Tuipui ve lo tan delete nghal tur.
AMERICA-AH SIPAI RORELNA HNUAIA INTHLAN THAT?
A chiang lo lelte va lam leh rawh

Dr PC Biaksiama,
4 Dec 20, Zirtawpni.

Donald Trump

Dec. ni 1 khan America rama ‘We The People Convention’ (WTPC) pawl chuan an President Donald Trump-a chu Sipai Rorelna tenau (limited Martial Law) puang a, sipai thuneihna hnuaia inthlan that buatsaih leh tura ngenna an siam ta tlat mai! An Press Release, Washington Times chanchin bu phek puma advertisement an chhuahah chuan – legislator te, Court te leh Congress-ten Constitution an zawm that duh loh chuan Martial Law hi puang sela, tun inthlanna bawlhhlawh ber leh US historya vote tihchingpenna nasa ber hi America mipuiin kan pawm lo, a thara sipaite enkawlna hnuaiah ‘free and fair election’ tih ni rawh se, tiin President an phut tlat thu chu he TEA Party president Tom Zawistowski-a hminga chhuah a ni.

Tun tum US inthlan dan buarchuar leh chiri lutuk, engmah tihfel theih loha awm chu mipuiten an ning tawh takzet a. Zawistowski-a chuan, Keini Mipui (We the People) te hian roreltu leh hotu – judge te, lawyer te, court te, Governor te, Secretary of State te, Congress te, election official leh local politician corrupt rual hote, Media corrupt lutuk te, tharum thawh tura mi vaubeh ching Leftist-ho kutah hian Constitution-in ‘right’ min pek anga duh zawng thlan theihna kan neih hi kan pe dawn reng reng lo tih hi President te, legislator te, court te leh Congress te hian lo hria se kan duh a ni. Kan President atana kan mi duh zawng thlan hi KAN DIKNA PUMHLUM a ni tawp mai; dikna (right) kan neih hi mi ruksak turin kan ram puma Democrat/Socialist Party corrupt hovin dan lo ang taka inthlan an lo tikhawbaw vek mai hi, kan tuar thei ta lo ve,” an ti a ni. ((Limited Martial Law is clearly a better option than Civil War!) (https://wethepeopleconvention. org/articles/WTPC-Urges-Limited-Martial-Law).

Democrat-ho chet dan bawlhhlawhzia leh pawisak nei lova an hmalakna avang hian WTPC-te chuan Abraham Lincoln-an Civil War laia an ram kehchhe tur ven nana Thuneihna Chungchuang (Extraordinary Executive Power) a hmang ang khan, President Trump-a pawh hian a kuta thuneihna chungchuang a kawl hi hmanga Martial Law puang ve mai turin an nawr a ni. Chutiang chu puang ta se, an Constitution chu hun rei lote chhung lo hai rih (suspend) in, election buaipui tura Civil mi reng reng inrawlh lova, sipaite enkawlna hnuaia mipuiin an duh tak thlan that leh an demand a ni. An sawi danin, an ram politician-te, an court-te leh an officialte reng rengin mipui rin an kai tawh hlawl loh avangin sipaite chauh chu he hna pawimawh thawk tura innghahna tlak awmchhun an ni ta hial mai! Chu inthlannaah chuan paper ballot chauh hman. Computer hman loh tur. Vote pawh party ve ve agent-te endikna hnuaia kut ngeia chhiar tur. Vote nei thei tura in register-te chauhin an vote tur a ni. Voter-ten an address chuanna leh an photo ID nena thlak ni se, etc. Chutianga, Mizoram anga inthlanna thianghlim hnuaiah chuan Biden-a a tling hlauh a nih chuan ka pawm nghal hmiah ang, America mipuiten Trump-a aia an thlang zawk a nih nafam chuan. Vote lem hmanga tihtlin a nih erawh chuan, America mipuite leh chung Pathianin an vaw thla mai ang tih ka ring bawk.

