Tawlhlohpuan lo chhuah dan

Tawlhlohpuan lo chhuah dan

Ziaktu: Lalnuntawma Fanai

Pu Lalrokhama Vaphai Lal,  kum 2011 October ni 23 a Aizawla a lo zin a, Bethlehem Vengthlanga a thlen ina kan zu kawmnaa a thu min hrilh, thawnthu ngaihnawm tak chu hetiang hi a ni.

Hualngo pasaltha Darhnawka ral pawh that teuh tawh, Sakei pawh a kah hnem avangin a khum pawh Sakei phawa hual chhuak vek khawpa pasaltha hi a awm a. Ral beia rammu thin a nih avangin tum khat chu a nupui hnenah, " Khai le, ral bei reng ka ni a, thih hun ka la nei dawn a. Ka ruang tuamna turin puan sei tawk, fem nei min tahsak rawh, fem sei tawk tak i neihtir dawn nia," a ti a. A dam lai emaw, a thih hnu pawha a ruang tuamna thama lianin a tahtir ta a. A puan chu a var a ni a, ting hmangin a dumin a tialtir a.

A nupui hnenah chuan, " He puan hi ka bat a nih chuan ral hmaah leh sa hrang hmaah ka tlan dawn lova, he puan hi ka ruang tuamna tur a ni," tiin a nupui a hrilh a.

Puan tah zawh hnu hian Dartetui leh Uihri khua, Sailo leh Fanai Lalte chuan an khua an rawn run ta mai a. Khuaah ral an lo lut tih an hriat chuan an Lal ina Darhnawka leng lai chu an va hrilh a, a lo haw a, Tawlhlohpuan a va la a, an lal luhka atang chuan, " Kei Darhnawk Sakeia, hetah ka awm e. A ngam chuan min rawn bei rawh u, a thi ngam ngam lokal ru," tiin a silai chu a kap thuai thuai a. Ralho chuan, " E khai, Darhnawka a awm tlat mai, beih ngam chi an ni dawn lo ve, i hawsan mai ang u," an ti a, an tinsan leh ta a.

Darhnawka chuan, " Chuti taka min rawn cho chu kan um let tur a ni" a tih tlat avangin pasaltha thenkhat nen an um ta a. Farkawn ram, Lurh lamah an umzui a, ral chuan Tiau lui an lo kan hman a. Tiau ral an thleng tih an hriat chuan an lo chau deuh nen, lungpui chungah an chawl a, a vaimim ken a ei ta a. A thiante chuan an mi umten an rawn kah an hlauhpui avangin lungpui chunga thu lo turin an ti a. Ani chuan a lo hlau awzawng lo mai a. " A hlau chu phaiphuk karah khan awm rawh u," a ti mai a.

Rin ang ngeiin Tiau ral atang chuan lungpui chunga a thu chu an rawn hmu ta a, a chet vel zawng chuan a ban hnuaia a puan fem uai chu a che suau suau a, ral chuan, " Saw pa saw mihring a ni lo ve, hmul a nei a ni," an ti a, an tlanchhe leh ta a. An tlanchhe thawm chu hriain an umzui ta a. A thiante chuan hlau hle mahse, a duh chu haw mai turin a ti a. Anmahni runtute tlanchhia chuan, " Hei kan silai hian min ti khawmuang mai mai a ni" tiin khamah an paih ta a. Chu kham chu, "Fanai silai khawhthlakna" tiin hming a chawi phah ta a ni.

Darhnawka chuan a umzui zel a, an zinga chau deuh, hnuhnung fal chu a man ta a. Sa leh ral a thah hnem tawh avangin sehhlum a duh a. Sakeiin ran an seh ang maiin a hrawkah chuan a seh ta ngat ngat a, rei tak a seh hnu chuan ral pakhat chu a sehhlum ta a ni. Heti taka a huaisen chhan hi Tawlhlohpuan a bah vang a ni. Hei hi Tawlhlohpuan lo chhuah dan a ni," tiin min hrilh a ni.

Post a comment

Powered by Blogger.