Lunglei chhul chhuak Gospel singer lar tak R. Lalramchhana hi College Veng a mi R. Zothanliana leh Saitluangi sailo te fapa a ni a, zai lamah hian a thawm a reh deuh hlek a, Bible zirin tunah chuan Bachelor of Divinity(BD) a ni tawh a, a nupui K.Vanlalhriati fa pakhat Isak.R. Vanlalpeka thla sawm a upa an nei mek.
Ramchhana hi kum 9 lek a nih atangin mipui hmaa zaia in lan tawh a ni a, Kum 11 a nihin Audio album a siam der tawh. Kum 2006 -ah a music video tichhuakin a hit hle a, hei vang hian 2007 khan Vulmawi award best male gospel artist a dawng.
A hla sak tawh zinga a a mahin a duh zualte chu, ‘Nang fak zel che ka duh’, ‘Chu tlangah chuan’ tih leh ‘Khawpui mawi’ tih te hi an ni.
Tunah chuan Pathian rawngbawla full time a inpek hi ka duh ber a ni, a ti a, Pathianin hun tha leh remchang a hawnsak zel a beisei.
Tunah hian MBKHP hnuaia Chhawmdawlna inah counsellor hna a chelh mek a, zai lamah a chawl rei ta viau a, hla thar tihchhuah mai tur hi chu a nei reng a, ‘Hun remchangah Pathianin rem a tih chuan kan la tichhuak ve leh ang’ a ti.
Ramchhana hian, Kan khawvel hun tawn mek thlir hian, thlarauah kan harh a tul hlein ka hria. Mihringte hi Pathianin min dinchhan ang ni lo hian kan kal thui viau tawh a ni ang em tih te hi, kan thurin Bible atang hian kan chhuta kan khaikhin fo a pawimawh hle mai. Lal Davida chuan hun harsa tak a tawh lai khan, mihring kuta tlukluh ai chuan Pathian kuta tlukluh mai kha a him a ni tih a hre thin. Kan hun tawnah pawh hian chu chu kan tih ve mai tur a ni in ka hria, a ti.
~Lunglei Times
Post a Comment