Martial Law puang tura nawrna hi Trump-a leh White House lam chuan “chu e kha e” an la ti hauh lo. Sipai tha chakna hmanga ram lak hi Trump-a party-in an mamawh hran lo. Supreme Court-in state buai 6-ah te khan vote audit tur tiin order chhuah mai se, vote lem leh tak chhunfina chhiar tha leh ringawt lovin, vote lem te kha man chhuak se, Trump-a chu hneh taka tling vek mai tur a ni zawk. Ex-Army officer senior, Lt. General Michael Flynn-a chuan Martial Law puan hi tun dinhmun chingfel tura thil tul niin a interview-naah a sawi. Mahse, Democrat-ho erawh chuan ‘a buana hmaa kherh’ an tih ang maiin an huphurh lawkin an sawisel nghal der mai. Free and fair election-ah chuan Trump-a hi engti zawng mahin an hneh dawn lo tih an hriat chian em avangin a rûk a râla inbum dan kawng tinreng lo ruahman lawkin, rura thamin vote an tichingpen a, ballot paper lem a maktaduai tela an lo siam sate pawh kha China khawl chhuak nia report hailan a ni leh tawh a nih chu! An la inhlim mualpho zel a ni. (independent.co.uk/news/world/Americas/us-election-2020/Michael-flynn…)

Martial Law puan hi Trump-a tan thil tih chakawm lo tak a ni ang; mahse ni danga la thleng ngai lo, kumin 2020 chhunga USA tualchhunga buaina rapthlak tak tak – Black Lives Matter Movement te, Marxistho puihna dawng ANTIFA te atanga invauna leh inrikrapna te, sorkar in te leh mimal dawr tam tak rawka an hal dan te; foreign tanpuina, a bikin US hmelma Communist China sum leh pai hmanga Biden-a tihtlin nana khawl mak tak Dominion an lei te, US history a vote tihchingpenna rapthlak ber a thleng a; chutih laiin president-a tling tur bik a la chian hmaa president ni tur ang ziazanga Leftist Democrat-ten cheibawla, cabinet minister-te lo ruat a, US President thlan dik takin ro a rel lai meka lal hran insiam a, ro hran an lo rel vel hi America sorkar ding lai laka HELNA - Sedition Act dan hmanga hrem theih, jaila kum tam tak tan theihna khawpa dan bawhchhiatna a ni lo vem ni?

Tunah hian Democrat/Socialist te chuan thuneihna an chan phawt chuan US Constitution tihdanglam vek an tum a; sakhaw zalenna te nek chepin, freedom of speech te lak bo an tum a; chanchinbu leh TV site, media zawng zawng hi mi hausa Big Tech an tih – Google, Twitter, Facebook etc. te control vek a ni a, an duh dan dana mipui control tuma an beihna vek a niin, an duh loh zawng chu an hupsak (censor) hmak hmak mai a. President meuh pawh an zah chuang lo, a thuchhuah an duh loh zawng chu an ‘censor’ mai a ni. An tum ber goal chu American Democracy hi tihchhiat vek a, an duh dana Socialist/Communist rorelna hnuh luh an tum a ni.

Tunah ngei pawh hian mipuiten an mi duh zawng zalen taka an thlan chhuah tur tikhawlo-in, he president inthlanna hi inbumna, rukrukna, khawl bum hmang leh a thawktute thamna leh tihthaihna hmangin engkim control an tum a. Eptu party an nih laia hetiang an ti thei a nih chuan, sorkarna hi chang phei se chuan, tuna America ram ropui hi awmna tlak lohvin khawvel ram hrang hrang atangin mi suaksual pui puite leh Muslim ho an pem lut hum hum ang a; khawvelin America ram ropui a tih ang hi a boral vek dawn a ni tih hi America ram hmangaihtu Republican chauh ni lo, Democrat zinga mi pangngai tam tak chuan an hmu thiam tan tawh a ni.

