~Familia Fanai Lalţansanga

Familia Fanai Laltansanga

Georgia Secretary of State Brad Raffensperger chuan tun US President thlannaah khan Georgia state bikah Joe Biden chu US President atan thlantlin a ni tih a nemnghet nawn leh ta. Hei hi a vawi thum nemnghehna a ni. Georgia state bikah hian Joe Biden hian Donald Trump aiin vote 12,000 a hmu hnem zawk a ni.

Thawnţannia Atlanta khawpuia press conference a neihnaah Republican pachal Brad Raffensperger chuan, “Vote tihchingpen awm anga zeldin thubawl an vawrh darh vak vak hian Georgia state rilru a tina hle a ni,” a ti a. “Tunah hian vote hi vawi thum kan chhiar tawh a, an vote hmuh zat hi a pangngai reng a ni. Finfiahna tel lova inthlan dik lo anga thu an theh darh hi thu belhchian dawl lo, bawm âk thu vek a ni,” a ti.

A sawi zelnaah he Republican ruhkawl hian, “Mi tam tak hian intlannaah thil dik lo awm tak tak anga ngai an awm tih ka hria a, amaherawhchu an sawi angin thil dik lo engmah a awm lo tih kan finfiahna, finfiahna dik kan neih, fact hian a tar lang si a ni,” a ti.

Thawhţan ni hian Georgia leh Michigan federal judge te chuan Trump ukil rualho thubuai theh luhte chuan hnawlsak leh ta bawk a ni.

Georgia state-a Trump sangawi zawnpui, ukil Sidney Powell thubuai theh luh phei chu a awihawm lo lutuk a, Mizo thawnthua “Phungpuinu” awm tak tak anga naupang kan sawi ţhaih ţhin, hmanlai tuifinriata lawng mite zin laia tuifinriat hnuai aţanga lawng hnuk pil ţhin nia an sawi, "Kraken", mythical sea monster nen tehkhinin “Kraken thubuai” an tihsak hial a ni.

Raffensperger chuan, “Georgia inthlanna chu a hmawr kan bawk fel thei ta a, vote dik tak, legal vote chauh kan chhiar a. Kan vote chhiar dan hi a dikin a felfai a, a rintlak bawk a ni,” a ti.

Electoral Count Act of 1887 dan angin December ni 8 hi “Safe Harbor Day” an ti a. He ni hi US inthlannaa thubuai leh thu nawi neuh neuh chin fel ni atana ruat a ni a. December ni 8 hnu lam hi chuan inthlan chungchang thubuai theh luh theih a ni tawh lo vang.

America ram inthlan dan pangngaiin US President leh vice President thlang tur bika ruat Electoral College member te chu December ni 14-ah an inhmu khawm ang a, an tihdan phung pangngaiin Joe Biden hi President atan an thlang dawn ta a ni. Sawi leh sawi hnu, Joe Biden hian Electoral vote 306 a hmu a, Donald Trump hian 232 a hmu a ni.

Post a Comment

Powered by Blogger.