A Ngaihventute tan
THING LU BULA ZÂWNG DAN HI – TU NGE?

Dr PC Biaksiama,
7 Dec 20, Monday

Christian Research Centre

TRUMP-A VOTE BO HMUH CHHUAHNA! Dec. ni 1 daih tawhah khan Utah state chhunga thlaler hmun reh takah Donald Trump-a vote bo an lo chheh khawm, feet 14 vela sanga lo intiang urh mai chu an hmu chhuak hlawl mai! Heta ballot paper intiang hi eng zat chiah nge tih tarlan a ni lo. Trump-a chuan Twitter-ah, “Ka vote bote kha an hmu chhuak ta e! Hemi chheh vum-ah ringawt hian vote maktaduai 10 vel a awm ngei ang le,” a ti a ni. Sawiseltu lam ve thung chuan he Trump-a mail-in-vote hi artist hnathawh emaw, arsi danga mi (alien visitor) te rawn tih emaw a ni ang e,’ tiin hre chiang lova, rinthu deuha namnul an tum a ni. Inthlan hma leh khatih hun vel khan Trump-a vote an paih bo leh halral te, post office a thawk dak phurtu motorin vote nuai tam fe a ni lo lama an phurh bo daih te, bawlhhlawh paihna hmuna a tel tela an paih te, Canada ramria an va phurh bo an lo man tih ang reng kha report a tam em em a nih kha.

Dik takin Trump-a tana mipuiten vote an thlak tawh, an ruk bo leh an khawih chingpen zawng zawng nen hian dik takin chhiar ni ta vek se, a lo tling hneh awm zer zer hle mai; an thup bo seng lo a ni ber mai. Trump-a attorney Rudy Giuliani-a chuan chung lehkha intiangte chu enlenna hmanga a bihchian vel vek hnuah, Trump-a hian chiang takin state 50-ah hnehna a chang vek tih hengte hian a la puangzar dawn a ni, tiin chanchinbu mite hmaah a sawi a; Trumpa leh Giuliani te hian an sawi uar nge a nihna ang taka an hriat dan an sawi tih chu, endiktuten an la chhui chiang ang a. America mipuiten an mi duh an thlanna ballot paper a maktaduai tela hetianga ruk bova ram chhung hmun tam taka misual hovin an theh thang ta mai mai hi, eng ang inthlanna nge ni le, mipui an lungawi ang em? thlangtu mipuite an va zah lo em! India ramah pawh a la awm ngai lo ve! Mak tak mai chu, hetianga thil thlengte hi mainstream media/TV te chuan an thup tlat thin a, an chhuah duh zawng chu Trump-a sawiselna lam chauh an tilang thin a ni). (https://babulonbee.com/news/strange-mysterious-stack-of-trump-votes-appear-in-the-utah-desert).

CIA, FBI leh DOJ ten Trump-a an phiar em ni? Kum 200 chuang zet chhunga khawvela Democracy ram tha ber leh entawn tlak ber, USA President inthlan naa Trump-a paihthlak tum ngar ngara Leftist liberal Democrat party-in dan bawhchhiat theih zawng zawng bawhchhiaa, pawngsual theih zawng zawng pawng suala, America hmelma China te, Russia te leh Iran sorkarte tanpuinaa Bidena tlintir tuma an beihna chuan hnuhma chhui chhuah tur leh kih hnawk then fai tur an thlauh baw hnem ta ngei mai. Sipai General te leh mi thahnemngai tak takte leh mi tam takte nawrna angin, heng hnawmhnawk ching fela, inthlanna free and fair election nei tur leh, Democracy kal sual tawh siam tha leh turin Trump-a hian hun rei lote chhung tal Martial Law a puang tak tak mai ang em? tih chu zawhna lian tak a ni. Nge ni, Bidena a tlin dawn phawt chuan heng vote chingpen zawng zawng hi kan nuai liam mai dawn? Tuna thil kal dan enin America-ah hian tualchhung indona (Civil War) a chhuak mai ang tih hlauhthawn awmin a awm ta si a. A buaithlakna chhan ber pawh ni danga America uisathiamte che chang thei lova an bawk hle hle mai hi a ni. Engin nge mawlh ta?

