MIZORAM-ASSAM BUAINA

MIZORAM-ASSAM BUAINA

HC Vanlalruata

Tuna kan buaina kal mek hi Mizoram leh Assam ramri buai (border dispute) emaw kan ti tlat mai hlawm a. 1875 leh 1933 kan sawi chiam chiam mai. Chutiangin ramri a buai ta lo tihna chu ni lovin ramri buai (border dispute) vang ni lovin Assam sorkar a Karimganj leh Cachar district thuneitute'n Mizoram chhunga buaina an rawn siam avanga buai mai kan ni zawk. Hei hi kan hriat chian loh chuan thil awmzia kan man thei lovang.

Buaina lo intanna chu Karimganj district bawrhsap Anbamuthan MP ho ni ngei a hriat Assam Police leh Karimganj district official engemawzatin September ni 9 khan Mizoram leh Assam inrina a Mizo 2 ram luh chilhin an kuhva kung an tihchhiatsak bakah thlam pakhat an hal a. Hetianga Mizoram leilunga buaina an rawn siam a, tharum an rawn thawh avang hian helai hmuna Mizo chengte thlamuan turin Police engemawzat dah a ni.

October ni 17 (Inrinni) khan Hawaithang leh a chhvel khawmite chu Saihapui V-ah lo lutin Saihapui V Task Force-in hrilen avanga venbuk an siam, hnathawh a tul tawh avanga Police lamin an luah zui tak chu an rawn tichhia a. Mipui hnungah hian Assam Police an awm a, a nihna takah chuan Cachar district thuneitute thiltih a ni a, nunau hi a hmatawngah dahin a tihtirtu chu sorkar hotute an ni. Hetianga Mizoram chhunga Assam Police leh mipui an rawn chet avang hian Saihapui V a Mizo chengte thlamuan turin sorkarin Police a dah leh nghal.

Hemi zan vek hian Lailapur atanga lokal mi 40-50 rual vel chuan autorikshaw dinna hmun, Vairengte khaw hmawr lama duty-te chu lungin an rawn tawng a. Chumi hria thinrim a lo pungkhawm Vairengte mipui chuan an um thla a, hetah hian dan kalha ramri buai lai hmuna Lailapur hovin buk an sak 10 chuang a kang a. Boruak a sosan tak avangin boruak sosang zel tur tidai a, ralmuanna vawng tur leh mipui thlamuan turin helai hmunah hian Mizoram Police dah belh leh a ni.

Ministry of Home Affairs a Joint Secretary (NE) Satyendra Kumar Garg chuan state inthenawm pahnih inkara boruak tihdaih tumin October ni 21 khan Silchar-ah Assam leh Mizoram home secretary te inbiakna a huaihawt a. Hetah hian Mizoram lamin Police hnuhkir an remti tiin meeting minutes-ah ziahlan a nih thu Assam I&PR department thuchhuah chuan a tarlang a. Hei hi an sawi dan a nih loh avangin Mizoram home secretary chuan an meeting minutes a hming ziah ve lohvah a vau ta a. Assam sorkar thuchhuah pawh hi siamthat leh a ni a. Chief minister Pu Zoramthanga chuan ramri a Police dah hi hnuhkir a nih loh tur thu chiang takin a sawi.

October ni 22 zan khan Mizoram chhung, Saihapui V a Primary School chu misualin bomb hmangin an tichhia a, Vairengte Police Station-ah (a tukah) thubuai ziahluh a ni. October ni 28 khan Assam Police lal, Additional Director General (Law and Order) Gyanendra Pratap Singh chuan helai hmun hi rawn tlawhin Vairengte lamah a rawn kual a. A aia Police officer junior Kolasib district SP hnenah chuan Mizoram sorkar thuneitute hnena thlen tur vauna hrang hrang a chhakchhuak a. 1. Darkar 24 chhungin tunhnaia ramri a Police dah zawng zawng Mizoram sorkarin a hnukdawk vek tur a ni. A hnukdawk lo a nih chuan he'ngte hi a thleng ang - (a) Mizorama lut kawngpui zawng zawng dangping turin thu a pe ang a (b) Mizoramin tun hnaia Police an dah belhna hmun apiangah an dah zat let 4 zel Assam Police a dah ang (c) Assam Police-te chu Mizoram Police te kap turin thu a pe ang a, thisen a luang ang.

Hemi chawhnu lam atang hian Lailapur leh hmun dang dangah Mizoram chaklakna kawng zawng zawng chu danpin a ni ta a, tun thlengin hawn a la ni lo. Hei hi thil awmdan tlangpui chu a ni a. Assam lam hian Police hnukkir turin Mizoram sorkar an kar a, Mizoram sorkar chuan hnuhkir a tum rih lo tih a sawi chiang a. Assam sorkar mite'n kawngpui an danpin chu hlip turin a ngen thung.

October ni 29 zan khan Union home secretary Ajay Bhalla kaihhruaiin Mizoram leh Assam chief secretary-te chu biakhmuhtheih hmangin an inbia a. Hetah hian Mizoramin Police hnuhkir a tum loh chhan hi an sawi chiang leh a. DC-te inbiak rawtna chu Mizoram lam hian an pawm ta a, chu chuan thil a tibuai ta a ni. Mihring nunna khawih, miin nungdama awm tura chanvo a neih (right to life) palzut leh rapbet a, India Constitution kalh a ei leh bar lakluhna dangpin phelh a nih hma chuan inbiakna neih hi a tul rih lo ti a mipui an lungrual hle laiin DC inbiak rawtna hi pawm a ni.

Kolasib DC chu kawng lakah Vairengte mipuiin lo danga kaltlang an phal loh avangin Cachar DC nen an inbe ta lova. Mamit leh Karimganj DC te chu an inbia a. An thutlukna hi Mizoram tan emaw a thatna leh tangkaina awm engmah a awm lo. Inbe lo ang an ni a, inbiak loh kha a dik a, biak duh loh tur an ni. Mizoram sorkarin emaw khawi khaw mite'n emaw Assam ramchhungah engmah tharum thawh leh buaina siam an nei lova, chutiang a nih lai chuan Assam lam hian hmun 3 hmun 4-ah buaina siamin tharum an rawn thawh a. Chumi a hnu hmanah Mizoram chaklakna kawngpui an dangping zui a, chu chu kan dinhmun dik tak hi a ni.

Keini lamin kan sawi tur zawng chu "Min rawn tihbuai zui lohna turin venghimtu kan dah a, kan dah reng rih dawn tih leh buaina rawn siam tawh lo ula a ni mai a, buaina in siam loh chuan keini chuan pakhatmah kan siam ve lova, inbiak pawh a ngai lo. Kawngpui danpin erawh chu in hlip duh lo a nih pawhin kawng dang kan lo dap ang e. Cachar district chhunga kan mite leh an lirtheite hi rawn chhuah rawh u," tih mai a ni e. Sawi tur dang a awm lova, inbiak a tul rih lo.