Chuvangin hetiang suahsualna rapthlak lutuk hi control a, chingfel tur chuan President kuta awm, sipai tha chakna hman theihna power hman mai chu tih awm loh a ni lem lo. American history kan chhui chuan, chhan leh vang hrang hrang avanga ramin indona avang te, khuarel chhiatrupna thil thlengte avangin Martial Law hi vawi duai lo puan a lo ni tawh a. Kumin 2020 a America ram chhung buai mup mup mai hi mi thenkhat chuan Second Revolution an ti hial a ni. Thil thlen dan apiang hi a hleihluak ber chi zelin a thleng ta.

Democracy hi mipuite rorelna sorkar tha ber tih a ni a; mahse mipuite dikna chu namen lova palzut niin, inthlan dan leh vote chhiar dan mumal loh avangin, he inthlanah hian mipuiten rinna an nghat thei lo; mipuiten an aiawh tura thlang tura ‘fair election’ a awm loh chuan American democracy innghahna bul chu chhuhsakin a awm ta tihna a ni ang. Chhungkaw tam berin silai tha chi an nei vek tawh bawk si a; buaina zakhua a thlena Civil War rapthlak a chhuah hma hian President tan chuan a tih chak loh thil pawh a tih a ngai dawn nia rin theih a nih laiin, WTPC aiawhte chuan ram leh hnam veng him turin President Trump-a hian hma la ngei turin an phut tlat a: “Chuvangin Mr President, kan hnam inpumkhatna Union vawng him turin khua a tlai hma hian i che chhuak ngei tur a ni,” an ti a ni.

WTPC demand zingah hian,’ Lincolna’n a lo tih tawh ang khan, party pakhat tlinna tur ringawta side lam nei lutuka media-ten political propaganda an vawrh thin hi tireh bawk ang che. Mipuiten rinna an nghah theihna turin kan inthlan dan hi siam that vat a ngai a ni. Chuti a nih loh chuan tharum thawhna leh intihchhiatin ram pum hi a fan chhuak vek mai ang. “Sipai rorelna tenau koh chhuah mai hi Civil War ai chuan a thlanawm zawk a ni,” tiin an President chu an ngen a ni. (https://www.militarytimes.com/news/your-military/2020...; Limited Martial Law is clearly a better option than Civil War!) (https://wethepeopleconvention.org/articles/WTPC-Urges-Limited-Martial-Law).

CHANCHIN DANG

Trump-a Legal Team (Ukil rual) te chet that dan leh hmasawnna: US inthlan buaizia, vote tihchingpen nasat zia, vote chhiar dan fair lo ber, vote lem hmanga Biden-a lam tanlak nasatzia chu a bua chhuah tham kan sawi tawh a; an thiltih ruk an hmuh chhuah belh zel a. Court hmaah finfiahna (evidences/witnesses) te nena an tarlan chu zan khua khuaa en tur leh youtube-a an upload sa hi nileng lenga ena ngaithlak tur a awm reng bawk. Mizo zingah pawh BA/MA leh English thiam tak takin an thuhnar dik tak (original sources) atanga lo ngaihvena ngaithlatu mithiam sang rual fe, mi chinchang hria leh bum theih loh, sakhaw nei lo Leftist Liberal Democrat-ho politik leh propaganda, fake news ten an vawrh darh velin a tihbuai mai mai loh tur Mizo mipui (educated Mizo populace) hi a sing tel fe kan awm tawh avangin, mi tih loh zawnga thu lo vawrh chhuah hi ka hlauh zawng tak a ni.

Kohhran mipuiten thahnemngaia Pathian mi ruat Donald Trump-a tana an tawngtai mur mur laia, mi rilru tina tura a do zawnga hma lo la an awm reng mai pawh hi Mizo society-ah tho rawng an bawl duh a nih bawk si chuan, lo inngaihtuah let ve det se tih hi ka lo tawngtaipuina a ni. Tunah chuan kan thupui - State tina Trump-a Legal teamte hmalakna leh hmasawnna hi a tlangpui chauh tarlang ila.

