US President Elect chungchanga Russian President Ngaihdan

Nimin November ni 23 chanchinbu chhuakah, US Election thubuai kal zela Russian President Vladimir Putin ngaihdan chanchinbu hrang hrangin an rawn tarlang nual a. Bloomberg chuan Joe Biden, US President anga han cheibáwl turin ka la inring lo, President Putin an a ti niin a ziak a.  He thu hi, Times of India, NDTV leh India.com, ah pawh chhiar tur a awm bawk. 

United Nations Security Council a Veto power nei ngat ram te kamchhuak hi khawvel in a ngaipawimawh a. Thu inchuh leh inepna karah te, Super Power ho sutthlek hian international politics ah  nghawng a nei len thin zia kan hre theuh awm e.  Communist sawrkhar China Foreign Ministry chuan Joe Bidena chu President elect angin lawmpuina a hlan tawh a, Mahse, China hian fimkhur tak siin, Court thubuai kal lai mek a nih angin, Election Result la danglam thei thu pawh an pha lo a ni. 

Tunlai hian China leh Russia hian hmalakna thar nei an tum mek a. Hetih lai karah Russia hian China angin Bidena chu lawmpuina thu a thawn mai kan lo ring mai thei a, mahse a ni hauh loh mai. 

Russia hi an invéng deuh a ni mahna, President Vladimir Putin chuan tun dinhmunah US leader hrim hrim thawhpui a inhuam a, mahse Joe Bidena chu US President elect angin a la pawm ngam chiah loh deuh a ni. 

Pathianni November ni 22 khan Russia state TV ah thu sawiin, American mipuiin rinna an nghah ngam apiang chu kan thawhpui ang. Mahse mipuiin rinna an ngahna, Candidate chak zawka puan chu lehlam pawl pawhin an pawmpui phawt a ngai a, dan ang taka inthlan result puan fel a nih hunah chauh hma kan la dawn a ni, a ti. 
Khawvel Chanchin

Putin chuan, Kremlin in dan pangngai anga Joe Biden lawmpuina thu a la thawn lo hi thil dang engmah a awm lo, a ti a. Chanchinbu mite zawhna, Joe Biden hian Russia lakah sanction kalpui ta se, US-Russia relation hi a chhe viau lawng maw...? tia an zawh chuan, Putin chuan, US-Russia relation hi hei bák  hian a chhe thei tawh lovang, chhe tur dang a awm lo, a chhe vek tawh, a ti mauh mai. 

Mi tam tak chuan, Russia hian Joe Biden-a President tur hi a huphur deuh niin an ngai. A chhan chu, kum 2016 US Election ah khan US Intelligence agencies leh Democrats te chuan, Russia a inrawlh ngei niin an ngai tlat a. Kum 4 chhung kha chu he thilah hian Democrats hovin Trumpa an zar buai reng a nih kha. 

Thiangzau Party Democrats te chuan Russia puihna vang chauha Donald Trumpa hi President thei niin an ngai a. India Prime Minister Dr. Manmohan Singh kha, Sanjay Baru chuan The Accidental Prime Minister/palh thila Prime Minister tiin lekhabu a ziak hial a. A film pawhin en tur a awm nghe nghe. Tiang deuh hian Democrats ho zingah hian, palh thila President angin Trump-a hi an ngai. Hillary Clinton-i a hneh dan pawh kan sawi tam tawh a, khang te avang khan Trump-a kha an dodál nasa ém ém a ni. 

Mahse, a hmaa US President te ang lo takin an che ta rup rup mai a. Mi tam tak ngaihnat a hlawh nghal a. Khawvel mipui hian vote thlak ngat ila chu, Pu Trump-a hi International President pawh a ni thei hial zawkin a rinawm. A vote nei te ai mahin vote nei lo te hlei hlei hian kan lo tan rum rut mai zawng a nih hi.
@TimesofMizoram

Post a comment

Powered by Blogger.