Democrat-ho hmalak dan rura zia chu thu khat. America Uisathiam department pathum – Central Intelligence Agency (CIA: khawvel huapa secret agent ropui ber) te; Federal Bureau of Investigation (FBI), tualchhunga buaina chhuitu secret agent tha ni thin, Americaa kan Mizote chhungkaw pakhatin an in bul huana anthur an chin ringawt pawh Opium kung emaw tia rawn hre chhuak nalh nalh thei uisathiam FBI te leh, Solomona tluk lo deuh chauhva rorel thiam Department of Justice (DOJ) te chu – tunah hian tawng thei lovin an kha a chih a, engmah hmu thei lovin an mit tihdel a ni a, engmah hre thei lovin an beng a ngawng tlat mai!! An thawh tur ber an President veng him tur zawngin an kut leh ke, an lei leh ka chu phuar ang hlauh zu nia!

Heti em em hian a ni maw, an pu ber President Donald Trump-a phiarruknaah hian a hnuaia department hrang hrangte pawh an lo inthurual mai le!!! Ringtute tawngtaina leh, Pathianin a vantirhkoh chak tak takte amah veng him turin dah ta lo se tu tan mah dam khawchhuah ngaihna awm lo a ni. Amaherawhchu America sipai ropuite leh an police zawng zawng chu Trump-a lamah an tang deuh vek thung a. An sawi tlangrel Dominion khawl hnathawh dan lo controltu SERVER chu Germany khawpui Frankfurt-ah CIA-ten a rukin an lo enthla kiau va; mahse Sipai hotu lalber Commander-in-Chief, Donald Trump-a thupekin US sipaiten an run a, an chhuhsak leh hlauh va; mahse an inkahnaah CIA officer pakhat leh US sipai 5 an thih phah tih report hi CNN leh a kaihhruai fake news te hian thup tlat mahse, Conservative news channel atang chuan ngaihthlak sen loh a awm thung. US intelligence te leh US sipaite inkarah indona a thleng hial ang maw?! Rel fel tur a tamin, tute tan emaw chuan jail kawngka chu an va hawng zau dawn rua em!!

Trumpa’n duhsak taka appointment sang tak, Attorney General hial a pek William Barr-a, DOJ hotu lu lah chuan inthlanna thil chingpen a awm tih hi zu hmu thei der lova!! Engin nge a mit tidel? America ram chhung law and order chingfel tura uisathiam tuan tha em em leh chhuanawm thin FBI lah chu awm lo ang hlauh – kumin May thla atanga Black Lives Matter protest movement leh Socialist Antifa helhovin khawpui tin an suasam a, sorkar in leh vantlang dawr te rawka, an hal sen zuai zuai a, chanchinbu lian lian – mainstream media-te leh Dem-hovin khapbeh chu sawi loh, an lo fuihpawrh a, sum leh paia an lo puihbawm sauh sauhva, chumi hnuah USA inthlan tawha zawnga buai leh buarchuar ber a awm zui leh tak avanga result pawh la puang thei lo, ram dang atanga hmelmaten remchanga hmanga America control tuma candidate te an rawn neih ngam hial lai hian FBI chu meikhupin a bawk phek ringawt mai! Mi tam tak chuan CIA te, FBI leh DOJ te hi he America president phiarruknaah hian an inhnamhnawih vek niin an ringhlel a, an hotute hi Trump-a hian a va zuah rei ve, an ti a ni.

Hetiang hunah hian mipuiin rinna an nghah theih tur la awmchhun chu US Army, Navy leh Air Forces te an ni. Sipai sorkarna, Martial Law puang se, duhsak bik nei lovin, mipuiten zalen tak leh hleih nei lo (free and fair) election thianghlim nei se, chumi zawha civil administration a kal leh mai hi a tul hle tawh niin a lang. Lt. Gen. McInerney-a leh Lt. Gen. Michael Flynn-a te chuan ‘Election tihchingpen hi ram leh hnam phatsanna (Treason) a ni a. Martial Law hmanga chinfel a nih vat loh chuan kan tlai mai ang. Tunah a nih loh chuan engtikah mah tih theih a ni tawh lo vang, tiin warning an pe a. Trump-a hian engtin nge a chhan let dawn, tih hi sawi theih a ni ta lo a ni.