1. PENSYLVANIA (PA). Kar hmasaa State Legislature hmaa Trump-a legal team Rudy Giuliani-a te, Jenny Ellis-i te, Linn Wood-a te kaihhruaiin Public Hearing neia, an thusawi te, witness engemaw zatin inthlan an tihchingpen dan an mit ngeia an hmuh leh hriat an puan chhuahte chu khawvel mipuiin an hmu vek a, an state MLA rualte rilru a khawih em em a. An district court-in lo hnawl ringawt mahse, an official corrupt tak tak, an Secretary of State Kathy Boockvar-i hovin Biden-a a chak zawk, tiin certification lo pe ngawt mahse, a kal thui hman lo, a tang ve chaih mai le! An MLA/Minister rualho ngaihdan a pel thui deuh va; ‘elected body, lawmaker’-ho chuan an thuneihna hmangin chu certify-na chu an hrek sak hmiah mai. Hetiang inthlan dan dukdak lo hi kan pawm lo, Bidena kan certify dawn lo, an ti hmiah mai a.

PA state legislature (parliament) hi upper house (Senate) pawh, lower house (House of Representatives) pawh Republican lamin an control vek (majority) an ni si a. An secretary of state pawh hi an ban zui ang em? tih zawhna a awm ta. Chuvangin, December 14 ah Washington DC a state tinin an state atanga Electoral College aiawh an tirh hunah Pensylvania state legislature hian vote 20 an neih chu Trump-a lamtang vek an tir dawn niin a lang ta: an ram Constitution-in thuneihna a pek ang takin. PA court hian Trump-a case an hnawl tak avangin Supreme Court a put luhna chance a inhawn phah ta thung. (Kei, mimala ka lo nghahhlelh ber mai chu – Supreme Court thupekin vote lem leh tak kha thliar hrang se, Bidenan vote dik engzah nge a hmuh tehreng, tih te; mitthi tawh sang engzah lek nge Bidena an vote tir, Dominion khawlin vote a lo chawhchawrawi dan vel THUDIK hmuh chhuah hun hi a ni ber mai).

2. ARIZONA. Pensylvania state a thil thleng ang chiah a thleng ve: Trump-a legal team in inthlan bawlhhlawh dan (massive fraud) nasat zia ukilten thiam taka an sawi nemnghetin witness-ten huaisen takin thudik an rawn puan chhuah chuan America mipuite rilruah an inthlanna Dem-hovin an tihkhawbaw nasat dan pho chhuah a ni. Chuti chunga an state court-in thiam loh chantir a, an governor leh secretary of state ten vote lema Biden-a chakna certification an pe tho chu PA state legislature te tih ang bawk khan FULL-STOP an pe ve leh hmiah mai. Houses pahnihah Republican an lo chak ve ve bawk si a. He state a EC vote an inchuh ber 11 chu Trump-a lama kal turin, Danpui zawmin an kal dawn ta. A nuai tela vote tihchingpen an man chhuah dan chu report-tu dangten youtube lamah chiang zet zeta an report kan ngaihthlak thin hi.

3. GEORGIA state-ah pawh zan hnih kal ta khan public hearingah Trump-a legal teamte an che tha leh pek. Biden-a an tihtlinna, an Dominion khawl te chu man chhuah hlauvin a server chu election official corrupt tak takten an lo la bo daih. An state judge-ten lo tichingpen lo tura order chhuah te a ngaih phah hial. He state a Republican mi leh sa, an governor leh an secretary of state, Dem-hovin sum tam taka an lo tham lungawi (bribe) vek avangin vote endik (audit) phal lovin, a lem nen vote an chhiar thattir leh ringawt thin a. Thubuai a kal mek laiin ‘Biden-a a chak’ tih certification lo pe hmanhmawh mahse, a thleng thui thei chuang lo. An state legislature thuneitu majority chu Republican an ni si a, PA leh Arizona te ang bawkin he state a EC vote 15 te hi Trump-an a hui leh hmel e. A takah chuan Trump-an landslide victory a lakna vek an ni si a!

