zawng te siamrem a, indona hmachhawn tura inpuahchah turin a hriattir, tih Xinhua chuan a report a. Hei hi CNN leh India ram chanchinbu ZeeNews te pawhin an tarlang ve bawk. 

October ni 12, Thawhtanni khan Military Commander level a inbiakna thawh 7-na chu Chushul ah nei niin, ram pahnih sipai hotute chuan inbiakna a hlawhtlin thu an sawi zo chauh kha a nia. Mahse, Chinese President chuan a sipaite chu India nena indo tura inbuatsaih turin a hriattir leh ta si a. India leh China ramri buaina sawhkháwk hi sawi thiam a har a, inremna erawh kan la hlat hle niin a lang. 

October ni 13 khan Chinese President Xi Jinpinga chuan an sipai hmunpui Guangdong province a mi chu a tlawh a. PLA Marine Corps, Chaozhou City a mi chu enfiahna (inspection) a nei a. He hunah hian Jinping chuan, inring renga awm tur leh, ram tan rinawmna, thianghlimna leh nghet taka awm turin sipai te a chah bawk. 

October ni 14 khan Jinping chuan Shenzhen Special Economic Zone din champha vawi 40 na a hmanpui a. Kum 1980 a din, he economic zone hian China chu khawvela Economy lian ber dawttu ah a hlangkai thei a ni. 
Ready to fight India
October ni 12 inbiakna khan darkar 11 chhung zet a awh a. Ram 2 ten an pawm thei ve ve tur buaina tihreh chungchangah inremna an siam a. Mahse hei hian a tu ram ve ve ah pawh, ram chhunga Sipaite inbuatsaihna lamah engmah nghawng a nei lova. India pawhin a dinhmun siamrem turin October thla tîr khan Atal Tunnel, khawvela leihnuai kawng hmun sang ber chu a lo hawng tawh a. Rohtang Pass hian Léh (Ladakh) leh Manali (Himachal Pradesh) chu awlsam taka kal paw theih turin a thlungzawm a ni. Hei hian ramri lama awm sipaite chákkhai lakna a ti awlsam phah bawk ang a. Ramri lama awm sipaite dinhmun a sawhngheh pha hle dawn a ni. 

Defence Minister Rajnath Singh chuan October ni 12 vék khan ramri hrûlah lei (bridge) 44 zet a hawng a. Heng lei te hi Jammu and Kashmir ah 10, Himachal Pradesh ah 8, Punjab ah 4, Uttarakhand ah 8, Arunachal Pradesh ah 8 leh Sikkim ah 4. India hmalakna chhanletna ni awm takin Chinese President hi October ni 13 vék khan a che ve nghal a. An sipai hmunpui te a tlawh kual. 

China chuan Ladakh leh Arunachal Pradesh hi India ramah a chhiar ngai lova, India sawrkharin hmalakna a nei apiangin buaina a siam ta thin a ni. Chinese foreign Ministry thupuangtu Zhao Lijian chuan, Beijing in ramri lama India hmalakna thar te hi a duh loh hle. Lei 44 zet hawn a nih bakah, sipai tam tak a dah belh reng a. Hei hi kan buaina bul bera chu a ni, a ti. 

India ve thung chuan, kan hmalakna zawng zawng hi India ram chhung vek a ni, tiin China duh dan chu zawm a tum lo nasa mai a. India lam  Line of Actual Control (LAC) ah pawh hmalakna kalpui zel a nih tur thu an la sawi ta deuh deuh a, buaina a reh dawn lo. 

Hetih lai hian Pakistan, China leh Russia chuan UNHRC ah seat an hmu leh ta.

United Nations Human Rights Council (UNHRC) hi khawvela mihring dikna chanvo humhaltu pawl lian ber a ni. UN General Assembly ah UN member ram 193 te chuan secret ballot hmangin vote an thlak a. An vote hmuh dan tlangpui  chu hetiang hi a ni.: Pakistan vote 169, Uzbekistan vote 164, Nepal vote 150, China vote 139, Saudi Arabia erawh vote 90 hmuin a tling zo ta lo. UNHRC member ni tur hian vote 97 hmuh a ngai. 

US Secretary of State Mike Pompeo chuan China, Russia leh Cuba ten UNHRC a seat an chan chungchangah United Nations chu na takin a dem nghal a. UN Human Rights Council inthlan result hian, kum 2018 a UNHRC atanga United States a lo inhnudawh chhan kha a rawn  sawifiah ta a ni, tiin Twitter kaltlangin US sawrkhar ngaihdan a puangchhuak. 

Pompeo chuan, mihring dikna chanvo humhalna kawngah US hian thu chauh ni lovin, a takin hma a la fo thin a. China Xinjing, Myanmar, Iran leh hmun hrang hranga Human Rights bawhchhiatna te chu kan suichhuak a, hremna kan pe thin. UNHRC hi dik taka kal turin kan duh a. Mahse, Human Rights nasa taka palzût tute chu member an ni a, Hei vang hian US chu UNHRC ah a tel duh ta lo réng a ni, a ti. 

Kar hmasa mai khan Human Rights pawl inzawmkhawm Europe, US leh Canada a mi te chuan UNHRC member atana China, Pakistan, Russia, Cuba leh Uzbekistan te thlan an ni chu an lo dodal tawh a. Heng ram te sûlhnu kan en chuan, UNHRC member turin an tling lo a ni, an ti. 

Ramdang chu lo dah tha ta ila. China hian Human Rights nasa taka palzutin Xinjiang, Tibet leh Hong Kong ah te thuneina a chelek a. Heti chung hian mihring zalenna vawnghimtu pawl UNHRC member a ni thei tho hi thil inhmeh loh tak a ni. 

Pakistan hi January ni 1, 2018 atang khan UNHRC member a ni mek a. Term khat hi kum 3 zel niin, tuna a term thar hi January ni 1, 2020 atangin a hmang leh ang. 


Pakistan, China leh Nepal hian UNHRC atang hian Jammu and Kashmir chungchanga Indai sawrkhar chét dan hi an rawn sawichhuak thuai a rinawm a. Russia hian India a tan dawn em? Tih kan hre lo. UNHRC member lulawk ten India hi a chhe thei ang berin an rawn bei dawn. India pawh hian J&K a enkawl danah hian Human Rights bawhchhiatna tam tak a nei. 

United Nations hnuaia pawl lian tak tak te hi an hlutna a tlahniam mek a. A bik takin UNHRC member thlanna phei hi chu thianghlim taka kalpui chi a ni a. Vote hmanga thlan ai mahin, Human Rights venhimna kawnga ti tha ram te record ena ruat ni thin se, a tha ngawt ang. 

India hi kum 2011-2014,  leh 2014-2017 chhung khan UNHRC member a lo ni ve tawh a. January ni 1, 2019 atang khan tunah hian UNHRC member a ni mek bawk. Kum 2018 UNHRC member thlan tum khan India chuan vote 188 zet a hmu, kan sawi tawh ang khan vote awm zawng zawng hi 193 a ni. UN Human Rights hian Council member 47 a nei a. Kum tin member a lut leh chhuak an awm reng a. UN member 193 ten secret ballot hmangin an thlang thin a ni. 

Neutral taka sawi chuan, Kan India ram pawh hi Human Rights Council member tur chuan a tlák bîk em em lo. India ai chuan China leh Pakistan hi tláklo tak an ni. Human Rights an zawm tha em tih lam a ni ta lo. Ram huhang ngah chu an tling zel mai zawng a nih hih. @TimesofMizoram

Post a comment

Powered by Blogger.