Joe Bidena Thusawi – miten mak tia an sawi chhuah fo chu: a campaign-naah mi an awm lo lutuk thin kha a beidawng deuh nge ni: “Mipui hi ka mamawh lo ve; in vote pawh ka mamawh lo. Hnehna chu ka chang reng tawh,” tiin a lo puang lawk thei tlat mai. China siamsak ballot paper duh zah zah hmanga vote tichingpena a tlin dan tur a lo hmu lawk a ni ngei ang. Inthlan vote chhiar tha leh tura court lama Trump-a team-ten hma an lak khan Biden-a chuan, “Vote an chhiar ṭhat leh chuan Donald Trump-a a tling mai ang asin,” tia a sawi video clip kha a darh vak kha. Tak tak a nih leh nih loh chik takin a hmui phunte nen lam kan lo chik chiang vel a nih kha; a ni ngei si a! Vote tihchingpen tam zia miten an report sup sup lai khan Biden-a vek hian, “Kan pawl hi vote tichingpentu lian ber kan ni asin,” (biggest vote fraud organization of all time) tiin a lo sawi tawh bawk a ni. Tar atna chi khat ‘dementia’ an tih hian a chhaih buai zeuh zeuh thin avanga a tawng sualte phei chu sawi fe tham a awm. Election campaign lai khan Trumpa’n, “Bidena hi zawng, a tar deuh tawh a ni,” tia a sawi kha a lo la na deuh pawh a niang, mipui hmuhah inthazo awm takin a tlan at at thin a; mahse a keruh a sawh khi hlauh mai a!
Donald Trump leaves White House
President Trump-a Thusawi: Kar hmasaa Trump-a thusawi chuan thuhmaah, “Hei hi ka thusawi tawh zinga pawimawh ber a ni ang,” a ti hial a. A chhan chu, America democracy lungphum (foundation of American democracy) chu an inthlanna (electoral system) khu a ni – mipuiten hotu atan an mi duh zawng tak thlan theihna an neih hlutzia a sawi dawn vang a ni.

President chuan election tihchingpen (fraud) hi US Constitution leh electoral system dan kalh leh pawngsualna a ni a, mahni ram phatsanna leh sorkar laka helna (treason) a ni a ti. Constitution humhim tura a chunga mawhphurhna awm chu engti takin nge Trump-a hian a hman dawn – tun hmaa hruaitu hmasaten buaina chinfel nan Martial Law an lo puang thin ang khan a ti dawn em, engtikah nge, engtin nge a tih dawn tih erawh chu thuruk a la ni awm e. Lehlamah chuan, chutiang ti kher lova he inthlan thubuai chinfel dan kawng hi a eng zel niin a lang bawk si (Hei hi tuna ka thu kheh chhuah tur lai tak pawh a ni a).

President chuan vote an chhiar nia hneh taka chakna a chan hnuah – tun hmaa la awm ngai lo inthlan tihchingpenna nasa lutuk avanga ballot vote lem siamchawp (China atanga an rawn phurh luh) hmanga a khingpui pa Bidena tihtlin nana an hman zia finfiahna hnial rual loh, eye-witness-te pawh koh sen loh an awm tawh thu te, nitina witness an pun zel avanga kha election rigging dan chipchiar puan chhuah a nih zel dan te a sawi. Heng thil dik lo enfiah tur hian a ukil rual (legal team) chhuanvawr: Rudy Giuliani-a te, Sidney Powell-i te, Jeena Ellis-i te leh Linn Wood-a ten Pensylvania, Arizona, Georgia, Michigan, Wisconsin leh Nevada state-ah te court-ah thubuai 40 zet an thlen tawh a. Kan sawi thin tawh angin, Trump-a lamtangte chakna hmun Supreme Court hi direct pawp theih a nih loh avangin, heng state hrang hranga court hniam zawkte hi paltlang phawt a tul si a; an lo hnawl thliah thliah hi SC an thlen theihna a ni zawk a. Mahse Nevada Democrat control tih loh, heng state pang-ah te hian court chuan lo hnawl mahse, thuneitu sang zawk - an state legislature: Senate (upper house) leh House of Representatives (lower house) te hi Republican party control vek an lo ni si a; GOP Controlled Republican Legislature (Dan Siamtu) Senatorte leh Congress-men te hmaah vote chingpen dan zawng zawng sawina hun leh mit ngeia hmutu (eye witness) te tan sawina hun PUBLIC HEARING an nei ta zel thung a (zanin 7.12.20 hian a hnuhnung ber Wisconsin-ah an nei dawn a).

Public Hearing Result:  Democrat controlled court-ten lo hnawl ringawt mahse, an aia thunei State Legislature-ten tha taka Trump-a legal team te thu leh hla an lo ngaihthlak atangin he election hi dik anga pawm rual loh khawpa inthlanna buarchuar leh vote tihchingpen nasa lutuk a nihzia chu pawmin, US Constitution-in state legislature-te hnena Thuneihna a pek angin, an state official hoten vote lema Biden-a chak zawk anga ‘certification’ an lo pek tawh chu an cancel sak hmiah a; tunah hian Electoral College (EC) member tur chu Republican party atangin an ruat mai dawn a ni.