4 & 5. MICHIGAN leh WISCONSIN. Heng state pahnih inthlan buaina te phei chu a chiang lehzual an ti a. Trump-a legal team-in hma an la zel a. An state roreltute chu Republican MLA/Minister vek an ni bawk si a. An state court-ten lo hnawlin, an officialten Bidena tan certification lo pe ringawt mahse, an ram Danpuiin thuneihna a pek angin thuneitu lu ber chu state legislature a ni miau va. Chuvangin Michigan state atanga EC vote 16 leh Wisconsin state atanga EC vote 10 te hi Trump-a bag-ah an va khung leh hmel si em!

6. NEVADA. Hei hi chu Democrat lalna state a ni tlat mai. Chuvangin an state EC vote 6 hi Biden-a ip chhungrilah an khung tha vang vang thei awm e. Mahse an ip mawng a pawp tlat. An inthlannaah khan vote nei thei lo illegal vote sing tam tak an awm; state pawna cheng tawh rawn vote-tu mi sing fe leh, absentee ballot a nuai tel a awm zia chu, Trump-a legal team-ten witness rinawm tak takte nena Supreme Court-a an thlen hunah Supreme Court-in rina lohva a lo pawm sak zen te a nih si loh chuan, fiahna ni lo thlen hunah paihthlak an ni lo vang tih an sawi leh thei chuang lo.

Ama mite chenin an do rawn Donald Trump-a hian Isua dinhmun a luah chiah mai. Mainstream (fake) news (CNN, BBC, NY Times etc.) ten an sawichhe char hi chu, hetiang ti tura rawih an ni a, a la hriat thiam theih. Amah ngeiin duhsaka a appoint William Barr-a, attorney generala a hman chu vaubeh a ni nge, a rukin hmelma lamin an lo tham lungawi nge, a chuk tur chuk ngam lovin, a ekcheh thut ringawt. A chang leh vote tihchingpenna lian tham a awm lo, a ti, an ti a; a chang leh, endik hna pawh kan la zo hlei nem, a ti, an ti a. Sûû a ti sêê mai zawng a nih hi! Khawvelin a lo ngaihsan em em FBI te, CIA te, DOJ te chu an director-te Obama corruption thil khan a lo phuar khawm vek avangin, an tih tur ti lovin, an ekcheh thut ve reng ringawt mai a ni. Supreme Court chief justice John Robert-a lah chuan tun hnaiah vawi hnih ngawt Trump-a a phatsan tawh a; ani tel lo hian mi 5-4 an la ni hlauh mai pawh a. Dr Steve Turley-a phei chuan, “Khawvela mi nep ber a ni,” a tih hial kha. Chanchin thar ber ber chu Esther Fanai te, Ricky-a te, Mani-a te leh Youtube atangin Rainbow Mizo Production te, Alpha Mizo Production te leh channel hrang hrang, Trump-a hmalakna leh inthlanna THUDIK bengvarthlak tak taka rawn ziaktu leh chhiartute atanga hriat tur a awm reng a; an taima a, an rintlak em em a ni.

Donald Trump-a hian heti khawp hian hektu, sawichhetu, chirh thehtu leh vawi 25 chuang zet a nunna lak tuma beitute awm mahse, Lalpa mite, Kristian tawngtai mi maktaduai tam takin an tawngtaipui reng avangin Pathianin a hum reng a. Thlarau Thianghlimin White House hi a uap tlat a, Vantirhkoh powerful tak takin an veng reng bawk a. Amah hmanga thil dik lo hai chhuah tur a lo tam em avangin amah pawhin a tuar ve rih te, a nghah ve rih te a ngaih phah a, buaina hi a fel har deuh a ni. Mahse Lalpa chu a thutiam kawngah a muang lo, a hun takah a che dawn. Tuna thil thleng tawh chinah pawh hian hmelma-hote thil sual tih rûk hailan a nih zel avangin, innghahna tur leh bihrukna tur an nei lo tial tial a: Bidena tan White House chu a hla telh telh zawk a ni. Chuvangin Lalpa rorelna ni ropui lo thleng tur hi rinna neiin i lo thlir reng ang u! He sual leh tha indonaah hian Lalpan hnehna a chang tawh reng a nia!

Post a comment

Powered by Blogger.