Tichuan, EC vote 20 nei Pensylvania te, Georgia 16 te, Michigan 16 te, Arizona 11 leh Wisconsin 10 nei, belhkhawma EC vote 73 te chu Trump-a vote hmuh tawh 232 belhchhain, EC Vote 305 hmuin Donald Trump-a hi President a ni leh thei dawn a ni. Nevada EC 6 awmna erawh chu Democrat controlled a nih avangin Bidena vote neih sa 227 nena belhin, Joe Bidena hian vote 233 hmuin a tla dawn thung a ni. Hei hi Federal US Constitution dan, issue hmasaa CNN thupuangtu Fareed Zakaria rawn sawi tawh ang kha a ni a.

Democrat-ho Beih Let Dan Tur: Democrat lam chuan heng swing state 5 a vote lem nena an chakna hi an rawn hauh (claim) ve ngei tura ngaih theih a ni. Heng state-a Governor-te leh Secretary of State te an nawr chhuah theih chuan Bidena lamtang tur EC member an ruat ve ang a; tichuan December 14 a Washington DC a President thlang chhuak tura state tina Elector kalkhawm zinga tel ve ngei turin aiawh an intir ve ang. Chutia state pakhat atanga parallel list chi hnih a awm chuan engtin nge an tih tak ang, tu list zawk nge an pawm tak ang? Chutiang buaina chingfel tur chuan kum 240 zet experience nei tawh USA Danpui angin House of Representatives (keini Lok Sabha ang) in an thlang mai dawn a ni. Chuti ni se, Democrat lamin House-ah majority an nei si a, President atan Bidena an thlang dawn tihna a ni maw? Hnai lo ve! Chutiang khawpa harsatna ching fel turin America khuan dan fel tak, America dintu leh hruaitu ropui, Pathian tih mite khan tunlai dinhmun harsa chinfelna tur dan ropui an lo nei reng mai! Chu chu eng nge ni?

State a inthlan a buai a, party pahnih indona ṭhelh tura Dan nghet tak an lo siam chu – President thlang turin Congress member zawng zawng (an vaiin 538) ni lovin, state awm zat 50 atangin mi 50, state tin aiawh mi pakhat zel ruat tur an ni. Chuti a nih chuan a pawimawh ta chu, eng party-in nge state control hnem zawk? tih a ni ta a ni. Tunah hian Democrat party chuan state 22 (23 ti an awm) an control a; Republican party chuan state 26 (29 ti an awm bawk) an control a; a bak chu chak zawk bik awm lohna state an ni. Tichuan, Republican member 26 te chuan tihdanglamna mak tak an chang a nih loh chuan Biden-a chu President atan an thlan loh hmel a ni!

Heng option pahnih bakah hian option thumna, Trump-a tlin ngeina tur kawng a la awm ta fo. Chu chu tuna Trump-a legal team-in an kar chhuah VOTE AUDIT hi a ni. A hma khan vote te chu an chhiar tha leh ngei a; mahse vote lem leh tak chhun fina chhiar leh ringawt khan awmzia a nei lo. Trump-a legal team-te demand chu vote dik zawng zawng chhiar vek a, ballot lem leh siamchawp zawng zawng hnawl vek a ni. Chutiang an tih chuan, Trump-a leh Republican -hote ngei pawhin hneh taka tling zan turin an inngai a ni. Chu chu Biden-a lamin an ngam ve ang em? An hlauh ber a ni. An governor te, an secretary of state te leh Democrat-ho zawng zawngin ‘inthlanna vote tihchingpenna a awm reng reng lo’ tiin, vote endik (audit) lo tur zawngin an tang tang tang tih hai rual a ni lo. An sawi anga thil chingpen a awm loh chuan finfiah pawh ngam ber tur an ni a; an ngam leh si loh chuan inbumna a awm tih hre rengin an thup tlat tihna a ni ang. An posi hi ‘lâi’ ve tak a ni.

Vote Audit tura thupek chhuah a ni ta: Kan local news thenkhat Bidena lamtangten, “Trumpa’n a chak loh a la pawm duh lo” tia danbawhchhia anga a mawi lo zawng hlira an la sawi laiin, Biden-a chakna nia an sawi State thuneitute chuan khatiang vote lem leh ballot siamchawp (fake ballot) China khawl chhuak, Canada leh Mexico kaltlanga an rawn phurh thlak hmanga tihtlin kha an pawm lo hulhual a. Tichuan Pensylvania te, Georgia te, Arizona te, Michigan state thuneitute chuan ‘Vote endik’ turin thupek an chhuah ta a; Wisconsin state legislature (Republican) te pawhin an zawm ve tura ngaih a ni bawk.

A Uire lai taka man: Tun laia thawm nei lian Georgia state Governor Brian Kemp-a chuan Bidena chak zawka ‘certification’ a pek hnuah vote endik tur thupek a chhuah leh ta. Vote tihchingpen a awm lo tia tan an khawh laiin, eye witness koh sen lohvin an rawn puang ta si a; witness ringawt an nei, finfiahna dang an nei lo,’ an ti leh a. Chutah tak chuan Rudy Giuliani-a te chuan Georgia State legislatur-in an buatsaih Public Hearing-ah milianho hmaah vote an tihchingpen lai tak CCTV in a lo lak lai video (surveillance footage) chiang zet mai chu an show ta! Chu video-ah chuan, Georgia state chhunga Fulton County (State farm Arena) hmuna Nov 3 zana vote an chhiarna hall chhunga thil thleng a ni. Kha inthlan ni tlaia vote tla tur zawng zawng a tlak zawha an khar hnu khan state dangte ang bawkin vote an chhiar tan a, zan lai a pelh chuan an chhiar zo dawn ta a, Trump-a vote chu Bidena chuan a thlau hle a. Chutah an hotu chuan vote chhiar hna a titawp thut a, chhuak vek rawh u, tiin thu a pe a; mi 4 erawh chu an awm fual a. Chutia an chhuah hnu lawk chuan dawhkan puan duma khuh hnuai atang chuan suitcase lian deuh deuh pali, ballot paper a khat tlat chu an hnuk chhuak sawk sawk a, ballot chhiarna table hrang hrangah hmanhmawh taka an sem darh lai chu chiang takin a lo lang ta zawk zawk mai a ni. Tichuan, zing dar 3:30 atanga 4:30 inkar chhung khan Bidena kha nuai telin a lo chak thut hman mai a. Vote chhiarna hmun dangah chuan minute hnih khat lek chhungin Biden-a khan vote 130,000 zet a lo hmu hman, tih ang vel report a awm zut mai.

Hetianga inthlan leh vote tihchingpenna a awm tia puhna ringawt ni lo, witness leh an tih sual lai tak lo manna video te chena evidence pho chhuah a nih takah hian, vote audit phal miah lotu Georgia Governor pawhin vote thlaktute signature inmil leh mil loh endik phalna a pe ta. Ballot a Watermark awm leh awm loh pawh an thliar hmak hmak tawh dawn a nih hmel. Pensylvania leh Wisconsin dinhmun kan nghah mek lai hian Arizona State legislature pawhin an khawl mak sak Dominion Voting Machine chu court lam leh science dana endikna ‘Forensic Audit’ tur thupek an chhuah ta. Chutiang bawkin Michigan state a judge chuan an Dominion khawl hman 22 chu ‘Forensic Audit’ turin order a chhuah tawh bawk.

Rudy Giuliani, covid positive ve hlauh mai tih Fox news in a report a. A pawi hle a; mahse state 5-ah court thubuai leh Public Hearing hlawhtling takin a neihpui hman vek a; a lo chawl rih a nih pawhin Trump-a team ukil chhuanvawr Sidney Powell-i te, Jenna Ellis-i te leh Linn Wood-a te an la awm bawk a; an thawk tha thei hlei hlei zawk mai thei.

Khaikhawmna: Tichuan, kawng hrang hranga teh pawhin Donald Trump-a tan hian hai rual loh khawpa chiangin President nih chhunzawm theihna tur chance a nei a; Biden-a tan tuna a lemchan mek bak hi president tak tak nih theihna tur kawng hi a inhawng lo a ni ber mai. Ruk a ru a, mahse a tlan bopui hmain man chhuah a ni ta si a nih hi. Fake media ten a nih lohpui chawimawina an bel na a, a dinhmun dik tak hi chu a him lo, "thing lu bula zawng dan" an sawi ang mai, a ruk ruk hi tlan bopui ngaihna reng a awm lo ve. Duh chuan Trump-a hian Martial law hi puang thei reng a ni na a, puan ngai lovin, Pathian tanpuina leh ringtute tawngtaipuina avangin he harsatna hi chu a ching fel thei ang, a fel tep tawh tih hi thil awmdan hian a rawn tarlang zel a nih hi.

Post a Comment

Powered by Blogger.